RSS
Wecome to my Blog, enjoy reading :)

Thursday, May 29, 2008

قولها بدون خجل اسف

أنا أسف ، أنا أسفة كلمة اعتذار بسيطة جدا ولكنها كبيرة قوى كبيرة على نفس كل واحد وواحدة مفيش أنسان بيحب يقول أنا أسف وكل شخص بيعتبرها اهانه لو قال الكلمة دى حتى لو عمل حاجة غلط 0
لية بنستكبر نعتذر وخصوصا لية بنستكبر نقول كلمة أنا أسف أو أنا أسفة ويمكن لو عملنا مقارنة بين الرجالة والستات هنلاقى ان الرجالة بتستكبر أكتر من الستات انها تقول الكلمة دى مهما كانوا غلطانين لية بجد مش عارفة 0
طيب نسيبنا من كلمة أنا أسف اللى ممكن نعوضها بكلام تانى زى معلش ،سامحنى ،ماتزعلش منى، أنا ماكانش قصدى ازعلك ،حقك عليا ، وكلام كتير ممكن نقوله بدل كلمة أنا أسف ولكن تعالوا لنقطة تانية لية فيه ناس كتير ما بتعترفش بغلطها ولية ما بتحبش تصالح اللى قدامها وبتلاقيهم بكل بساطة بعد أى موقف راجعين يتكلموا عادى لية مش عارفة مع ان الواحد لما بيصالح حد ده مفيهوش أى حاجة وبالعكس بيكبرك قدام الشخص اللى أنت زعلته والحكاية دى بتحصل من الستات والرجالة مش من طرف واحد بس ولكن الرجالة ليهم النصيب الأكبر فيها لانهم دايما شايفين نفسهم على حق وعمرهم ما بيعترفوا أنهم عملوا حاجة غلط ولما أى واحد بيزعل خطيبتة أو مراته أو أى واحدة أيا كان صلتة بيها عمره ما بيعتذر كأن الأعتذار ده حاجة غلط أو عيب ومش لازم يروح يقول لها أنا أسف 0
أنا قلت فيه كلام كتير بيعوض الكلمة دى طالما الكلمة دى تقيلة عليكم ولكن للأسف فيه رجالة كتير لا بتقول الكلمة دى ولا أى كلمة تانية ويعملوا كل اللى عايزينة ويغلطوا ويهينوا الطرف التانى ومابيكلفوش نفسهم يصالحوهم وتلاقى الواحد منهم لما خطيبتة أو مراته تعاتبة يقول لها أنتى عايزانى أقول أنا أسف
لا لا مين قال قول أنا أسف فيه حاجات كتيرة ممكن تقولها تخلص الموقف وتحسس الست أنها ليها كرامة عندك وأنك بتحترمها لأنك مش متخيل قد أيه هيا بتتجرح لما أنت بتزعلها وكمان ما تصالحهاش وتبقى شايف نفسك مش غلطان 0
وطبعا بيكون فى المقابل مطلوب من الست أنها تعدى الموقف وخلاص كأنها ولا حاجة 0
ولكن تعالوا نبص لو الست هيا اللى غلطت بتقوم الدنيا أزاى تغلط وأزاى تزعل جوزها وتفضل تحايل فيه وكتير بتقول له أنا أسفة ومش بتعوضها بأى كلام تانى ولكنه برضة بيفضل مصر على موقفه ويفضل يذل فيها كأنها عملت جريمة وهو المفروض محدش يحاسبه والمفروض ما يعتذرش لية مش فاهمة 0
وطبعا مش كل الستات وحشين ولا كل الرجالة وحشين فيه رجالة محترمين جدا ولما بيحصل منهم أى موقف على طول بيصالحوا الست وفيه ستات كويسة جدا برضة بتعمل نفس الحكاية 0
وأنا عايزة بس أقول حاجة بسيطة لأى رجل وشاب الأعتذار مش هيقلل منك ابدا ولو شايف ان كلمة أنا أسف كبيرة قول أى كلام تانى بس بلاش تهين اللى قدامك وتسيبها كده وبعدين تحاول تكلمها كأن مفيش حاجة حصلت ولما هيا تحاول تعاتبك تقول لها يعنى عايزانى أقول لك أنا أسف لا خالص هيا مش عايزة كده بس قول لها أى كلمة تطيب بيها خاطرها لان جرحها بيكون صعب قوى ومش هتقدر ترجع أى حاجة انكسرت جواها لو فضلت مصر على موقفك 0
لكل بنت بقول بلاش تعقدى الأمور وتكبرى المواضيع ولما تحصل أى مشكلة بينك وبين خطيبك أو جوزك ويجى بعد كده يصالحك بأى كلام بلاش تعقديها وتستنى يقول لك أنا أسف لأنك أنتى كمان بتستكبرى تقوليها وفيه كلام كتير بيعوض الكلمة دى عاتبية من غير ما تحسسية أنه طفل صغير قدامك وغلط خدى موقف منه مفيش مشكلة بس بلاش تكبرى المواضيع قوى 0
----------------------------------
فى انتظار كل مشاكلكم وأفكاركم وأى حاجة عايزين نتكلم فيها
أبعتوا لينا على ميل المدونة
-----------------------
تحديث
علشان كلنا قلوبنا على بعض حبينا نساعد بعض وكنا بنستقبل مشاكلكم وبنحلها هنا ولكن لأنكم غاليين علينا حبينا نكثف مجهودنا وننزل المشاكل وحلولها على طول وعلشان كده عملنا مدونة خاصة بالمشاكل وهنعلن عنها وعن أى مشكلة جديدة هنا على المدونة
مشكلتك فى عنينا

Thursday, May 22, 2008

من فضلك كلمنى بأحترام

من فضلك كلمنى بأحترام وبلاش صوتك يعلى عليا
لو كنت أخ أو خطيب أو زوج أو تمت لى بأى صلة ياريت تحترمنى وبلاش تحاول أهانتى بصوتك العالى لأن مجرد أحساسى أنك بتعلى صوتك عليا مهما كان السبب ده بيعتبر أهانة كبيرة ليا والصوت العالى مش أسلوب فى الكلام ولا النقاش وده بالأضافة الى الكلام اللى بتقوله وصوتك عالى مهما كان كلام عادى أنا بعتبره أهانه وأهانه كبيرة لأنه أتقال بطريقة مش كويسة
الصوت العالى مش هو الحل ولا الأهانة
كلمة صغيرة لكل راجل وشاب أوعى تفكر تعلى صوتك على أى واحدة أيا كان صلتك بيها لأنك بتسبب ليها جرح كبير قوى صعب تعرف تداوية وبتكسر جواها حاجات كتيرة حلوة ناحيتك فلية تعلى صوتك قول لها أنت عايز أيه من غير ما تكون قاصد تعلى صوتك عليها وزى ما أنت حابب أنها تحترمك وما تعليش صوتها حتى لو كانت متنرفزة وفعلا مضايقة

ياريت أنت كمان تبادلها نفس الأحترام ولو مشيت حياتنا بمبدأ أحترام كل طرف للآخر هتكون حياتنا سعيدة جدا
-----------------------
وحالا هنروح لصفحة المشكلات ودى أول مشكلة جاتلنا على ميل المدونة وكانت محتاجة لحل ومستنين أى مشكلة عندكم تحبوا أننا نشارككم فى حلها
هو بصراحة أنا عندي مشكلة أكتشفتها في فترة تعارف مكملش 3 أسابيع يعني مش عارف أقول شهر , والمشكلة دي أني مبلقيش كلام أقولة السكوت عندي شىء لذيذ , أمال لما أتجوز حعمل أية ؟والسؤال هو الصمت أثناء التعارف دة عادي ولا أية النظام وربما لأني مليش في مواضيع التعارف والبنات والحاجات دي لأني عملي أوي.وشكراليكم
اولا اهلا بيك ومنورنا في صفحتنا وشيء يسعدنا ان أول حد يطلب مشورتنا يكون صوت رجالي
ثانيا كون انك أنسان عملي ده لايتعارض أطلاقا مع الكلام أو غيره بالنسبة للصمت قد يرجع لأنك مش محدد أشياء معينة بترغب في التعرف عليها مع الإنسانة التي أرتبطت بيها وده بيخلينا نرجع لنقطة أساسية في بداية أي تعارف وهو اننا نكون محددين اهم الاشياء الي ببحث عنها في الانسانة الي هرتبط بيها وبناء على الامور دي بيكون كلامي معاها علشان أكتشف أسلوبها في الحياة وطريقة تفكيرها وأزاي بتقييم الدنيا والامور علشان كده في اي خطوة هتقدم عليها بعد كده لازم تكون محدد اهم النقط الي بتبحث عنها في الانسانة اللى هترتبط بيها علشان يتشكل حديثك معاها بعد كده
في نقطة احب الاشارة اليها قد تكون فترة الثلاث اسابيع فترة قصيرة جدا لادارة أي حديث مع الطرف الاخر
ولان اي انسان في بداية تعارفه بيكون حاسس بنوع من الرهبة في الدخول لتجربة جديدة ده بيؤثر عليه وفي أسلوب حديثه
أترك لنفسك الفترة الكافية اللي من خلالها تقدر تاخذ على الطرف الثاني
وحدد أهم النقاط الي بتبحث عنها ورتب أفكارك وإن شاء الله تستطيع أقامة علاقة موفقة واخيرا أهلا بيك دائما معنا
--------------------------
مستنين كل مشاكلكم وآرائكم وأفكاركم

Friday, May 16, 2008

البنت مش بتشتغل علشان تلاقى عريس


أفكار كتيرة وغريبة جوه دماغ شباب كتيرة وللأسف مهما يحصل عكس كده قدامهم يفضلوا برضة مقتنعين بيها 0
فكرة غريبة بيعتقد بيها شباب كتير وهو أن البنت بتشتغل وبتخرج للشغل علشان تلاقى عريس وبعد كده تسيب الشغل والله نظرة غريبة وعجيبة ومش منطقية أصلا 0
وفيه بنات كتير بيشتغلوا من قبل ما يتخطبوا وبعدها وبعد ما يتجوزوا بيفضلوا شغالين عادى مفيش مشكلة يعنى 0
لكن برضة بتفضل النظرة دى ويفضلوا متخيلين أنها برضة مستمرة فى الشغل علشان تقول أنها مش بتشتغل علشان العريس 0
فى أوقات كتيرة البنت أيوة بتسيب شغلها بعد ما تتخطب أو تتجوز وده مش علشان خلاص لقت عريس ومش محتاجة الشغل ولكن ده علشان أنها فضلت بيتها وجوزها على الشغل لاقت أنها مش هتقدر توفق بين الأتنين وعلشان كده أختارت بيتها اللى هو بيعتبر مملكتها ولكن ما بتسبهوش علشان خلاص ضمنت أنها أتجوزت والكلام ده0
طيب تعالوا نبص فى مصالح حكومية وخاصة كتيرة وشوفوا معظم اللى شغالين فيها أيه هتلاقوهم بنات وستات وكتير منهم مخطوب ومتجوز طيب دول ما سابوش الشغل لية حد يرد عليا 0
طيب زمان فى الأيام اللى ماكانش فيها حاجة أسمها أن البنت تشتغل كانت البنات بتتجوز أزاى وكانت بتعمل أيه ساعتها ممكن حد يعرفنى 0
--------------------------------
مستنين كل مشاركتكم ومشاكلكم وأقتراحاتكم
وكل المشاكل والأفكار اللى وصلتنا هنبدأ فيها من الأسبوع الجاى

Friday, May 9, 2008

حلقة برنامج البنات عايزة ايه

بجد مش قادرين نوصف لكم مدى سعادتنا وحبنا وتقديرنا للبرنامج ده
برنامج أنت تسأل والكمبيوتر يجيب يذاع كل يوم ماعدا الجمعه على اذاعة البرنامج العام
كان موضوع حلقتة النهاردة الخميس 8/5/2008 مدونة البنات عايزة ايه وبجد كان رائع جدااااااااااااااااااااااااااااااااااااااااااااااااااااااااااااااا
وأحنا بجد سعداء جدا ودلوقتى يالا اسمعوا الحلقة معانا
ومش هننسى نشكر أستاذ صلاح حجازى مقدم ومعد البرنامج على الحلقة الجميلة دى
اللينك ده نزلوا منه الحلقة
http://rapidshare.com/files/113552341/Record000.amr.html
-----------------------
تحديث
أى حد ينزل الحلقة يشغلها بالطريقة دى يضغط كليك يمين وبعدين يختار ميديا بلير معلش أصل أحنا كل حاجة عندنا غريبة

Thursday, May 1, 2008

أسباب ضياع الحب

زي ما كتبنا الحلقة الي فاتت في مدونة البنات عايزة ايه عن ماذا تريده البنات من خطيبها هناقش هنا نقطة مهمة وهي ايه اسباب ضياااااااااااااع الحب
في الغالب بتبدأ الخطوبة بمشاعر ملتهبة وكل واحد حاسس انه ماسك السما وان حبيبه ده مالك عليه الدنيا والي فيها شويا كده وتلاقي الدنيا هديت كده وزيها زي قلتها طيب ايه السبب ولا في ايه ولا هي على راي المثل " الغربال الجديد بيكون ليه شدة "
اسئلة بتدور في دماغ الكتير من الشباب والشابات طيب احنا هناقش هنا شوية نقط وانتوا ممكن يكون ليكم راي تاني
يعني في الأول كده بيكون كل واحد حريص ميقولش اي شي يزعل الطرف التاني وبيدق قوي على كل كلمة بتتقال وشويا شويا لما بياخدوا على بعض بتلاقي كلام بيتحدف متعرفش منين عادي بقى0
وبعدين في الاول تلاقي ايه الرنات شغالة على ودنه لما يصحوا يرنوا لبعض ولما ياكلوا يرنوا لبعض ورن على الفاضي والمليان وهب هب تلاقي ايه يدوب رنه في الصبح يرد عليها في العشا والسلام في الوقت ان الاستاذ او الاستاذة لو واحدة صحبتها رنت عليه بترد الرنة في السريع يعني دوام الحال من المحال.
في الاول كل واحد بيطمن على اهتمامات التاني بعد يومين وبتاع تلاقي كل واحد ازيك عامل ايه اخبارك سلام سلام ميعرفش ان ده جزء من شخصية الانسان الي بيحبه لا ازاي ايه الي يخليه يوجع دماغ والله كتر خيره انه بيسال في الاساس احنا هننهب ولا ايه وعجبي
كمان مافيش اي طرف بيهتم بيسال كل فترة الطرف التاني ايه الاشياء الي بتزعلك مني علشان يحاول يتجنبها بيبقى بس مهتم بنقض الطرف الاخر وبس من غير ما يعرف راي الطرف التاني فيه وايه الي بيزعله محتاجين نقف كل فترة ونعرف ايه الي بيزعل الطرف التاني مننا
ويرجعوا في الاخر كل واحد يحط ايه على خده ويقول اين ذهب الحب وكتير منهم شايفين ان الحب كدبة كبيرة " ماهو هو فعلا كده اصل مافيش حاجة اسمها حب وبس الحب حاجات كتيرة مش لمسة ايد وضمة صدر ونظرة عين الحب اكبر كتييرالحب مش انانية ومش امتلاك الحب اكتر من كده كتير بس مين يقدر ويفهم لو حد ليه اسباب تانية ياريت يبعت ويقولنا
 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes