من فضلك تحملنى

قلوب حائرة

اعتدتني دائما بشوشة الوجه ، تضيء الدنيا من حولي في إبتسامتي وتغرد البلابل في صوت ضحكاتي وترى الربيع في بريق عيني في أوقات سروري وفرحي ، فلما لاتصبر علي وتحتملني عندما يوجد ما يعكر صفوي ويكدر علي أيامي فهناك أشياء تجعلني لست دائمة على هذا الوضع قد تكون اشياء ضمن تركيبي كأنثي ولا دخل لي بها وتجعلني في حالة من التوتر والعصبية وقد تكون اشياء خارجية تسبب هذا أيضا " كلمات من زوجة

بلاقي كتير فعلا أزواج بيطلبوا من زوجاتهم أنهم يكونوا أغلبية الوقت في حالة سعادة وسرور وتضفي السعادة على المنزل كما لو كانت آلة تقوم بهذا فقط ولايوجد ما يعتريها في بعض الأيام كأنثى يجعلها في حالة مزاجية مختلفة عما كانت تبدو عليه بصفة دائمة أو أن يكون بها هموم تشغل بالها متعلقة بأحد من معارفها أو أصدقائها
ولكن ما يزيد الأمر غرابة أن تجد بعض الأزواج بل أكثرهم ينسون الوجه الضاحك المبتسم بصورة دائمة ويتذكرون فقط هذه الأوقات العصيبة ، ويتهمون زوجاتهم بأنهم دائمي العبوس والتكشير ، شيء غريب حقا أن ننسى كل ما سلف من خير ونقف عند هذه الأوقات فقط
عزيزي الزوج خذ في الاعتبار أن الانثى كأئن مثلها مثلك تعتريها بعض التقلبات المزاجية التي تكون احيانا خارجة عن ارادتها ولا يد لها فيها احتملها في اوقات غضبها حتى تحتملك في اوقات غضبك التمس لها الاعذار حتى تحملك على رموشها في اوقات عبوسك احتملها تحتملك ولا تنسى كل ما مضى من اوقات سعيدة وفي غاية من الجمال أمام لحظات من العبوس والكدر والتوتر فهي ماتريده أي زوجة من زوجها أن يحتملها في أوقات غضبها وتكشيرها و ينسى كل ما تفعله من أجله أمام هذه اللحظات

لا لهذه الأفعال

bos bos

أتكلمت قبل كده فى الحاجات اللى البنت عايزاها من خطيبها ووضحت فيها حاجات كتيرة قوى مطلوبة من الخطيب ولكن فيه أخطاء بيقع فيها الخطيب وبتكون كفيلة لهدم العلاقة بينه وبين خطيبته

أولا التغيير المفاجأ اللى بيحصل فى شخصية الخطيب وده بيكون لأسباب كتيرة ويمكن لأنهم بيكونوا لسة معرفوش بعض وفجأة بيكتشفوا حاجات كتيرة ولكن المطلوب أن التغيير دة يبقى تدريجى يعنى مش معقول تكون فى صورة ملاك وفجأة وبدون مقدمات تتغير للعكس تماما فى كل حاجة

ثانيا أهتمام الخطيب بشغل وطموح خطيبتة ساعات بنلاقى أهتمام كبير قوى فى بداية العلاقة بينهم بشغلها وبطموحها وبكل حاجة خاصة بأحلامها وفجأة نلاقى هدوء وجمود فى الأهتمام وكأنه كان واحد تانى وأتغير
ياريت التغيير ده برضة ما يجيش مرة واحدة ولو مش حابب شغل خطيبتك أو مش من أهتماماتك بلاش تحسسها فجأة بعدم أهتمامك بيه

ثالثا عدم أحساسك بيها وبمشاعرها وعدم تفهمك لطبيعتها الرقيقة واللى بتكون عايزة حد يحافظ عليها ويحافظ على المشاعر دى وكلامى معناه أنه ممكن البنت وأى بنت بتكون حساسة ورقيقة وعندها مشاعر حلوة وساعات كتيرة بتحب تظهر مشاعرها لخطيبها بطرق كتيرة منها مثلا رسالة موبايل أو رنة أو أى طريقة أيا كانت أيه بقى رد فعلك تجاه الحاجات دى تتجاهلها وكأن مفيش حاجة ولا حتى تحاول ترد عليها ولا بكلمه أستنى بقى شوية تجاهلك ده وعدم ردك وأهمالك لمشاعرها كفيل بأنه يجرحها قوى ويضيع شوية المشاعر اللى بدأت جواها ناحيتك وتدمر مشاعرها ونفسيتها جدا
يعنى حتى لو أنت لسة ما حستش بأى مشاعر ناحيتها رد عليها بأى رد حتى لو برنه تعرفها بأنك سعيد بكلامها ليك بلاش تتجاهل مشاعر خطيبتك بلاش

رابعا حاول على قد ما تقدر تحسسها بأنها مهمه عندك ووجودها مهم فى حياتك مش بس مجرد شكل أجتماعى هتكمله

خامسا بلاش تعاملها بطريقة وحشة أو تحاول تعلى صوتك عليها لأن ده بيعتبر أهانه لها ولما تعمل أى موقف يضايقها ياريت ما تتجاهلش اللى حصل ولكن حاول تصالحها وتصلح اللى عملته وبلاش تجرحها وتضايقها أكتر من كده

سادسا بلاش لغة التهديد تكون فى كلامك ليها كتير لأن الاسلوب ده مش هيجيب نتيجة بالعكس ده هيزعلها أكتر وهيحسسها بأنها هتعيش معاك غصب عنها ومهددة دايما بأنك تطردها من حياتك لو ما نفذتش كلامك وأنت طبعا هتنفذ تهديدك

سابعا زى ما هيا مهتمه بأهلك وبتعاملهم كويس جدا أنت كمان أهتم بأهلها حتى لو ماكانتش بتحبهم لكن معاملتك الكويسة ليهم هتقرب منك خطيبتك قوى وبلاش تحسسها بأن علاقتها بأهلها هتنتهى بعد جوازكم وبأن كل حياتها هتنحصر فى علاقتها بأهلك بس لأن أهلها هيفضلوا أهلها مهما حصل زى ما أهلك هيفضلوا أهلك مهما حصل

ثامنا حس بيها وأسمعها وأنت كمان أتكلم معاها وما تحاولش تهملها وتهمل وجودها وتتصرف تصرفات تضايقها وتفضل مصر على كل حاجة بتضايقها وأنت عارف بيها

قولها أمامهم

قلوب حائرة

حبيبتي ، هديتي من السما ، يانورعيني ، روح قلبي " كلام بسيط وسهل وياسلام لو اتقال باحساس والتوقيت بيكون في وقت فعلا تستحق هذه الكلمات والمكان في حشد أمام الجميع ، عزيزي الرجل لا أوصف لك الفرحة والحالة التي تكون فيها زوجتك أو حبيبتك لو سمعتها الكلام ده قدام أهلها أو أهلك واعترفت بحبك لها على الملأ بتخليها في حالة غير الحالة ومود غير المود وكفيل بإذابة أي حواجز تكون الايام والمواقف تسببت فيها

لو رجعت لأيام الخطوبة وكنت بتمسك أيديها قدام الناس وتبص في عنيها بنظرات كلها حنية وكانك بتعلن قدام الجميع حبك لها ، تيجي تبص للحال بعد الجواز هتلاقي الموضوع أختلف تماما حتى ماسكة الايد ونظرة العين تلاشت ليه هو التعبير عن الحب كان في الخطوبة بس

عزيزي الزوج بكلماتك البسيطة الي بتقولها دي بتكون بمثابة آمان لزوجتك تعرف أمان من أيه آمان من غدر الاخرين لما يعرفوا ان جوزها ملي عليها حياتها وبالتالي هي بتبادلك نظرات كلها حميمة لما تقولها الكلمات دي
فبيكون آمان من أي إنسان تسول له نفسه أن يصل إلى قلبها ، اقولك نقطة كمان الكلام ده بيفرق معاها قوي لما الجميع بيكون بيشكر فيها على الملأ والكل بيقول يابخته بيكي وماتلاقيش كلام على الملأ من الإنسان اللى المفروض يقول كده بنفسه

كلمات بسيطة لاتكلف شيء ولكن لها تأثير السحر يجعلها تبذل كل مافي وسعها من أجل أن تكون عند حسن ظنك
وللعلم الأمر لاينقص من رجولتك شيء ولا به أي شيء من الخطأ ولو كان به ذلك ماكان أعلن عنه حبيبك المصطفى صلى الله عليه وسلم فكان كثيرا ما يعترف على الملأ بحبها عندما يسأله أحد من أحب الناس إلى قلبك ويجيب نبيك وقدوتك عائشة دون أي خجل ويعلنها أمام الجميع ، للاسف كتير من الرجال بيظنوا أن اعترافهم بحب زوجاتهم قدام الجميع بيقلل من نفسه ورجولته ولكن على النقيض تماما فأن الامر لايزيده الا وقرا واحتراما من الجميع وبالتالي بيتيح الامر لزوجته أنها تعبر له أمام الجميع عن حبها دون خجل وتقول له انت أجمل ما رأيت في حياتي حفظك الله سندا وحبيبا وصديقا
في رأيكم بإمكاننا التعبير عن حبنا لبعض دون أي خجل وخاصة إذا ماعرفنا حديث نبينا العظيم الذي يقول فيما معناه اذا احب احدكم احد فليخبره فما بالنا ونحن ازواج يعني انا اقرب إليك من أي احد أخر

تحياتي

لا تتطفلن

bos bos

المرة دى الموضوع نسائى جدا والكلام فيه هنوجهه للستات وللبنات
فيه صفة كلنا نعرفها وهيا التطفل والتدخل فى شؤون وخصوصيات الآخرين وللأسف الصفة دى بتتمتع بيها الستات أكتر من الرجالة وللأسف كمان ممكن بسببها يدمروا حياه كل اللى حواليهم
أنا بطلب من كل بنت وست بلاش تطفل بلاش تدخلى فى حياه اللى حواليكى بلاش تعملى مشاكل ليهم خليكى فى حياتك وخلى كل واحد يمشى حياته زى ما بيحب
هديكم شوية أمثلة على التطفل ده
أول حاجة فى أى عيلة بيكون فيها بنات فى سن الجواز مثلا وأكيد ستات كبار نلاقى الستات دول مش راحمين نفسهم فى الكلام على البنات دول ودى ما أتجوزتش لية ودى وافقت على العريس ده ليه ودى جابت شبكة بكام ودى جابت جهاز بكام طيب أشمعنى فلانة ماجابتش شبكة زى دى وفلانة ما عملتش فرحها فى المكان اللى فلانه عملت فيه فرحها
وكلام من ده كتير بيدمروا بيه حاجات كتيرة وعقول وبيوت كتيرة وبنات كتيرة للأسف بتتأثر بالكلام ده وبيحصل لهم مشاكل وبيدمروا بيه عقول البنات وأهاليهم وبيبوظوا بيه كل حياتهم

ثانى حاجة ودى حاجة مهمة قوى لما يكون فيه خطوبة وعريس وعروسة الناس بقى تعمل أيه ياسلام ده دى فرصتهم تلاقى أم العريس وأخواته البنات وأم العروسة وأخواتها البنات برضة كل واحدة شغالة فى تدبير وتخطيط كل حاجة للعروسين وكل واحدة بتتكلم على مزاجها وتقول هنعمل كذا وكذا والفرح فى كذا والفرش مش عارفة نجيبه منين أيه ده هو مش بيكلمك لا لا ده غلطان لازم توريلة العين الحمرا وحاجات بقى كتيرة بتتقال من كل الأطراف اللى حوالين العروسة والعريس وساعات كتيرة والله جوازات بتبوظ بسبب تدخل الأهل ويرجعوا يعيطوا ويقولوا ياريت اللى جرى ماكان
ياريت بتمنى عدم دخول أى حد فى حياه العروسين سيبوهم هما يخططوا حياتهم بمزاجهم وبأرادتهم هما مش عيال صغيرة محتاجين حد يختار لهم وأكيد هما محتاجين مشورة ورأى الناس الكبيرة ولكن من غير تطفل ومن غير التدخل اللى بيبوظ كل حاجة وبيعمل مشاكل بين العروسين
يعنى خلاصة الكلام بقول للستات والبنات ياريت بلاش تبقوا متطفلين وزى ما كل واحدة ما بتحبش حد يتدخل فى حياتها ياريت هيا كمان ما تدخلش فى حياه أى حد سواء كان أخوها أو أختها أو صاحبتها أو قريبتها أو أى حاجة
وللناس اللى حظهم بيوقعهم مع ناس متطفلة ومش عارفين تتخلصوا منهم أسمعوا كلام من ناحية وطلعوه من الناحية التانية وأعملوا اللى انتوا شايفينة صح وفى مصلحتكم وياريت بلاش كلام الأهل يعمل مشاكل بين الطرفين
لا تتطفلن
!!!!!!!!!!!!!!!!!!!!!!!!!!!!!!!!!!!!!!!