أفهموا ليلى الأول

بقالى فترة بجهز فى الأفكار اللى هكتب فيها فى أحتفالية كلنا ليلى للسنة الرابعة وكنت ناوية أبدأ بموضوع عبارة عن طلب لكل ليلى أنها تعمل اللى عليها الأول وبعد كده تطلب اللى هيا عايزاه
ولكن لاقيت أن الموضوع ده نستنى عليه شوية ولأن لحد دلوقتى وبعد كل المواضيع والكلام اللى بيتقال على لسان كل واحدة لسة فيه مسافة كبيرة قوى بينا وبين كل الناس ولسة محدش فاهم ليلى ولا عارف متطلباتها والكل بيسأل
هيا ليلى عايزة إيه ؟
هما لسة عايزين حاجة ما هما خدوا كل حاجة ؟
أنتوا لسة بتكتبوا عن المرأة لية ؟

وملايين الأسئلة وأنا عن نفسى كذا مرة حد يقولى كفاية كلام عن المرأة بس أنا شايفة أنه مش كفاية وممكن أبطل كتابة عنها فى حالة واحدة لما الاقيها خدت أبسط حقوقها

ليلى مش عايزة تطلع السما ولا تبقى سوبر مان
ليلى مش عايزة تحط راسها براس الراجل ولأن كل واحد فيهم ليه دور والأتنين مكملين لبعض
ليلى مش عايزة تعلى صوتها على الراجل ولا تمشى كلمتها عليه
ليلى مش عايزة تبات برة بيتها ولا تسهر لحد وقت متأخر بالليل
ليلى مش عايزة تعمل نفسها الكل فى الكل ومن بعدها الطوفان
ليلى مش عايزة تعمل ملايين الحاجات اللى أنتوا فاكرين أنها عايزة تعملها
ليلى أبسط من كده بكتير

ليلى دى أمك وأختك وبنتك وعمتك وخالتك وخطيبتك وزوجتك

ليلى عايزة حاجات أبسط ما أنتوا متخيلين
عايزة معاملة أنسانية لأنها أنسان مش جماد
عايزة حد يتعامل معاها ويقدر عقلها مش يعتبرها جهاز بيديها أوامر ونواهى وبس من غير ما يفهمها لية
عايزة حد يفهم مشاعرها ويراعى طبيعتها الرقيقة مش يحدفها بطوب وزلط
عايزة ناس تبطل تبص لها على أساس أنها عاااااار ولازم ندارية
عايزة ناس تقدر آحلامها وطموحها طالما الحاجات دى مش متعارضة مع دينها ولا مع العادات والتقاليد ولا مع كونها امرأة عليها واجبات
عايزة ناس تبطل تتكلم عليها فى كل مناسبة وأى مناسبة وفى كل مرحلة عمرية ليها الكلام بيختلف ويتنوع

وكل الكلام ده مش مطلوب تعمله مع واحدة بس لا ده مطلوب مع أى ليلى موجودة فى حياتك سواء كانت أختك ، زميلتك ، بنتك ، خطيبتك ، مراتك

ولو عايزين فعلا تلاقوا ليلى زى ما بتتمنوا وتبطلوا تشتكوا منها أدوها حقها الأول اللى الدين نفسه أداه ليها وأنتوا حرمتوه عليها وبقيتوا بتتعاملوا معاها كأنها لوحة أو تحفة قدامكم

وأنتظروا باقى الأحتفال بتاعى بكلنا ليلى

بقلم بسمه عبدالباسط

كونى أنتى

كل واحدة نفسها تبقى أحسن واحدة فى الدنيا ومفيش زيها ولكن فيه كتير بيغلطوا لما بيحاولوا يقلدوا أو يتقمسوا شخصيات مش هما وعلشان كده لازم كل واحدة تبقى نفسها مش حد تانى

كل أنسان جواه حاجات حلوة كتيرة ولو أهتم بيها وطورها هتخليه مميز ومختلف عن اللى حواليه

حاولى تكونى نفسك أبنى شخصيتك وعقلك وفكرك خليكى مختلفة فى كل شىء
عيشى حياتك صح وأعملى كل اللى نفسك فيه بدون ما تعملى شىء غلط

خليكى بنت مؤدبة وأخلاقك كويسة وده ما يتعارضش أبدا فى كونك عندك طموح وعايزة تعملى حاجات كتيرة ولا أدبك ولا أخلاقك هيكونوا عائق فى أنك تعيشى حياتك وتستمتعى بيها بالعكس كل ما تتمسكى بكل حاجة صح وتعيشى بيها هتبقى أحسن فى نظر كل الناس وفى نظر نفسك أولا

بلاش تتعدى العادات والتقاليد ولا الصح والحلال بمبرر أنهم عائق فى سبيل تحقيق آحلامك وطموحك
مين قال كده لا العادات ولا التقاليد ولا الصح والحلال عمرهم ماكانوا عائق أبدا ولو بصيتى حواليكى هتلاقى أمثلة لبنات كتيرة متمسكين بكل حاجة صح وعايشين حياتهم كويس جدا وناجحين فيها

كونى انتى بشخصيتك وآحلامك وحياتك اللى رسمتيها لنفسك وعشتيها صح بدون ما تعملى حاجة غلط تندمى عليها بعد كده

بقلم بسمه عبدالباسط

مطلقات لكن شرفاء

طبعا كلنا عارفين أن كلمة مطلقة فى مجتمعنا أو فى أى مجتمع شرقى الناس بتبص لها أزاى وبيبقى محكوم عليها وعلى حياتها وآحلامها بالأعدام وأكيد مش كل الناس كده ولكن الأغلب بيتعاملوا معاها كأنها جرثومة أو فيروس أو تمثال مش بنى أدم من لحم ودم ومن حقه يعيش ويكمل حياته

وتعالوا كده نشوف بيحصل إيه

من بداية المشاكل اللى بتحصل بينها وبين جوزها والكل بيطلب منها حتى لو ماكانتش غلطانة ومفيش فيها أى عيب أو شىء يسبب المشاكل وأن المشاكل بسبب الزوج نلاقى الكل بيطلب منها بأنها تستحمل وتفضل متجوزة حتى لو هتعيش فى بؤس ومشاكل طول عمرها وكل ده علشان ما تبقاش مطلقة وأزاى تتطلق وأزاى ترجع بيت أهلها من تانى وأزاى هتعيش بعد كده ومليون حاجة بتتقال لها علشان تتراجع وتفضل عايشة فى ذل ومهانة لا حصر لها

وبعد ما خلاص بقت طالق تبدأ المشاكل تزيد من أول نظرة الناس وكلامهم واللى دايما بيطلعوا الست هيا اللى غلطانة وأنها السبب فى الطلاق وأنها لو كانت كويسة ما كانتش أتطلقت وفجأة تلاقى نفسها بقت محرومة من حاجات كتيرة وممكن جدا أهلها يكون ليهم دور كبير فى ده بأنهم بيمنعوها من الخروج والظهور قدام الناس كأنها عملت جريمة وتتقيد حريتها أكتر وأكتر ولو كان الأهل متفهمين لظروفها وبأنها أنسانة طبيعية زى أى حد مش هتترحم من كلام ونظرات الناس فى الشغل فى الشارع فى النادى فى أى مكان وكل مكان

وأكيد هيكون محكوم عليها تفضل كده من غير جواز باقى عمرها وده لية بقى لأن كل الناس شايفة أنه ما ينفعش واحد ما سبقش له الجواز يتجوز واحدة مطلقة حتى لو ماكانش عندها أطفال وده طبقا للتفكير الشرقى ولأن المجتمع عنده عقدة من الناحية دى فأزاى واحد ما سبقش له الجواز يتجوز واحدة مش بنت وحتى لو سبق له الجواز برضة كل الناس بتديله مليون حق يرتبط بواحدة ما سبقش ليها الجواز أصله راجل وبراحته عادى يتجوز مليون مرة ولازم اللى يتجوزها تكون بنت عذراء بمعنى أصح زى ما بيتقال

ودى طبعا عقدة كل الرجالة على أعتبار أن المطلقة واللى فقدت عذريتها وبطريقة شرعية بقت جرثومة ومالهاش حق فى أى حاجة

ولأن كل اللى بيتقال لأى واحد أنت لازم تتجوز واحدة محدش لمسها واحدة محدش جه ناحيتها غيرك

ومش قادرة أفهم لحد دلوقتى هيا المطلقة دى مش أنثى برضة واللى كان فى حياتها ده مش جوزها وكان اللى بينهم حلال وشرعى يبقى إيه المشكلة والعقدة عند الناس مش فاهمة

وياريت محدش يقولى أنتى جاية على المجتمع والرجالة وبتظلميهم لأنى فعلا ما بظلمش حد وعندى أمثلة كتيرة هعرضها ليكم من حياتنا الواقعية

هو أحنا بنرجع لورا ولا بنمشى لقدام مش عارفة لية كل مدى بحس أن تفكير الناس فى الحاجات دى بالذات بيرجع للعصر الحجرى ونفسى أعرف لية المطلقة مش من حقها تعيش حياه طبيعية بعيدة عن كلام الناس ونظراتهم

قصة حقيقة لصديقة ليا مطلقة واللى أعرفه أن المشاكل كانت من طليقها وبأنها أكتشفت أنه مش كويس بعد الجواز وحاجات تانية كتيرة مفيش داعى لذكرها وفى النهاية وصلت للطلاق

صديقتى دى مش قادرة تعيش حياتها طبيعية هيا أيوة بتشتغل وناجحة جدا فى عملها وبتشتغل فى مركز مرموق جدا ولكن حياتها الخاصة ضايعة جدا بسبب معاملة المجتمع وعدم فهمه بأن مطلقة دى مش عيب ولا حاجة غلط ومن ساعة طلاقها وأتعرضت لتجربتين جواز وفى المرتين كانت المشكلة أنها مطلقة وأن أسرة العريس وأسرتها مش قادرين يتفاهموا ولا يتفهموا الموقف وبالتالى ما تمتش ولا جوازة منهم فى حين أن طليقها أتجوز مرة تانية بنفس طريقة الخداع وطلق مراته التانية وفى طريقة للجواز من الثالثة وكلهم ماكانش سبق ليهم الجواز قبل كده

شفتوا مجتمعنا عامل أزاى يعنى الراجل يتجوز مليون مرة وعادى وبرافو عليه ومفيش مشكلة والست تفضل طول عمرها محرومة من الجواز وبأنها تعيش حياة طبيعية

قصة تانية لواحدة تربطنى بيها صلة قرابة بعيدة شوية ولكنى أعرفها والبنت دى أصغر منى بحوالى سنتين وأتجوزت وبعد الجواز نفس قصة المشاكل ووصلت للطلاق

قريبتى دى كانت مليانة نشاط وحيوية وعلى طول بتضحك وتهزر وأبتسامتها كانت على طول على وشها وعنيها كانت بتنطق من السعادة وحبها للناس والحياه شاء القدر أنها تتطلق وما شفتهاش الا بعد طلاقها بفترة طويلة جداااااااااااااااا ولكن حسيت أنى شفت واحدة تانية خالص واحدة مكسورة ومجروحة بشكل بشع واحدة صوتها ما بقاش بيطلع ما بقتش بتضحك من جواها مكسورة وموجوعة ومحدش حاسس بيها وكتير بتحاول ترسم بسمه على وشها ولكن الأسى والحزن واضحين قوى وعنيها دايما مليانة مليون دمعة ومليون سؤال للناس والمجتمع لية بتعاقبونا على حق ربنا أداه لينا حق شرعى لكل الناس ولكنكم بتحللوه للرجالة وتحرموه وتعتبروه جريمة على الستات

أنا مش عارفة أقول إيه تانى غير أننا فى مجتمع ظالم وقاسى بيحلل ويحرم بمزاجه

وهفضل أنادى بيها المطلقة أنسانة شريفة بلاش تعاملوها بأنها عكس كده علشان فيه واحد كان فى حياتها ولأنه كان جوزها مش واحد تعرفه من ورا الناس

المطلقة من حقها تعيش حياتها طبيعية وتخرج وتروح وتيجى وتشتغل وتتجوز من تانى بلاش تحرموا حاجات ربنا حللها لينا

وأرحموا المطلقات من نظرتكم دى وأعتقد لو كل واحد حط أخته ولا بنته فى الموقف ده لا يمكن هيقبل بكم المعاناه اللى بيشوفوه طول حياتهم

وعلشان كده أنا بضم صوتى لصوت ملايين المطلقات اللى المجتمع والناس بيعاقبوهم على جريمة مش هما السبب فيها

بقلم بسمه عبدالباسط

http://www.wostelbalad.com/index.php?option=com_content&view=article&id=576:2009-12-16-21-15-34&catid=46:2009-03-19-20-34-04&Itemid=73

أرجوكي ..كوني أم لي

بالأمس رن جرس التليفون ففتحت الاتصال لأجد على الطرف الأخر أحدى معارفي وبعد السؤال والاستفسار عنها وأخبار أولادها وزوجها أكدت لي أن حياتها كلها تمام ولايعكنن عليها حياتها غير حماتها ، فهي الوحيدة التي تمثل العقبة في حياتها

فزوجها والحمد لله يحبها وتحبه ورزقه وفير وما يعننا عليها حياتها التي تفترى عليها أشياء لااساس لها، علاوة على أنها كثيرة الكذب على الرغم من أنها حاجة لبيت الله ، أخذت نفس كبير وقلت لها يا حبيبتي استحمليها أكراما لزوجك وعلى قدر محبتك لزوجك استحمليها فإذا بها ترد عليا لولا خوفي من الله لدعيت عليها بالموت وأقسمت أنها ليست معها فقط لظنت أنها هي التي تغضبها ولكن مع زوجة ابنها الأخر ..

ولأني أعرف حماتها معرفة شخصية وأعرف أن صديقتي هذه لا تكذب لأنها إنسانة ملتزمة وتتقي الله لم أجادل معها كثيرا وطلبتها بأن تحتمل إلى أن يهدي الله النفوس ويهديها لها وأن تحبها مثل والدتها التي فقدتها منذ شبابها وأغلقت التليفون معها .

وانزويت أفكر بيني وبين نفسي هل لو كل حماة أخذت زوجة أبنها في مقام ابنتها أكيد ستجد من يخدمها بعينه ويتمنى لها طول العمر ولا يتمني لها أن يقصر الله عمرها وبعد الوفاة ستدعو لها وربما تتذكرها أكثر من أبنائها ، ماذا لو ركزت الحماة على سعادة أبنها بأن تحسن معاملة زوجته بدلا من تركيزها على أن تكون " فاطمة تعلبة " تلك التي تريد أن تسيطر على الجميع وأن تكون بمثابة الرجل والسيدة في في نفس الوقت والأمر والناهي الذي لاترد له كلمة لاغية شخصية أبنائها ومن ثم يطلق على أبنائها أنهم أولاد أمهاتهم وأنهم معدومي الشخصية .

وحتى يكون الأمر حيادي فأن لزوجة الابن دور أيضا لكسب حماتها بأن تأخذ نية رضاء زوجها من خلال حسن معاملة والدته التي لولا هي ما كان وأن تراعي كبر سنها وأنها تحتاجهم من حولها وأن تجعلها بمثابة أمها التي لاتغضب من تصرفاتها مهما فعلت بها ، أعتقد أن لو فعلت كل زوجة أبن كل هذه الأمور ستكسب زوجها وأمه ويرضى الله عنها ويرضى عنها زوجها .
وفي النهاية همسة في أذن كل زوج .. عزيزي الزوج كن حكيما ومرن واجعل الحق دائما سيد الموقف فلا تأتي على حساب زوجتك فتخسرها ولا على حساب أمك فتكسرها ..كن ماسك العصا من الوسط حتى لاتكسر

بقلم بدرية طه

آحلام فتاة شرقية

دائما وكثيرا ما تتهم الفتيات بأشياء كثيرة خاطئة منها أنها (دلوعة) وغير متحملة للمسئولية وكثيرة الطلبات وتبذير النقود على أى شىء وكل شىء وبأنها نكدية وكثيرة المشاكل وتغالى فى طلباتها دائما وبأنها تنظر لفلانة وفلانة وتريد أن تفعل كل شىء مثلهم والكثير والكثير من الأشياء التى يصف بها المجتمع الفتيات ويظلم بها كل الفتيات وأنا لا أنكر أنه توجد فتيات نكدية وآخريات مبذرات الى أخره من الأشياء الغير محببة ولكن على النقيض توجد فتيات آخرى مثالية فى كل شىء
ولكن لا يراهم أحد ولا يهتم بهم وفى الغالب يجرحهم القريب والغريب ولا يقدر أحد شعورهم
رسالتى هذه قد تكون الأولى ولكنها ليست الأخيرة والرسالة ليست لطرف واحد من الأطراف الا وهو الرجل ولكنها لكل المجتمع بكل ما فيه من سيدات ورجال شباب وبنات
وللعلم هذه ليست رسالتى أنا فقط ولكنها رسالة فتيات كثيرات تعيش معنا وحولنا فى هذا المجتمع ولكن دعونى أتكلم بصيغة الأنا لعلى أستطيع الأفصاح عن مكنون صدرى أنا والآخريات

أول حلم أن أحيا وسط مجتمع يفهمنى ويقدرنى
يفهم مشاعرى ويشاركنى فيها ينصحنى ويوجهنى لا يوبخنى ويتركنى لمصير لا أعلم له نهاية
يقدر آحلامى وطموحى وكل ما أريد فعله طالما ما أفعله لا يتعارض مع العادات والتقاليد ولا الأخلاق ولا تعاليم الدين ولا مع كونى فتاه تعرف دورها وواجباتها كلها وتريد أن تحصل على حقوقها
يساعدنى على الحياه بصورة طبيعية بدون القيل والقال والأهتمام بكلمات الناس التى لا تنتهى ولا تقدم ولا تؤخر
ينظر لى نظرة فخر وأعتزاز وليس نظرة خوف وخزى كأن الفتاه عار فى هذا المجتمع
يحترمنى كأنسان مثل أى أنسان موجود ولا يتعامل معى كقطعة أثاث أو شىء ليس له قيمة أو رأى
يسمعنى ويتناقش ويتحاور معى لأنى أنسان له عقل وفكر لا مجرد أله تستقبل الأوامر والنواهى بدون نقاش
يتعامل معى كأنسان مثلى مثله وليس جسد يختلس الجميع النظر له بسبب وبدون سبب
يقدر مشاعرى الرقيقة والحساسة لأن أى بنت بطبيعتها تكون مشاعرها رقيقة جدا ومن السهل خدشها وإيذائها

هل أنتهت آحلامى وآحلام الكثير من الفتيات بالطبع لا
أنتظروا معى باقى الآحلام

بقلم بسمه عبدالباسط

أنا مش صورة

أنا مش مجرد صورة تفرج صحابك وأهلك عليها عايز واحدة مثقفة وليها شخصية وفكر وكرامة علشان تكون صورة توريها للناس ولكن بينها وبينك وبينها وبين أهلك عايز تلغى كل ده وتعاملها كأنها جارية وإنسانة بدون كرامة وتهينها وتعاملها اسوأ معاملة
طبعا بداية غريبة وعجيبة ومحدش متوقعها ولكن الحقيقة أنها مشكلة كبيرة بقت بتواجه بنات كتير
وبتكون البداية لما يفكر أى شاب فى الأرتباط ويبقى عايز واحد جميلة ومثقفة وطموحة وليها شخصية وفكر وليها عمل أو شىء بارز وواضح فى المجتمع وليها وضعها فيه ويكون فيها صفات كتيرة كويسة أى حد بيتمناها
وطبعا كل ده مفيش فيه أى مشكلة ولكن المشكلة أن شوية وبيحصل المفاجأة أنه كان عايز كل ده علشان يتمنظر بيه قدام صحابه وأهله ويقول ليهم أن خطبت ولا أتجوزت فلانة من العيلة الفلانية وفيها كذا وكذا وكذا ولكن بينه وبينها بيبقى عايز يمحى شخصيتها وحياتها كلها ويعاملها مش كجارية لا ده بيعاملها كخادمة عنده هو وأهله والمفروض عليها أنها تمشى على حسب هواهم كلهم وتطيع أوامرهم مش بس أوامره هو لا ده أوامر أخواته وكل أهله
هحكيلكم حكاية واقعية وحصلت من مده مش بعيدة قوى لبنت من عيلة كويسة والبنت مؤدبة ومحترمة وفيها صفات كويسة جدا وكمان مثقفة وطموحة وبتشتغل فى مجال بيخليها نوعا ما معروفة فى المجتمع ومحبوبة جدا من كل الناس وناجحة جدا فى حياتها وشغلها
حصل وأتقدم ليها ناس كتيرة ومن بين الناس دى شاب أول ما أتقدم ليها كان فرحان جدا بيها وبثقافتها وطموحها وكل حاجة فيها وكان بيشجعها كمان على الأستمرار فى اللى بتعمله حتى بعد الجواز ماكاناش هيخليها تسيب شغلها ولا طموحها وهيا كمان شافت فيه اللى كانت بتتمناه أو هو وهمها وضحك عليها وظهر بمظهر غير حقيقتة وخلاها تحس بأن هو فارس آحلامها واللى بتتمناه وفضل كويس معاها فترة بعد الخطوبة هو وأهله وهيا كمان وقفت جمبه وأتنازلت وضحت بحاجات كتيرة قوى مقابل أنهم يبقوا مع بعض والجوازة تكمل لأن كان يهمها أنه راجل وهيعرف يحافظ عليها وشوية وبدأت كل حاجة تتغير وفى النهاية وبعد حاجات كتير حصلت معاها ومع أهلها من الشاب ده ومن أهله أتضح أنه كان عايز واحدة بكل المواصفات دى لسبب واحد بس وهو أنه يتمنظر بيها قدام الناس زى اللى أشترى تحفة حلوة قوى وعمال يوريها للناس ونفس الشىء بالنسبة لأهله ولكن كان بيتعمد هو وأهله يهينوها ويتدخلوا فى حياتها بصورة مش طبيعية ويحاولوا يلغوا شخصيتها وفكرها كأنها لعبه هيحطوها مكان ما يحبوا ومفيش حاجة بقى أسمها أنها تقول رأيها فى حاجة سواء كانت خاصة بيها ولا لا كل حاجة ممنوعة أنها تتكلم ولا تقول هو بس اللى يقول من غير حتى ما ياخد رأيها وأهله هما كمان اللى يقولوا ورأيهم يمشى عليها وهيا برضة من غير رأى
كان عايزاها تبقى جارية وبس عنده وعند أهله وبدأت الأهانات والمشاكل والسخرية منها ومن عملها وهواياتها وطموحها وكل حاجة بتعملها لحد ما أنتهت الخطوبة ودى كانت قصة واقعية مش فيلم ولا أنا أخترعتها والقصة دى بالمناسبة حصلت مع أختلاف الأشخاص والأماكن مع بنات كتيرة ومازالت بتحصل
وفيه شباب كتير فعلا بيتعاملوا مع البنات على أنهم صورة وبس وينسوا أنها بنى أدم زيهم ومن أبسط حقوقها أنها حتى تقول رأيها فى أى شىء يخصها ويخص حياتها هيا والأنسان الى هتعيش معاه فى بيت واحد وأن محدش يسخر منها ولا من عملها ولا هواياتها ولا طموحها
كل واحدة عايزة اللى يقدرها ويحترمها ويعاملها كأنسانة مش كصورة ولا تحفة جميلة قدامه

----------------------------------------

بقلم بسمه عبدالباسط

سنجل وأفتخر

يمكن اللى هقوله كلام أتقال كتير قبل كده وهيبقى كلام متعاد ولكن كل مرة بحاول أكتب فيها موضوع خاص بالبنات بحاول أكتبه بصيغة الجمع يعنى بتكلم عن كل البنات مش عنى أنا
ولكن المرة دى حسيت أنى عايزة أتكلم عنى ويمكن لما هقول اللى جوايا واللى حاسة بيه الموضوع هيوصل أكتر
فى مجتمعنا دايما بتلاقى البنت فى كل مرحلة من عمرها ليها مسمى ولكن فيه مسمى بيبقى جارح قوى وبيسيب علامة مش كويسة جوه أى بنت وهو عاااااااااااااااااااااااااانس
يمكن أنا عن نفسى مش مقتنعة بالموضوع ده ومش فارقة معايا أى سن ولا شايفة أن الجواز والأرتباط لازم يكونوا فى سن معين وبعد كده نبدأ نتهم البنت ونرمى عليها كلام وشوية ونقول خلاص القطر فاتها بقى ومحدش يفكر يقرب لها ولأن ديننا كمان محددش سن للجواز وقال أن بعد كده خلاص ما ينفعش ولكن مجتمعنا هو اللى عمل كده
ولأن الحكاية مش حكاية جواز وخلاص ما هو فيه ملايين الناس متجوزة ولكن هل هما عايشين صح ؟ هل هما مبسوطين ؟ هل هما حاسين بأى حاجة حلوة فى الدنيا ؟ ولا كل يوم يلعنوا فى الجواز وسنينه
مش قادرة أقول لكم كم الأذى اللى بحس بيه لما بحس أن حد بيعتبرنى خلاص القطر فاتنى وعليا أنى أقبل بقى بأى حد وخلاص والا ما ألومش الا نفسى
ويمكن أنا فى المكان اللى عايشة فيه الموضوع مش كبير قوى أو مش كل الناس شايفين كده ولكن لأنى من بلد ريفى فالموضوع بقى واخد شكل تانى ويمكن مش بالنسبة لكل الناس ولكن الأغلب عندهم أن البنت لما توصل ل 20 سنه من غير أرتباط تبقى دخلت فى سن الخطر وأول ما تخلص جامعة عند سن 21 تقريبا ومفيش حاجة بقى يبدأ الكلام والهمس ويا سلااااااااااااااااااام بقى لما توصل لسن 25 ولسة مفيش خطوبة ولا جواز كده تبقى كارثة بكل المقاييس
ولأنى خلاص عديت ال 25 سنه فالموضوع بقى واخد خط مش لطيف أبدا مع ناس كتيرة ويمكن بتحط فى مواقف تخلى الحجر ينطق وخاصة فى الأفراح اللى أنا بصمم أحضرها زى أى بنى أدم طبيعى ولأن مفيش فيا حاجة تخلينى أهرب من الناس ولكن للأسف الناس هيا اللى مريضة بمرض أسمه الجواز والعنوسة وخلافه
ويمكن قبل كده كانت كلمة عقبالك بتتقال ليا عادى مع أبتسامة أو ضحكة أو هزار من أى حد ولكن دلوقتى الوضع أختلف تماما بقيت بسمع كلمة عقبالك بنظرة كلها حزن ويأس وحسرة عليا وعلى عمرى
بالأضافة الى كم الدعوات اللى بسمعها بودنى وببقى نفسى فى اللحظة دى أفقد سمعى علشان ما يحصلش ليا حاجة من الكلام ده
عارفين كده لما واحد يبقى بيشحت ومصمم أنك تديلة حاجة ويفضل يدعيلك بطريقة مستفزة جداااااااااااااااااا
هو ده بالظبط اللى بقى بيحصل دعوات بأن ربنا يكرمنى وياريت الكلمة تتقال مرة واحدة لا دى بتتقال مليون مرة مع طبطبة على الكتف وشوية وهياخدونى فى حضنهم ويعيطوا ويكون نفسهم أعيط معاهم علشان الدعوة تجيب أثر
وطبعا أنا فى المواقف دى بتجيلى حالة هستيرية من الضحك وبتبدأ بأبتسامة بلهاء ورد بأن اللى ربنا عايزة هيكون وبأن محدش هيموت من عدم الجواز وبأنى مش مستعجلة ولا عايزة أسيب أهلى ولا أهلى أشتكوا منى ولأن الموقف ده فعلا بيبقى مهين وجارح جدا ومش أى حد هيحس بيه الا بنت وتكون مرت بواحد زيه
تخيلى نفسك كده رايحة مثلا خطوبة بنت عمك وهيا أصغر منك بحوالى خمس سنين وانتى مبسوطة ليها جدااااااااااااااااااااااا وعايزة تطيرى من الفرحة ليها وفجأة أول ما توصلى وتسلمى عليها وتاخديها فى حضنك وتباركى ليها وتبدأى فى السلام على باقى الناس تحسى أنك واقفة فى جامع والكل عمال يدعى ليكى بطريقة مستفزة وياريت الكلمة تتقال مرة واحدة لا لا أزاى لازم تتقال مليون مرة وكل شوية تلاقى حد جاى وراكى ويكمل دعاء ويملس عليكى قال يعنى علشان الدعاء يبقى صح ويتحقق وكمان شوية وتحسى أنهم هيشحتوا عليكى عريس
ولا لما تحسى أن الناس خايفة أنك تحسدى قرايبك البنات اللى أصغر منك وأتخطبوا أو أتجوزوا وبيبصوا ليكى بصات مش كويسة ومعناها أنهم خايفين من عينك ومن حسدك
فعلا هو أحساس وشعور بشع وموقف سخيف وبايخ جدااااااااااا وبيجرح بنات كتير قوووووووووووى وبيعلم جواهم
ولكن أحسن حاجة أن كل واحدة تبقى واثقة فى نفسها جدا وما تحاولش تتأثر بالكلام ده بالعكس ده تحاول تبقى طبيعية جدا وعادية مع الناس وترد عليهم بكلام يخليهم يكسفوا من نفسهم ومن أفكارهم الغريبة دى
وتعيشى حياتك عادى جدا وما تقبليش بأى واحد علشان تخلصى من كلام الناس لا طبعا ده غلط ولأنه ممكن يؤدى لمشاكل ولا قدر الله لطلاق بعد كده يبقى إيه الأحسن جوازة فاشلة ولا طلاق ولا تبقى عانس زى ما الناس عايزة
أنا عن نفسى هفضل سنجل وعااااااااااااااااانس زى ما الناس عايزة لحد ما ألاقى اللى أنا عايزاه وغير كده يبقى بيت أهلى أولى بيا وحياتى ومستقبلى أهم لأن الموضوع مش جواز وخلاص ولا بيعه وشروه وصفقة هنعملها ده عمر وحياه وحاجات كتيرة مهمة لازم تبقى موجودة
مش عارفة لية حاسة أن عمرى ما هعيش لليوم اللى هشوف التفكير ده أتغير ناحية البنت وحتى لو ما أتغيرش وأنا لسة عايشة بتمنى يجى يوم ويتغير وبيتهيألى التغيير هيجى مننا أحنا يعنى أحنا دلوقتى سواء كنا بنات ولا ولاد أكيد فاهمين الكلام ده وبقينا شايفين أنه فيه موروثات وتقاليد غلط جدا وطالما عارفين كده يبقى نبدأ نغيرها ونعمل الصح
بالأضافة الى أننا نعلم ولادنا الصح ونغرس جواهم المفاهيم الصح مش الموروثات الغلط اللى عمالة تدمر فينا

وعلشان كده أنا برجح أفضل سنجل وبناشد كل البنات تفضل سنجل لحد ما يلاقوا نصهم التانى بس يلاقوه صح مش أى كلااااااااااااام

كونى أنثى بجد

الأنثى مش مجرد كلمة ولا حاجة ممكن تتعمل علشان نقول على أى واحدة أنها أنثى
الأنثى مش بس شوية لبس مع تسريحة شعر وشوية مكياج وعطر فاخر
الأنثى مش بس جسم حلو لأنه ياما أجسام حلوة ولكن أول ما تقرب منها تعرف أنها ما ترتبطش بالأنوثة ولا ليها صلة بيها
الأنثى مش بس رقة فى الصوت وكلام حلو يتقال ولا شوية خجل وأحمرار فى الوش
الأنثى مش شكل بس لا ده شكل وطباع وشخصية وروح وكيان كامل
الأنثى كيان بحاله وموهبه وكل واحدة بتتولد وجواها أنوثة وهيا اللى بإيديها تكبرها أو تقضى عليها
الأنثى هيا اللى تجذب ليها أى حد ومش لازم تكون ملكة جمال لا ابدا الشكل مش مقياس لأنك تكونى أنثى ولأنك ممكن تجملى نفسك بحاجات كتيرة قوى
ولكن الأنثى هيا اللى لما تشوفها تحس بشىء بيجذبك ليها وبأنها مش سهل أبدا حد يجذبها ليه وبيبقى صعب على أى واحد يوصل لها
الأنثى هيا اللى فيها خجل وحياء مابقوش موجودين فى كتير من البنات
الأنثى هيا اللى تصنع عالمها بنفسها وتكون هيا الملكة المتوجه فيه
الأنثى هيا اللى تقدر توفق بين كونها أنثى وامرأة عايشة حياتها صح وناجحة فى دراستها وعملها
وطموحها عملها ما يجوش أبدا على حساب أنوثتها
الأنثى هيا اللى تحسس الواحد أنه معاه كل ستات الدنيا وفيها كل شىء بيتمناه
الأنثى حياه كاملة تقدرى لوحدك تصنيعها وتعيشى فيها
الأنثى الصح هيا اللى تقدر تكون أحلى واحدة فى الدنيا وفى نفس الوقت محدش يقدر يتجرأ ويبص ليها بصة وحشة
الأنثى الصح هيا اللى تبقى كل ده من غير ما أنوثتها تتعارض مع حياتها وطموحها وعملها ولا العكس
ياريت كل واحدة تبقى أنثى بجد

بقلم بسمه عبدالباسط

جواز صالونات ولا فرجة على البنات الجزء الثانى

أتكلمت فى الموضوع اللى فات عن عيوب جواز الصالونات من وجهه نظر البنات وإيه اللى المفروض يحصل علشان ما تحصلش مشاكل ويكون الموضوع كويس وما يسببش حرج ولا جرح لأى بنت

ولكن دلوقتى هتكلم فى نقطة تانية وهيا تبرير الشباب للتصرفات دى اللى بقت بتزيد يوم ورا التانى
ومع زيادة تأخر سن الجواز بالنسبة للطرفين ده خلى كل طرف يقبل بأى حاجة وأى مواصفات بدون النظر لحاجات كتيرة زى العقلية الشخصية وحاجات تانية لأنه عايز يتجوز وخلاص

وزى ما سمعت من واحد تبريره لتصرفات الشباب فى جواز الصالونات وأنهم بيكونوا جايين يتفرجوا على البنت وبيختاروا البنت الجميلة أو اللى شكلها تعجبهم بغض النظر عن عقلها فكرها شخصيتها طموحها أى حاجة لأن الشباب بقوا عايزين يتجوزوا وخلاص نسبه للظروف اللى بيعيشوها وعدم مقدرتهم على الجواز وهما سنهم صغير وبيكون عندهم طبعا كبت وده بيخليهم مع أول فرصة وبعد ما بيكونوا خلاص كبروا أو لسة حتى ما كبروش قوى يختاروا الواحدة على أساس شكلها علشان يتجوز وخلاص علشان يحمى نفسه من حاجات كتيرة

ولكن من وجهه نظرى أنا مش شايفاه حل أنا شايفاه بداية لمشكلة كبيرة جدا هو طبعا مفيش مشكلة أن الواحد عايز واحدة شكلها كويس ولكن ما يكونش هو ده كل مواصفاته بغض النظر عن أى حاجة وكل حاجة لأن بكل بساطة الشكل ده أنت هتزهق منه وهيروح فى يوم من الأيام ولكن الروح والعقل والشخصية هما اللى باقيين
تعمل إيه مثلا لو أتجوزت واحدة جميلة جدا وفرحت بيها كام يوم وبعد ما خلاص بقت فى نظرك واحدة عادية حبيت فى يوم تكلمها أو تناقشها فى حاجة ولاقيت أن عقلها فاضى خاااااالص ومرة مع التانية أكتشفت أنك عايش مع تمثال هو حلو أه وبيهبر كل اللى يشوفه ولكن ما بينطقش ما بيتكلمش ما عندوش عقل ولا روح
وفى النهاية نوصل لمشاكل لا حصر لها وبيدفع ثمنها بعد كده الأبناء لما يلاقوا أب وأم مش متوافقين ولا منسجمين وكل واحد منهم عايش فى حاله وله حياته الخاصة والمستقلة وممكن يوصل للطلاق يعنى فى كل الحالات بيكون فيه مشاكل

يبقى الأحسن إيه بدل ما تتجوز أى جوازة تختار صح ماشى عايز واحدة جميلة مفيش مشكلة ولكن لازم يكون فيه مقاييس تانية مع الجمال مع مراعاه كل اللى أنا قلته فى الأول فى الزيارات واللى بيحصل فيها وأعتقد مش هيحصل حاجة لما تتأنى وتتجوز جوازة كويسة بدل ما تشوف واحدة حلوة وخلاص وتتجوز جوازة تندم عليها طول عمرك

وبتمنى فعلا يرجع جواز الصالونات زى زمااااااااااان ويرجع الأحترام للناس وللبيوت اللى الناس بتدخلها وده هيقلل الخلافات والمشاكل وحالات الطلاق اللى زادت بشكل مش طبيعى الفترة الأخيرة

بقلم بسمه عبدالباسط

دكر بط

الصبح خارجة من البيت وحالتي المزاجية ميت فل وعشرتاشر وده بفضل كوب اليانسون الي الحاجة شربتهولي بالعسل الابيض الي شربته اجباري بعد جولة من الجري وريا في الشقة " بدل مج الشاي عااااااا" مع دعوتين حلوين وماشية وانا مفرفشة كده ومتسلطنة وايه كاني فراشة بتطير في السماء ده لاني قريبة من السما بحكم طولي يعني.

قم ايه ركبت الميكروباص ، وانا مزئططة كده وفريش خالص ، لكن منه لله "دكر البط" الي نرفزني وخلى الدم يطلع لنفوخي وكنت هيجري لي حاجة ... هقولكم اهو مين "دكر البط" ده .. وانا راكبة الميكروباص وبعد يجي ساعة كده وربنا اكرمنا والميكروباص خلص تحميل وده لان النهاردة اجازة رسمية بمناسبة ذكرى التاسع من اكتوبر ...الا والاقي صوت طفل بيعيط ابص يمين وابص شمال اشوف الصوت ده جاي منين مش شايفة حاجة ..قلت بيني بهلوس ياولاد وده نتيجة لاني مبطلة الشاي يجي من عشر ساعات كده ... بس لاقيت الصوت علي تاني ... ابص مش لاقيا حاجة ...قلت بس انتي محيرة نفسك ليه يابيبو دي تلاقيها رنة جديدة للموبيل بس انتي مش واخدة بالك لان موبيلك ماركة " الي فات قاديمه مات"

المهم ماعلينا وصلنا ونزلنا من الميكروباص وانا نازلة لقيت الصوت تاني بصيت والحمد لله لاقيت المصدر اتاريه كان طالع من جنب عمو الي كان قاعد قدامي وانا فاكره انه هو الي قاعد لو حده في الكرسي ومستغربة قاعد ليه على الكرسي الي بيقعد عليه اتنين بس اتاري كانت مراته قاعدة جنب دراعه وشايلة الولد وانا نظري ضعيف ومش واخدة بالي منهم وده لان عمو ماشاااااااااااااء الله فور باي فور

المهم عمو مشي قدامي هو و طنط مراته .. وعمو بسم الله ماشاء الله عليه ...حاطط ايده الاتنين في جيوبه وابص على طنط مراته الاقيها شايلة شنطة البيبي في ايد وشنط هدوم البيبي في الايد التانية والولد بيعط ..بعيد عنكم انا شفت المنظر ولاقيت وشي احمر والدم نطر في عروقي وضرب في راسي واتجننت ..ولاقتني ماشية بكلم نفسي هو ياربي البعيد باااااااارد ولا ماله شايف مراته شايلة الولد وشايلة الشنطة وسامع بكاء ابنه مش شيله عنها شنطة علشان تعرف تشوف الولد ماله بيعيط ليه بدل ماهو عامل زي " دكر البط" الي ريشه منفوش والا البعيد ماله ياربي مبيحسش.. المهم انا بصيت ليهم مرتين والولد بيعيط وهما ماشيين ورايا ان البعيد يفهم ابدا انه يحس ابدا

المهم دخلت ركبت المترو وانا قاعدة دماغي هينفجر وبسال نفسي ...هي الرجوله راحت فين ...اختفت ولا ايه ولا الراجل بيكون في مواقف معينة راجل " وقت ما بحيب يكون راجل" وموافق تانية لا ...وازاي البعيد يوافق انه مراته تمشي شايلة ده كله وهو ماشي كده هي الجارية الي والده ووالدته اشترالهالوه ولاايه.. وانا سالت نفسي وقلت اكيد هو برضه طلع لاقى والده بيعامل والدته كده علشان كده ده مش غريب عليه بس برضه ده مش يشفع ليه ...وبعدين فكرت وقلت ماهو لو فاهم الاسلام صح وازاي كان الرسول الكريم بيعامل زوجاته كان عرف ان الاسلام والدين مش صلاة وصوم وبس ده نظام حياة ومن نظام الحياة اننا نعامل زوجاتنا بالحسنى ..الي رسولنا الكريم كان بيعامل بيها زوجاته لدرجة انه كان بيامر الي بيسوق الجمال يسوقها بهدوء اما يكون نسائه في الهودج ... الموقف بجد غظني يمكن لاني الحمد لله اتربيت على التعاون وشفت ناس قريبة جدا مني بيعاملوه زوجاتهم باسلوب كويس وحطنهم في عنيهم الموقف نرفزني ... بس بجد ياريت الرجالة يكونوا رجالة بجد مش " دكر بط " والسلام ... والي بقى ماشاء الله منتشرين قوووووووووووووووي اليومين دول

بقلم بدرية طه

جواز صالونات ولا فرجة على البنات الجزء الأول

طبعا كلنا عارفين جواز الصالونات وأزاى بيتم وبيحصل فيه إيه ولكن زمان كان الجواز ده هو الطريق الوحيد للجواز غالبا وكان دايما بيتم وبينتج عنه زيجات كويسة قوى وده نسبة لأن الناس كانت بتحترم بعضها وبتحترم الأسر اللى بتدخل بيوتها حتى لو الجواز ما تمش ولكن حاليا الوضع أختلف تماما وبقى لجواز الصالونات عيوب كتيرة جداااااااااا

أولها أن الموضوع بقى عامل زى الفرجة أو الفسحة كده وكل واحد واخد معاه قبيلة بحالها ورايحين بيت العروسة كأنهم بالظبط رايحين رحلة أو رايحين مول يشتروا منه حاجات وتلاقى الكل بما فيهم العريس طبعا من أول ما يشوفوا العروسة وهما نازلين تقليب فيها كأنها بضاعة بالظبط أكيد لازم الأتنين يشوفوا بعض كويس ولكن بالأصول مش بالطريقة دى

وبعدين شوية والناس يسيبوا الأتنين يتكلموا شوية وساعتها بقى نلاقى العريس حط رجل على رجل وبدأ يتكلم مع البنت كأنه باشا ومفيش زيه والمفروض أنها تبقى قاعدة فى قمه سعادتها لأنه أتكرم وراح بيتهم يشوفها

ويبدأ فى الأسئلة بقى واللى غالبا بيسألها عن تاريخها من يوم ما أتولدت لأنه أصلا ما بيكونش عارف عنها حاجة ولا بيسأل حتى هيا درست إيه ولا أشتغلت إيه ولكن كل الموضوع أنه بيقول لأهله عايز واحدة جميلة ومن عيلة كويسة وبيبقى كل التركيز فى أول زيارة أنه يشوف شكلها عجبه يبدأ بقى فى فتح المحضر ما عجبوش يقصر فى الزيارة ويمشى

ويبدأ المحضر بدرستى إيه وبتشتغلى إيه وهواياتك إيه وبتعملى إيه فى يومك طيب وبتعملى إيه فى شغلك وبتكلمى مين وناوية تعملى إيه بعد كده وغيرها من الأسئلة الكتيرة وبيكون ناقص ياخد ليها فيش وتشبيه وممكن بعد كل ده يسخر من شغلها وطموحها وهواياتها

ولما هيا بتسأله نفس الأسئلة ما بيقولش كلمتين على بعض لأنه مش عايز يتكلم عن نفسه أصلا هو عايز يفتح المحضر معاها ولما يبقى يتكرم ويوافق عليها يبقى يعرفها بقى على نفسه

هو طبعا مش غلط أنه يسألها الأسئلة دى ولكن المفروض هو كمان يعرفها الحاجات دى عنه ولكن اللى بيحصل أنه بيبقى مش عايز يقول شىء عنه لحد ما يشوف هيعمل إيه وفى نفس الوقت عايز يعرف كل حاجة عن العروسة بالأضافة الى سخرية البعض من دراسة أو طموح أو شغل البنت ومن كلامهم الغريب اللى بيتقال فى أول زيارة واللى المفروض أنها للتعارف مش أكتر ولكن الغلطة اللى بيقع فيها عرسان كتير أنهم بيبدأوا يدوا أوامر ونواهى للبنت مع أنه لسة مفيش شىء بينهم ولأن التعارف ممكن يمتد لأكتر من زيارة وما ينفعش من أول مرة تبدأ الأوامر والنواهى لأن البنت لسة ما قالتش رأيها لا هيا ولا أهلها ولا هو كمان حدد موقفه

وأكيد المفروض يكون فيه صراحة ووضوح من الأول ولكن الأوامر والنواهى والطلبات دى تبدأ لما خلاص هو أستريح لها وهيا كمان ووافقوا على بعض يقول لها بقى بيحب إيه بيكره إيه عايزاها تعمل إيه وما تعملش إيه ولكن مش مقبول ابدا أن أتنين يكونوا لسة بيعرفوا بعض وتبدأ الأوامر والنواهى

حاجة كمان سخيفة جدا وهيا أن واحد يبعت والدته أو أخواته البنات أو أى واحدة يعرفها علشان تشوف العروسة كأنها هيا اللى هتتجوزها وبيبقى فعلا موقف سخيف جدا جدا ولأن الواحدة مش زى الواحد واللى بتعمله فى الزيارة دى مع العروسة بيكون فوق الوصف ومحدش يقدر يحس بيه أبدا غير البنت اللى مرت بالموقف ده وفعلا بيكون موقف مهين جدا ووارد جدا أن البنت تعجب مثلا والدة العريس أو أخته وما تعجبش العريس نفسه أو العكس

وساعات كتير قوى بنشوف جوازات بتبقى الأم أو أخت العريس مش عاجبها العروسة ولكنها عاجبه العريس

ياريت فعلا الموضوع ده ينتهى بلاش التصرفات المهينة دى للبنات

اللى المفروض يحصل أن الواحد يروح بنفسه ومن المستحب كمان ما ياخدش معاه عيلة بحالها يعنى أخرها مثلا والدته أو أخته أو أى حد كان طرف فى التعارف أو ممكن يروح لوحده علشان يقدر يتعرف بحرية على أهل البنت ويكون فيه فرصة ووقت يتكلم مع البنت بدون ما يكون فيه دوشة وناس ضاغطه عليهم وعلى أعصابهم

وياريت كمان بلاش حركات الثقة فى النفس الزيادة قوى دى اللى بتبقى فى أى واحد لأنها ساعات بتبان غرور وتكبر وبلاش حكاية أنك تحسس اللى قدامك بأنك عريس لقطة ومفيش زيك وأنها هتخسر فرصة عمرها لو رفضتك

ياريت تتعاملوا مع البنات بطريقة أحسن من كده وياريت يرجع الأحترام للناس وللعائلات زى زمان وبلاش حركات الأيام دى لأنها فعلا مهينة جدا لأى بنت

وأنا مش معترضة أبدا على جواز الصالونات ولأنه كان أنجح جواز أيام زمان وكانت هيا الطريقة الوحيدة أصلا للجواز ولكنى معترضة على اللى بقى بيحصل الأيام دى واللى قلبة من جواز صالونات الى فرجة على البنات

بقلم بسمه عبدالباسط

أحنا مش كمالة عدد

أحنا مش كمالة عدد

لـ بسمه عبدالباسط



كتير قوى وغالبا بتتعرض البنت لأنتقادات وهجوم من كل اللى حواليها لمجرد أنها عايزة تعمل حاجة لمجرد أنها عايزة تثبت نفسها وعايزة تعمل ليها كيان
غالبا بتتعرض البنت لأنتقادات وهجوم لمجرد أنها بنت وعلشان بنت ما يصحش تعمل كده حتى لو كان كده ده حاجة كويسة ومفيدة ومهمة ولكن علشان هيا بنت لازم تسكت وتفضل قاعدة حاطة أيدها على خدها مستنية عريس العدل اللى يجى ويشيل الشيلة ويكمل تحكمات وكبت ليها ولشخصيتها ويكمل تحكم وهجوم ونقد ليها لكونها الست وهو الراجل
وكتير قوى بتكون الأم اللى هيا ست وكانت فى يوم من الأيام بنت وليها آحلام وطموح وحاجات نفسها تحققها السبب فى الهجوم والأنتقادات اللى بتتوجه للبنت لأنها بتكون أول واحدة تحاول تكبت طموح وآحلام بنتها وبتساعد للأسف باقى الناس على كده بداية من والدها وأخواتها نهاية للراجل اللى هتتجوزة
بجد بيصعب عليا قوى أشوف مشاكل كتيرة بتمر بيها البنات سببها ستات وغالبا بيكونوا أمهات
وكتير بنشوف آحلام وطموح بيتكسر ويتهد علشان أنتى بنت ولأنك بنت مش لازم تعملى كده ولا تحلمى ولا يكون ليكى طموح
ولكنى عايزة أقول أننا مش كمالة عدد مش مخلوقين علشان نفضل قاعدين ساكتين ونكتم آحلامنا وطموحنا اللى لو سبتونا نعمله ممكن يجيب نتايج حلوة قوى وأنتوا أول ناس هتفرحوا بيها
بقولها بصوت عالى أنا مش كمالة عدد ومش لازم تكون أى بنت كمالة عدد ولازم تحاول وتحاول تحقق آحلامها وطموحها مهما كلفها ده
وياريت كل واحدة تردد الكلمة دى بعلو صوتها وتقول أنا مش كمالة عدد وما تسيبش حد يسرق حياتها وطموحها
فى النهاية أحنا مش كمالة عدد

موضوع من مواضيع الجزء الأول من كتاب البنات عايزة إيه

عن القهر أتحدث

قدرنا أن نخلق بنات فى مجتمعات تتبع القهر أسلوبا فى حياتها فمنذ ولادة البنت ويكون القهر رفيقا لها فى حياتها حتى مماتها
فالقهر لا يعرف الفرق بين أسرة غنية أو فقيرة ، بين أسرة مستواها الأجتماعى عالى أو لا ، بين أسرة مثقفة أو لا ولكن القهر أسلوب حياه وتفكير وثقافة مجتمعات للأسف
منهج يتبعه الكبير والصغير وتتبعه أيضا النساء على بناتها وأى بنات تكون تحت سلطتها مع أن هؤلاء السيدات من الممكن أن يكونوا ذاقوا القهر كثيرا فى حياتهم ولكنهم لا يتعلموا أبدا مما حدث
فالقهر غير قاصر على الرجال ولكن على الرجال والنساء فكلهم يمارسون القهر على البنت أيا كانت صلتها بهم
بداية من أختيار دراستها وطريقة كلامها وأسلوبها فى الحياة وصولا الى أختيار عملها والتحكم فى طموحها وآحلامها وأخيرا التحكم فى أختيار شريك حياتها
ومع أنه يوجد فتيات أخذت حقها فى أختيار كل شىء يخصها بدون تدخل من أى شخص طالما ما تفعله صحيح وغير متعارض مع العادات والتقاليد ولا مع تعاليم ديننا نجد أيضا بنات تموت من القهر والظلم وعدم قدرتها على أختيار أبسط الأشياء فى حياتها

فهذه فتاه تجبر على دراسة شىء لا تحبه ويجبرها أهلها على الدخول الى القسم الأدبى فى الثانوية العامة مع أن ميولها علمية وهذا لأنهم يرون أنه لا فائدة من دخولها القسم العلمى فماذا سوف تفعل حتى لو حصلت على أعلى الدرجات فهى بنت ونهايتها بيت زوجها !! ؟

وآخرى تجبر على الدخول الى كلية لا تحبها ولا تريدها لأن رأى الآخرين أن باقى الكليات من تخصص الرجال وأنها لا تستطيع أن تدرس أو تتعلم هذه الأشياء !!؟

وآخرى تجبر على الجلوس فى المنزل بعد أنتهاء دراستها لأنها هكذا عملت ما يجب عليها عمله وعليها انتظار الزوج المنتظر !!؟

وآخرى يبحث لها أهلها على أى عمل لا تحبه ولا تريده ويجبروها على العمل به لأنه سهل على البنات ولأنهم لهم علاقات بناس كثيرة فيه وينسون ما تتمنى أو تطمح أو تحلم به مع أن عندها طموح وآحلام فى أتجاه آخر وناجحة فيه ولكنهم يريدون محو شخصيتها وطموحها وآحلامها وأجبارها على العمل فى شىء من وجهه نظرهم مناسب لها بغض النظر عن وجهه نظرها !!؟

وآخرى يجبرها أهلها على الزواج من أى شخص حتى لو كان غير مناسب لها حتى لا يفوتها قطر الزواج ولأن فلانة وفلانة وفلانة تزوجن وأصبح عندهم أطفال والنتيجة لهذا القهر حياه زوجيه تعيسة فاشلة أو طلاق !!؟

وآخرى أهلها يمنعوها من الخروج من المنزل تماما ولا السفر ولا فعل أى شىء بمفردها حتى لو كان الخروج والسفر نهارا وحتى لو كانت ما تود فعله صحيح وليس خطأ ولكن لا حياه لمن تنادى !!؟

وغيره وغيره من القهر فى كل شىء وأى شىء يخص أى بنت

واليكم نتيجة هذا القهر
نفسية مدمرة لأى بنت
عقدة تظل معها طوال حياتها ومن الممكن أن تؤثر عليها بعد ذلك فى تربية أبنائها

ومازال القهر موجود كثيرا وفى أماكن كثيرة جدا وتتعرض له البنات فى كل مكان لذلك يجب علينا فهم طبيعة الحياه والتعامل مع الفتيات فالقهر ليس وسيلة للتعامل ولأنها كائن مثلها مثل الرجل ولها عقل وطموح وآحلام وشخصية لماذا يريد الآخرين محوها ولأن نتيجة هذا القهر غير مرضية لأى شخص أيا كان وخصوصا أذا كانت ما تريده أى بنت شىء جيد وغير متعارض مع العادات والتقاليد ولا التعاليم الدينية فلماذا التحكم فيها وفى رغباتها بحجة أنها بنت ويجب الحفاظ عليها ولا يجب تركها تفعل ما تريد وتشاء !!؟

كل سنه وأنتم طيبين

كل سنه وأنتم طيبين ورمضان كريم عليكم إن شاء الله

مش للبنات بس

هو لية لسة لحد دلوقتى بنشوف بنات ممنوعة تقول رأيها وتتكلم عن نفسها وتعبر عن اللى جواها وتقول هيا عايزة إيه بالظبط
هو لية بنلاقى ناس سواء كانوا ستات أو رجالة بيتكلموا عننا فى البرامج والندوات وهما أصلا ميعرفوش حاجة عننا وفى النهاية بيتكلموا عن الطبقة بتاعتهم وبس مش على أغلب البنات الموجودين
يمكن دلوقتى بقى فيه حرية عن زمان بكتير وبقت البنت تقدر تتكلم وتعبر عن اللى جواها واللى عايزاه ولكن منقدرش ننكر أنه لسه فيه بنات ما تقدرش تنطق بكلمة واحدة حتى لو كانت اللى عايزاه صح مش غلط
وللأسف دى ثقافة مجتمع بتزرع جوه البنت من صغرها خوف من الكلام والبوح عن أى حاجة جواها وعايزاها
ولكن مع تمرد بنات كتيرة على الوضع ده ولأن اللى هما عايزينة مش شىء غلط ولا عيب بقى بيظهر فى الفترة الأخيرة بنات كتيرة بتقول اللى عايزاه بعلو صوتها وبأى طريقة ممكنة علشان توصل اللى جواها لكل المجتمع ويمكن فيه ناس بتفهم اللى جواهم وناس برضة ما بتفهمش وبتعتبرها شىء شاذ وغريب على مجتمعنا أن بنت تتكلم
ويمكن أنا لاحظت ده من تجارب بنات كتيرة ومن تجربتى أنا شخصيا من أول ما بدأت أعمل مدونة البنات عايزة إيه اللى كانت تعتبر صدمة لناس كتيرة ومش أى حد تقبلها ولا فهمها فى الأول وحتى لما فكرنا ننشرها فى كتاب كان فيه ناس معانا وموافقانا وفاهمة كلامنا وفكرتنا ومؤيدانا وناس تانية معارضة لكل حاجة بنعملها ومش قادرين يتقبلوا كلامنا ولا أفكارنا
ويمكن فى وسط الناس كلها كان يهمنى رأى أتنين شباب مهمين قوى عندى وكنت خايفة جدا من رد فعلهم وهما أخواتى واللى فرحنى جدا أن الكتاب عجبهم قوووووووووووووووووووى وطلبوا منى أنى أستمر وأكمل

بالأضافة الى عدد من الأصدقاء والزملاء بنات وشباب عجبتهم الفكرة ووقفوا جمبنا فيها
بصراحة الحاجات دى كانت بتدينى أمل ودفعة لقدام وكانت بتخلينى أقول كل اللى جوايا وأكتبه بدون أى خوف أو قلق طالما مش بتعدى حدودى ولا حدود دينى ولا العادات والتقاليد
ولكن لسة برضة فيه بنات كتيرة مش عارفة تتكلم ولا واخدة حقها وضايعين ومحتاجين ناس كتيرة تتكلم وتقول حاجات كتيرة علشان نقدر نعمل حاجة
لحد ما جاتلى دعوة للمشاركة فى جريدة للبنات ( مش للبنات بس ) والجريدة مش عبارة عن مكان للموضة والمكياج والطبخ لا لا
ده مكان هنتكلم فيه عن كل حاجة خاصة بالبنات عن حياتهم أفكارهم آحلامهم طموحهم هتلاقوا معانا كلام فى كل حاجة تتخيلوها والمفاجأة أن اللى هيكتب فى الجريدة مش بنات وبس لا ده كمان فيه شباب هيتكلموا ويعرضوا وجهه نظرهم علشان نعرف وجهه النظر الآخرى
الجريدة هتبدأ الكترونية فى الأول وبعد كده مطبوعة
رئيس تحريرها ياسمين الناظر

وده جروب الجريدة انتظرونا قريبا

http://www.facebook.com/group.php?gid=110120802606&ref=mf

الجواز مش علاقة بين أتنين وبس

بسمه عبدالباسط

وأنا بحضر لأفكار الجزء الثانى من الكتاب وبفكر ابدأ بأيه وكان شاغلنى قوى العلاقة بين الست والراجل خصوصا بعد الجواز ولكنى لاقيت موضوع لأحمد مهنى بعنوان الجواز مش للجنس فقط وعجبنى جدا طريقة تناول أحمد للموضوع وفرحت أنه فيه صوت رجالى وواحد بيفكر كده وبعدها فكرت أكتب موضوعى مع ملاحظة أنه كان فى دماغى حاجات كتيرة من اللى أحمد قالها وبالتالى مش هينفع أكتبها تانى ولازم أقول حاجة جديدة مع وضع لينك موضوعه علشان الموضوع يبقى كامل

فى البداية كده ومن قبل الجواز وفى فترة التعارف والخطوبة اللى المفروض الأتنين بيشوفوا فيها بعض على حقيقتهم ولازم نأكد أنه لازم الأثنين يكونوا على طبيعتهم خاصة لو كان أرتباط تقليدى علشان كل طرف يعرف هل هيقدر يكمل مع الطرف الثانى وهل هيقدر يحبه ويعيش ويكمل معاه حياته ولا لا

عايزة أوضح حاجة مهمة قوى أن الجواز مش مجرد علاقة جسدية بين الأتنين وبس زى ما فيه ناس كتيرة فاكرة وزى ما بيجى فى الأفلام اللى بتصور العلاقة بين أى أتنين سواء كانوا بيحبوا بعض أو متجوزين ما هى الا علاقة جسدية وبس يعنى نلاقى مثلا الأتنين واقفين فى المطبخ بيعملوا أى حاجة وفجأة كده وهما بيجهزوا الأكل ولا بيعملوا شاى حصل أى شىء تافهه فجأة أتحول لعلاقة بينهم
وشوية نشوف واحدة مضايقة وكل الحكاية محتاجة جوزها يطبطب عليها وياخدها فى حضنه وخلاص عادى يعنى برضة فجأة بعد الحضن ده نوصل للمشهد المحفوظ هو يعنى ما ينفعش الأتنين يحضنوا بعض الا ويوصل الموضوع لكده
وشوية ونشوف أتنين بيتخانقوا ومقطعين بعض وشوية وبيتصالحوا وبكل سذاجة وضحك على الناس فجأة نلاقى الخناقة أتحولت لنفس المشهد

يعنى من الآخر الأفلام صورت للناس وللشباب خاصة أن العلاقة بين أى أتنين علاقة جسدية فقط أى موقف بيحصل طول اليوم أيا كان الموقف حتى لو كانوا فى مشوار بالعربية فجأة يتحول لنفس المشهد وبالتالى عقول الشباب ومش الشباب وبس لا البنات كمان أطبع فيها أن الجواز ما هو الا علاقة بين أى أتنين كأن أى واحد وواحدة كل حياتهم هتبقى كده وكل تفكيرهم واللى شاغلهم هو ده وبس
الحياه الزوجية مش كده والأفلام فعلا بتقدم صور غريبة للناس ومش واقعية ابدا وما بتحصلش

الحياه مشاركة بين الأتنين فى كل حاجة ، أتنين يعرفوا يحبوا بعض كويس ، أتنين يضحكوا ويلعبوا ويهزروا مع بعض ، يقفوا مع بعض فى عز البرد فى البلكونة ويلموا الغسيل لأن الدنيا بتمطر ومن كتر البرد يدخلوا والزوج ياخد زوجته فى حضنه مش بهدف الوصول لعلاقة بينهم ولكن بهدف أحساسها بالأمان والدفا ، أتنين يضربوا بعض بأى حاجة قدامهم بالمخدات بالدباديب بأى حاجة يهزروا ويلعبوا مع بعض ويشدوا شعر بعض عادى جداااااااا ، أتنين يساعدوا بعض فى كل حاجة بداية من أن الواحدة تساعد جوزها وهو بيحلق دقنه وتطلع عينه شوية وتبهدله وبعدين تساعده ومفيش مانع أنها تعورة بماكينة الحلاقة عادى جداااااااااااا ، تجهز له هدومة وتساعده يلبسها ومن باب الرخامة تخبى مثلا الشراب أو الجزمة منه ويفضلوا يدوروا عليها مع بعض أكنهم بيلعبوا أستغماية لحد ما تظهر الحاجة ويعرف أنها كانت مخبياها ويخرج زعلان منها وبعدها بشوية ينفجر من الضحك على الموقف ويبعت لها رسالة على الموبايل بيهزر معاها ، واحد يشوف مراته بتسرح شعرها ومخنوقة لأن شعرها طويل ومضايقها ولأنها عارفة أن جوزها بيحب الشعر الطويل مش عارفة تقصره شوية يقوم رايح يساعدها فى تسريح شعرها ويحط لها كريم الشعر ومفيش مانع يلفه معاها وبعدين يبهدله ليها تانى ويحدفوا بعض بالأمشاط والفرش والكريم ، واحد يشوف مراته واقفة بتجهز الأكل فى المطبخ يدخل يساعدها فى تحويل الأطباق على السفرة ومفيش مانع يخبطها بطبق وهو معدى تقوم هيا خبطاه بالمعلقة فى دماغه عااااااااااااااادى ، واحد بعد الأكل يقوم بسرعة يعمل هو الشاى لحد ما هيا تلم الأطباق وتغسلها ومن باب الرخامة ما يحطش لها سكر خالص وتفتكر أنه حط السكر وتيجى تشرب تلاقيه ماسخ ويبقى هاين عليها تصبه على دماغه ومن غير ما ياخد باله تقوم مبدله الكوبايات علشان يشرب هو اللى من غير سكر ، واحدة تشوف جوزها مشغول قوى تقوم تساعده وفجأة وهو بيشتغل يكبس عليه النوم ويقوم نايم على كتفها وعلشان ما تقلقوش تفضل قاعدة فى مكانها ما تتحركش لحد ما يقلق لوحده ويقوم يدخل على السرير ، واحد وواحدة يكونوا بيتفرجوا على فيلم مع بعض وتقوم هيا حاطة راسها على كتفه وهو حاطط أيده على كتفها مش بهدف الوصول لعلاقة ولكن عاااااااااااااااادى جدا منتهى الحنان والألفة بين أى أثنين ، واحد وواحدة يخرجوا يتشموا شوية فى الشارع ولا على الكورنيش وهما ماسكين أيد بعض مفيهاش حاجة ابدا ولا حد هيقول عليهم حاجة دى مراته يعنى عادى ولا هو ما ينفعش الأتنين المتجوزين يتفسحوا شوية ويمشوا على الكورنيش ويمسكوا أيدين بعض ، يروحوا السينما ويتفرجوا على الأفلام اللى بيحبوها وهما بياكلوا فيشار ويقعدوا يبهدلوا فى بعض ويوقعوا الفيشار على هدوم بعض ، يروحوا الندوات والحفلات والحاجات اللى بيحبوها مع بعض وحتى لو كل طرف له أهتمامات مختلفة عن التانى مفيش مانع كل واحد يشارك التانى فى أهتماماته ده دى قمه الرومانسية والحب ، كل فترة ياخدوا أجازة من شغلهم ويسافروا أى مكان يغيروا جو حتى لو هيسافروا لأخر الشارع المهم يغيروا جو ويشوفوا وجوه وحاجات جديدة عليهم ، لما واحد ولا واحدة يخرج يشترى شوية طلبات ويقوم مشترى إن شاء الله وردة ويرجع يديها للطرف التانى ياااااااااااه قمه الرومانسية مش لازم يبقى بوكية فيه مليون وردة ولا هدية غالية لو ورده واحدة هتكون أحلى من أى حاجة تانية الهدية فى معناها مش فى ثمنها ، وحاجات تانية كتيرة قوووووووووووووووووووى ممكن تحصل بين أى أتنين وتخلى الحياه ليها طعم تانى خالص مش كلها خناق فى زعيق ومشاكل ولا زى ما الأفلام بتورى الناس أن العلاقة بين الأتنين مجرد علاقة جسدية
ولا زى ما فيه شباب مفكرة أن البنات والستات ما بتحبش ده وعلى طول غاوية نكد وخناق ومشاكل لا لا مين قال كده محدش غاوى نكد ولا مشاكل ولكن مش لازم كل طرف يستنى أن التانى هو اللى يبدأ لية ما يبدأش كل واحد ويشوف رد فعل التانى لية نفضل مستنين دايما المبادرة من الطرف التانى ولو محصلتش نقول يوووووووووه ده الستات دول نكديين ولا بيعرفوا يضحكوا ولا يهزروا ولا الحياه ليهم طعم معاهم

ومش معنى كلامى أنى بنكر العلاقة الجسدية ولا بقول أنها عيب ولا حرام ولكن الجواز مش بس علاقة لأنه لو كان كده يبقى أحنا مش هنفرق كتير عن الحيوانات ولأننا مش عايشين ولا بنمشى ورا غرايزنا وبس وكمان مش هيبقى له داعى كل واحد وواحدة يختاروا الطرف التانى بعناية طالما مش هيكون فيه أى شىء بينهم غير كده أعتقد مش هتفرق أى حاجة
لازم يكون فيه حب أو حتى بداية أعجاب وطالما فى فترة الخطوبة محصلش أى أنجذاب ولا بوادر حب يبقى ننهى العلاقة أحسن لأنها هتبقى روتينية وبس وجواز لهدف الجواز مش أكتر ولكن لو حصل بداية أعجاب وده فى جواز الصالونات اللى الأتنين بيكونوا لسة أول مرة يشوفوا بعض وماكانوش أصلا يعرفوا بعض بأى طريقة ومفيش أعجاب متبادل ممكن فعلا الموضوع يتطور لحب وتبقى أحلى عيشة لأن الحياه هتبقى حب مع هزار مع خناق مع لعب مع أهتمامات مشتركة بينهم مع كلام ومناقشات ساعات هادية وساعات حامية مع حاجات كتيرة بتخلى الحياه أحلى بكتير

وده لينك موضوع أحمد مهنى

http://www.facebook.com/note.php?note_id=106749381649

ولسة الكلام ما أنتهاش وأنتظروا الباقى

كن صريح معى

بسمه عبدالباسط

طبعا كلنا نعرف يعنى أيه صراحة وأزاى ممكن نكون صرحاء مع الناس ومع نفسنا ولكن فيه ناس كتيرة بتحب تجمل نفسها وبتخبى حقيقتها بطريقة بشعة جدا
ولكن فيه موقف مهم جدا بيكون لازم على الواحد أنه يكون صريح فيه وهو موقف الواحد اللى رايح يتقدم لواحدة وبيكونوا لأول مرة يشوفوا بعض أو يعرفوا بعض وده اللى بيسموه جواز الصالونات
طبعا فيه رجالة كتيرة وكمان بنات كتيرة بيفضلوا يجملوا فى نفسهم ويطلعوا نفسهم حاجة مفيش زيها
ولكن البداية بتكون منين بتكون من الراجل أو الشاب اللى رايح يتقدم لواحده بكونه هو اللى هيبدأ كلام عن نفسه ويبدأ التعارف
أحنا بنطلب من كل واحد يكون صريح وصريح جدا كمان لأن ساعات كتيرة بتكون الصراحة دى مهمة جدا وأحسن بكتير من أخفاء الأمور لأن ساعة ما هتكتشف خطيبتة شخصيتة الحقيقية هتحس قد أيه هو خدعها وضحك عليها ومش هتصدقة ابدا فى أى كلام وكتير قوى بنشوف حالات فسخ الخطوبة بسبب الموضوع ده وبسبب أن العريس خبى أمور كتيرة جدا على العروسة وأهلها وهما أكتشفوها بالتدريج بعد كده واحدة بواحده لحد ما تفقد البنت الثقة فى خطيبها وأهلها كمان يفقدوا الثقة فيه وتكون النهاية فسخ الخطوبة
فالأحسن ليك وليها أنك من الأول تكون صريح وتبين عيوبك قبل مميزاتك مش ممكن هيا تتقبلك كده بعيوبك دى ومين فينا ما فيهوش عيوب ولكن الذكى اللى يقدر يصلح من نفسه ويحاول يكون صريح قدر الأمكان مع الطرف التانى علشان يتلافى حدوث أى مشاكل بعد كده
وعلشان كده بقول عايزين واحد صريح
كن صريح معى

مشكلة من شاب مع الحل

مشكلتي من نوع مختلف ، انا احترت فيها ومش عارف استشير مين لان ناس كتير ممكن تفهمني غلط بس انا نفسي الاقي الحل الصح اللي افضل راضي عنه طول عمري

الحكاية اني كنت بعرف بنت قريبتي وزميلتي ايام الجامعه وكانت العلاقة بينا قوية جدا وكنت ناوي علي ارتباط وخطوبة وجواز لكن الظروف ما كانتش سامحه غير بعد ما اخلص الكلية ، هي اتخطبت وسابتني بطريقة غريبة جدا انها راحت اتخطبت من غير حتي ما تقولي مع ان العلاقة بينا كانت كويسة جدا وحصل دا فجأة بدون أي مقدمات او تلميحات

وهنا اول سؤال في مشكلتي ،انا تقريبا سامحتها لاني بكلمها تفتكروا ان دا صح؟

نيجي بقا للنقطة الاهم هي اتخطبت والكلام دا من سنتين ، وبعدين انا عرفت رقمها عن طريق الصدفة وبدأنا نتكلم تاني كأصدقاء ساعات بنتكلم كذا يوم ورا بعض وساعات بنقطع ، انا عارف ان الحكاية دي غلط لكني ساعات بقنعها انها تكلمني لاني فعلا بحبها حتي لو ما ينفعش بس تقدروا تقولوا اني بحس اني مبسوط معاها وشغل هرمونات الحب بيشتغل معاها جامد ،القلب يدق وكدا

المهم انا دلوقتي مش عاجبني الوضع ، هي بالرغم انها بتكلمني وممكن تكون بتخاطر انها بتكلمني ومبسوطة انها بتكلمني وكدا بس هي بتميل اكتر للارتباط العادي وشايفه ان كل الحب غش وان الحب مالوش لازمة وان الحب حاجة والجواز حاجة تانيه وان الناس اللي بيتجوزوا صالونات بيكونوا مبسوطين اكتر وهي ليها امثلتها وافكار غريبة كدا تحس انها انتهت من 20 سنة

نسيت اقولكم ان خطيبها اغني مني لانه مهندس وكبير شغال من فترة في احدي دول الخريج ، بينما انا لسه يادوب بابتدي حياتي لكني قادر علي تكاليف الزواج طبعا ، طبعا واضح ان خطيبها غير قادر علي كسب حبها والا ماكنتش هتكلمني

يمكن انا اقرب ليها عشان السن وكدا وعشان كمان اننا شكل بعض في الاهتمامات والكلية

دلوقتي السؤال المهم اللي انا محتاج اعرفه ، انا ادامي حل من اتنين

الأول :اني احاول اكلمها عن مساوئ جواز الصالونات واقنعها ان الجواز عن حب احسن وابدأ اعمل مقارنات في المستقبل بيني وبين خطيبها ودا مش هعمله غش ، هي دي فعلا وجهة نظري اللي انا مقتنع بيها انا شايف ان الجواز عن حب احلي .. هل اعرض عليها افكاري دي واحاول اقنعها بيها وبالتالي ممكن تسيب خطيبها وكداولا مادامت مقتنعه بالافكار دي يبقا ما تستاهلش اني افكر فيها ، وان الافكار جزء من الشخصية اللي ما ينفعش اغيرها ، الي جانب ان مع كل اللي حصل ممكن يكون الاربتاط بينا مالوش طعم

عايز اقولكوا انها بتقتنع برأيي زائد اني عشان مقتنع بافكاري بقدر اقنعها ، بس الاهم اني اعرف اللي بعمله دا صح ولا غلط؟

ياريت تلاحظوا ان حب ماقلش من سنتين بالرغم اني حاولت ارتبط بغيرها محاولات جادة

---------------------------------------

وكان ردى عليه

أولا كان المفروض أول ما البنت أتخطبت أنك تقطع علاقتك بيها تماما وغلط جدا أنكم تفضلوا تكلموا بعض

ثانيا موضوع أن أفكارها أن جواز الصالونات أحسن خلاص هيا حرة فى تفكيرها وأختياراتها وهيا اللى تتحمل نتيجة أختيارها وبلاش تحاول تقنعها بتغيير فكرتها لأنه معلش أنت نفسك مش هتثق فيها بعد كده لأنها كانت مخطوبة لواحد وبتكلمك وبالتالى حتى لو سابت الواحد ده وأرتبطت بيك دايما هتكون شاكك فيها وفى تصرفاتها وهتقول فى بالك ما هو زى ما كانت بتكلمنى وهيا مخطوبة ممكن جدا دلوقتى تكلم أى واحد تانى

غير إنى مستغربة جدا أزاى هيا تسمح لنفسها تعمل كده

اللى أنا شيفاه أنها بتتسلى بيك ومعلش اعذرنى فى الكلمة هيا شايفة واحد بيحبها وعايز يرتبط بيها وحتى بعد ما أتخطبت لسة بيكلمها وفيه نوعية من البنات بتحب تثبت لنفسها أنها مازالت مرغوبة أو تكون عايزة تتسلى الله أعلم بيها

ولكن عليك أنك تقطع علاقتك بيها فورا وتحاول تبدأ حياتك من جديد مع واحدة تقدرك وتقدر مشاعرك وتقف جمبك وتبنوا حياتكم ومستقبلكم مع بعض

-----------------------------------

وكان رده عليا

أود أن أطلعك علي آخر أخباري وتجربتي

بالرغم من أني اعرف الفتاة موضع المشكلة من أربع سنوات وبالرغم من أنها قريبتي وبالرغم أيضا من أنني لست بالشخص الساذج الذي من الممكن أن تتصورينه إلا إنني اكتشفت أني قد خدعت في تلك الفتاة وأخذت عنها صورة عكس ما هي فيه

توهمت أنها قمة الرقة والبراءة والرومانسية وتصورت نفسي المنقذ لها، لكنها كانت عكس ما تصورت تماما

في الفترة بين إرسالي المشكلة وردك عليها استطعت أن اعرف أنها في خلال فترة خطوبتها قد تعرفت علي شاب ثالث لديه سيارة وظلا علي علاقة طويلة فترة طويلة قبل أن يتركها (كل هذا وهي مخطوبة

إلي جانب أنها الآن علي علاقات عديدة علي الانترنت ( في الوقت الذي كانت تحدثني أيضا

وبدون أي تفصيلات اسمحي لي أن أقول أن كان كلامك صحيح مئة بالمائة هي فعلا كانت بتتسلي وعايزة تثبت أنها مرغوبة وعندها حاجة غلط نتيجة لتعدد علاقاتها التي لم أكن أتصورها

اكرر شكري علي مشاركتي وأحب أن أطمئنك علي أنني بمجرد أن عرفت تلك الحقائق خرجت من قلبي نهائيا حتى أنني لم أكن أتصور أنني عرفتها في يوم من الأيام ،وتعافي قلبي نهائيا من المشكلة ، اشكر الله أنني عرفت الحقيقة وهداني للصواب

------------------------------

انتظروا باقى المشكلات مع حلولها قريبا وفى إنتظار كل مشاكلكم على

elbanatayzaea@gmail.com

ألطف الكائنات

ألطف الكائنات مع بسمه عبدالباسط وبدرية طه

قسم فى مجلة ميكانو الألكترونية

http://www.mikanoo.com

معانا فى القسم أبواب كتيرة جدااااااااااااااااا

كلامهم كلام ( وده هنعمل فيه تحقيقات وهنتكلم عن نفسنا وعن آحلامنا وعن حياتنا وعن كل حاجة خاصة بالبنات والمرأة عموما

غص بان ( وده خاص بالريجيم والرشاقة

على باب العنوسة ( وده خاص بالكلام عن مشكلة العنوسة وعن الكلمة نفسها وهتلاقوا معانا حكايات وحاجات كتيرة قوى عن الموضوع ده ومفاجأت كتيرة

ضى القمر ( خاص بالمسكات وكل مشاكل البشرة

سنه أولى مطبخ ( خاص بكل الأكلات وبتجاربنا وهيكون معانا طرق أكلات كتيرة وبالصور كمان مع كل تجاربنا مع المطبخ والطبخ

من القلب ( وده خاص بالمشاكل اللى بتواجهكم وده خاص بكل الناس نساء أو رجال وكل اللى عليكم تبعتوا لينا مشاكلكم وهيكون معاكم بسمه عبدالباسط وبدرية طه

ولسة معانا أفكار وحاجات كتيرة وجديدة هتشوفوها ومفاجأت كتيرة جداااااااااا

------------------------------------------------------

لكل البنات الجميلات لو تحبى تكونى معانا فى قسم ألطف الكائنات فى مجلة ميكانو

أبعتى لينا فورا

لو عندك أفكار جديدة

غريبة

مطرقعة

أى حاجة خاصة بالبنات

أبعتيلى فوراااااااااااااااا على

basma@mikanoo.com

--------------------------

من مواضيعنا فى المجلة

بايرة ولكن

http://www.mikanoo.com/do.php?id=1189

طفلك عامل إيه

http://www.mikanoo.com/do.php?id=1195

من القلب

http://www.mikanoo.com/do.php?id=1193

--------------------------------

جروب المجلة

http://www.facebook.com/group.php?gid=6347529963&ref=mf

عايزين راجل يكون كده

بسمه عبدالباسط

عايزين راجل يكون كده

كتير قوى بنشوف وبنسمع عن صفات الست اللى كل راجل بيكون عايزها ونلاقية بيحط الصفات دى اللى هيا أنا عايز واحدة تكون زوجة وصديقة وأخت وأم وحبيبة وغيرها من الصفات الكتيرة اللى بيكون عايزاها فى ست واحدة بس وعلشان كده أحنا كمان عايزين راجل بنفس المواصفات دى راجل يكون زوج وصديق وأخ وحبيب وأب وطبعا هو مش هيكون كل ده مرة واحدة مش معقول يعنى ولكنه فى لحظات معينة لازم يكون صديق ولحظات تانية يكون حبيب ولحظات تانية يكون زوج وهكذا هل ممكن يكون موجود الراجل ده ولا هو بس بيكون عايز كل حاجة ومش عايز يدى حاجة

---------------------------------------

عايزين راجل بجد

فى النهاية أحنا عايزين راجل بجد راجل بكل ما تحمله الكلمة من معنى مش عايزين واحد منظر وصورة وخلاص وزى ما أنتوا عايزين واحدة يكون فيها كل حاجة حلوة وتكون ست بجد أحنا كمان عايزين راجل بجد راجل يعنى راجل

البنات عايزة إيه فى المنصورة

الصورة تصوير دولسينا القمر

كتبت يوم الجمعة 5 يونيو بعد عودتى من حفل توقيع الكتاب

شعور كبير بالفرحة حسيت بيه النهاردة فى حفل التوقيع الثانى لكتابى أنا وصديقتى بدرية البنات عايزة إيه
5 يونيو 2009
يمكن فى البداية ومن قبل الحفل وبكام يوم وأنا كنت مضايقة لأنى كنت عارفة أن بدرية مش جاية لظروف قهرية جدا عندها وكنت فعلا خايفة ومضطربة جدا من مجرد وجودى لوحدى من غيرها فى الحفل لدرجة إنى فكرت أعتذر عن الحضور للحفل ولكن بصراحة لأنى قدرت كل الناس اللى بعتت وعلقت وقالت ليا أنهم جايين مقدرتش أعتذر ورحت فعلا ويمكن برضة مشاعر القلق والأضطراب كانت مسيطرة عليا جدا خصوصا قبل ما يبتدى الحفل وطول ما أنا فى الطريق للمنصورة
لدرجة إنى قبل الحفل بقول لياسمين وشيماء إنى نسيت أصلا الكتاب بيتكلم عن إيه وكنت فعلا خلاص شوية وهيغمن عليا عاااااااااااااااااااااااااااااااااااااااااااا
وطبعا أنا بتوعد صاحبتى وهيا عارفة نفسها أنها هتشوف منى أيام بس تصبر عليا شوية هههههههههههههههه
بس بصراحة فرحت جدا جدا من الناس اللى حضرت ومن اليوم كله
فى الأول فوجئت بمكالمة من صديقتى العزيزة جدا شيماء الجيزى بتشوفنى فين وبتعرفنى أنها أحتمال كبير تيجى وفعلا جت وفرحت جدااااااااااا بحضورها ده مع أنها جاية من مسافة بعيدة
فعلا شكرااااااااااااااااا ليكى جدا وصدقينى لما شفتك على الواقع حبيتك أكتر مليون مرة من قبل كده لأنك بنوتة جدعة وزى العسل ودمك خفيف جدااااااااااااااا
طبعا فى البداية مش قادرة أنسى فضل أمى عليا وتصميمها الحضور معايا فى أى حفل خاص بيا مع إنى عارفة أنها بتتعب من السفر جدا وأنها ما بتصدق يوم أجازة علشان تقعد فى البيت ولكنها صممت تيجى معايا وتحضر معايا اليوم
بجد مش عارفة أقولك إيه ولا أرد ليكى جمايلك دى أزاى ربنا يخليكى ليا يا ست الكل
فى البداية لاقينا ياسمين السبع وخطيبها الجدع جدا هيثم اللى قام معانا هو وياسمين بواجب جامد جدااااااااااااااااااااا فعلا انتوا ولاد بلد بجد
وشوية وبدأت الناس تيجى للمكتبة مع فاصل طبعا من التهييس الجامد منى أنا وياسمين وشيماء كنا تقريبا مش راكزين خالص وخصوصا أن الناس اتأخرت جدا وأحنا قلقنا لنعمل الحفل لنفسنا
ههههههههههههههههههههه بس الموضوع قلب معانا بهزار وضحك وتهييس عالى جدا
نيجى بقى للمفاجأة الثانية وهيا وجودى أصلا فى حفل مع الكاتب المعروف والجامد جدا أسامة الشاذلى ده لوحده كان مخلينى فى قمة القلق والرعب لكونى أقعد جمب واحد بقدرة ومكانتة ولكن الراجل بجد متواضع جدا وحد جدع وكويس جداااااااااااااااااااااا
وفعلا من دواعى سرورى أن حفل توقيع كتابى يكون مع حفل توقيع كتابه فى يوم واحد ده بجد شرف كبير جداااااااااا ليا
نوصل بقى لكل الناس اللى يمكن كلامنا ما أتعداش تعليقات على الفيس بوك أو يمكن ماكانش فيه كلام بينا خالص وفاجأونى وحضروا الحفل وسامحونى على فاصل الزهايمر اللى أنا كنت فيه لأنى فعلا فى المواقف دى بنسى موووووووت
مين بقى جه ومعلش لو نسيت حد الزهايمر بقى
أمجد مجاهد ، محمد متولى ، دولسينا ، إيمان سلطان ، مروة سالم ، ضحى وغيرهم كتير
بجد بشكركم جدا جدا على حضوركم وعلى كلامكم كله
وبشكر باقى الناس اللى حضرت الحفل وأتناقشت وأتكلمت كنت مبسوطة جدا جدا من كمية المناقشة اللى كانت موجودة المرة دى
ويمكن أنا حسيت أنى كنت زى وكالة الأنباء وأتكلمت كتير جدااااااااااااااااااااااااااا مع أنى فى أول حفل كنت متبعة نظرية الصمت الرهيب بس فعلا المرة دى حاسة أنى أتكلمت كتير جدا ويمكن كان لسة عندى كلام كتير قوى بس علشان الوقت خلصنا الحفل
بس فعلا كنت مستمتعة جدا ومبسوطة جدا النهاردة بوجود كل الناس اللى كانوا موجودين وشرفونى وأسعدونى كده
ويمكن كان ناقص اليوم وجود صديقتى وتؤأمى بدرية ولكنى مقدرة ظروفها كويس
وكمان كان نفسى أصحابى اللى كانوا موجودين معايا قبل كده يكونوا موجودين ولكنى مقدرة موضوع السفر والوقت والمسافة
والحمدلله اليوم كان ممتع جدااااااااااا ورائع أكتر مما تخيلت
برضة ولاد الدقهلية والأقاليم مفيش أجدع منهم وقاموا معايا بواجب جامد جداااااااااا فعلا شكرا ليكم جدا
وياريت لو فيه حد حضر وأنا نسيت أقول مين يبعتلى يفكرنى علشان حالة الزهايمر لسة مسيطرة بس عليا شوية
ومنتظرة رأيكم فى الكتاب بكل صراااااااااااااااااااااااااااحة
وانتظروا بقى الصور والفيديو قريبااااااااااااااااااااااااااااا جدااااااااااااااااااا
والحمدلله مش النهاردة برضة ذكرى النكسة وزى ما وعدتكم أننا هنعمل تاريخ جديد والحمدلله عملنا والنكسة ما قصرتش علينا
هههههههههههههههههه

حفل التوقيع الثانى لكتاب البنات عايزة إيه

إن شاء الله فيه حفل توقيع لكتاب البنات عايزة إيه لـ بسمه عبدالباسط و بدرية طه

يوم الجمعة 5 يونيو من الساعة 6 الى 9

فى المنصورة مكتبة

Books & Beans

7

ش جزيره الورد المشايه السفليه امام نادي الجزيره

بتمنى أشوفكم كلكم فى الحفل وتنورونا

وده أيفنت الحفل على الفيس بوك

http://www.facebook.com/event.php?eid=90412301575&ref=mf

ولأى أستفسار عن الحفل والمكان أكتبولى هنا أو أبعتولى على

elbanatayzaea@gmail.com

--------------------------------------

ملحوظة

الموضوع اللى فات لسة شغال ومستنية تعليقكم وآرائكم وأنا لسة بتابع فيه وهعلق على باقى التعليقات

البنت عايزة إيه من والدها

بسمه عبدالباسط

أتكلمت قبل كده عن علاقة البنت بخطيبها وأيه اللى هيا محتاجاه منه ولكن المرة دى هتكلم عن علاقة البنت بوالدها علاقتها بالأب المفروض تكون عاملة أزاى وشكلها أيه وأيه اللى هيا محتاجاه منه بالظبطمن أول ما بيكون عمر البنت شهور ولسة بتبدأ تتعرف على اللى حواليها بنلاقى أى بنت مرتبطة بالأب بصورة كبيرة قوى ولو كلنا لاحظنا هنلاقى فعلا كده أن البنت بتحب والدها جدا وبتكون قريبة منه أكتر من الازم وعلشان كده المفروض الأب يحس بده ويفهم ده وما يتجاهلش أرتباطها بيه ويديها الحنان والحب اللى هيا محتاجاه بتبدأ البنت تكبر وبيبدأ أرتباطها بالأب يزيد ولكن للأسف فيه ناس كتيرة ما بتاخدش بالها من كده وبيبدأو يهملوا البنت ويهملوا مشاعرها بطريقة غير أدمية وما بياخدوش بالهم من أرتباط بنتهم بيهم وسبحان الله دى بتبقى حاجة فطرية بتلاقى البنت ميالة أكتر لأبوها ولكن للأسف هو ما بيكونش حاسس بكده ومش عارف أن أهماله ليها ولمشاعرها وعدم أحساسها بحنانه ممكن يسبب مشاكل كتيرة قوىوهقول لكم على بعض المشاكل دى البنت لما بتلاقى الأب بعيد عنها وهيا بتكون محتاجاه جدا ومحتاجه حنانه وحبه وعطفه بتعمل أيه بتتجه مشاعرها فورا لأى راجل تانى موجود حواليها ويكون فعلا كويس وحنين وفيه صفات هيا نفسها تشوفها فى باباها ومش شرط تحس بالمشاعر دى وهيا كبيرة لا دى بتحسها من وهيا صغيرة ممكن تلاقيها مرتبطة بمدرس عندها فى المدرسة بدرجة كبيرة وهيا لسة فى المرحلة الأبتدائية يعنى لسة طفلة وكل ما بتتنقل لمرحلة أكبر كل ما بتحتاج للحنان أكتر وبتفضل مشاعرها تدور معاها على حد يحل محل والدها اللى غايب عنها ومش حاسس بيها وعن تجربة شفتها بعينى لأم منفصلة عن زوجها بنتها لسة فى المرحلة الأبتدائية والبنت محرومة طبعا من حنان والدها ومن وجوده فى حياتها وفى مرة قالت لمامتها أنها بتحب مدرس عندها قوى ومرتبطة بيه جدا والأم لاحظت كده فعلا ولاحظت على بنتها أرتباطها الكبير بالمدرس ده وطبعا حبها ليه حب أبوى لأنها محرومة من عاطفة الأبوهبنتك وهيا لسة صغيرة محتاجة منك تلعب معاها وتتكلم وتهزر تاخدها على رجلك وتحكى لها حكاية تحسسها بوجودك فى حياتهاوكل ما بتكبر بتحتاج لوجودك أكتر ولنصايحك ولكلامك معاها وبتحتاج تحس بخوفك عليها وجودك فى حياه بنتك لازم يكون وجود حقيقى خليك صاحبها وكلمها فى كل حاجة وأعرف عنها كل حاجة وشاركها فى حياتها ما تكونش مجرد صورة موجودة أو بنك بيصرف فلوس وخلاص وفى النهاية نوصل لبنت عندها 16 أو 17 سنه وقعت فى شباك راجل كبير ضحك عليها وده نتيجة لأيه نتيجة لعدم وجودك فى حياتها وحتى لو مفيش حد ضحك عليها هيا مشاعرها كل شوية هتتجه لأى حد كبير فى السن وخلاص أى حد يعوضها الحنان والحب الأبوى اللى هيا مش لاقياه خلوا بالكم من بناتكم وحافظوا عليهم لأنكم هتتسألوا عنهم يوم القيامة

ومن الحب ما خنق

بدرية طه

معلش ياجماعة هتكلم في موضوع قتل بحثا ورغيا ... إلى هو ايه استنوا بيني نسيت اه افتكرت يعني ايه انا بحب إنسانة أو بيحبني إنسان ...استنوا بس هقولكم ليه أنا بتكلم في الموضوع ده أصل في واحدة صحبتي اليومين الي فاتوا دول داخلة في تجربة منيلة بستين لون.قال ايه ارتبطت بإنسان بيحبها وجت قالتلي طبعا انا قلبي رقص من جوه وقلت يا الف مليون مبروك يا نهار ابيض اموووه .. اموووووه وبعدين يا بنتي هتتخطبوه امتى... قامت مبرقة لي وقالتلي خطوبة ايه مين الي قال الكلام ده ... قلت هو انا قلت حاجة غلط فيه ايه يابنتي ... قال ايه ظروفه مش مساعدة وماله يا اختي طيب... نصبر مافيهاش حاجة الواحدة الاصيلة تقف جنب جوزها يوه ااقصد جنب الي هيبقى جوزها وبعدين يابنتي مقالكيش ايه الظروف ... لا متعرفش طيب ظروفه هتساعد امتى ... متعرفش... طيب ممكن بعد اد ايه تتصلح برضه متعرفش ايه الوكسة دي مش مهمما علينا المهم البت قالتلي استنى يا اختي اهو الواد كويس وبتاع المهم بقالنا في الحوار ده مايقرب من سنة ويجلها ناس خلال السنة وتقوله انه في حد اتقدم لها أن البعيد يتحرك ابدا .. انه يتحتح مافيش فايدة ... وانا اجز على سناني الي اتخلعت من كتر الجز واقولها هو انتي يا اختي متاكدة أنه بيحبك تقولي اه والله وبيتصل بيا ويتنحنح ويقسملي انه بيبحني.يالهووووووووووي اشد في شعري انا ولا ايه ... طيب هي كلمة بحبك دي بقى متوقفة اليومين دول على الكلام زي الحزب اسمه ايه ده الي بينادي بالاصلاح وندور عليه مش نلاقيه ولا ايه بقى تعريف الحب اليومين دول ماهو انا يا اما انا بقيت دقة قديمة وما اعرفش التعريف الحديث للحب الي هو متمثل في الكلام والتسبيل والنحنة والهمس واللمس وخلاص يا اما الحب بقى في ظل الغلاء الي احنا فيه ده بقى اخره بحبك وسلام عليكم.هو على حد علمي ان الي بيحب حد بيبقى عاوزه يكون جنبه ومعاه دايما وبلغة الرجالة اخوانا الاعزاءبيحب يكون ملكه على اساس ان البنت غسالة او ثلاجة ماعلينا اصله مش حورانا دلوقتي ماهو الحب على ايامي كان معناه القرب بالحبيب والمحافظة عليه مع العلم ان الواحدة الي بكلمكم عليها دي مش طالبة شبكة بعشر الاف جنيه وبتاع ولا حاجة يعني كل الي طلباه ان الموضوع يبقى رسمي لاني واثقة اني هلاقي كام واحد كده فاكر نفسه فرويد ويقولي ماهو انتوا الي بتعطلوه المراكب السيرة بس باين دلوقتي معنى الحب اتغير ماهو اصلي خلاص ياجماعة دماغي وقفة ولو عندكم وقت ممكن احكيلكم حكايات كتيرة بتحصل للعيال صحابيولا ااقولكم ورايا فوم غسيل المهم قوليلي هي الدنيا بقى فيها ايه وايه الي بيحصل ده والحب بقى ليه معاني تاني ولا ايه ياريت حد يعرفني احسن انا باين بقالي كتيرة ناااااااااااااايمة

إيه هيا مشكلتك

إيه هيا مشكلتك سواء كنت ولد أو بنت ياريت كلكم تبعتوا لينا هنا عبر الرسايل إيه المشاكل اللى بتقابلكم فى المجتمع وأحنا هنتناولها معاكم وهنحاول نقدم لها حلول

لكل واحد إنت لسة عايز تعرف إيه عن البنات قول لنا فيه إيه محيرك فيهم وأحنا هنرد عليك

لكل بنت فيه إيه بيضايقك من المجتمع والناس اللى حواليكى قوليلنا وأحنا هنطالب وهنعرض كل اللى محتاجينة من المجتمع

مستنينكم هنا أو على الميل ونضمن لكل بيانتكم السرية التامة

elbanatayzaea@gmail.com

أمنحونى حق الأختيار

بسمه عبدالباسط

أمنحونى حق الأختيار

الأختيار حق مشروع لكل أنسان ولكنه أحيانا يكون ممنوع على ناس معينة ويمنعوا من حقهم فى أختيار أى شىء
كثيرا ما نرى أسر تمنع البنت من أختيار أبسط الأشياء الخاصة بحياتها فهى بالنسبة لهم شىء موجود يتحكمون فيه كما يحلو لهم
ولكن البنت أى بنت مثلها مثل أى أنسان لها الحق فى أختيار كل شىء يخصها ويخص حياتها طالما لا تختار شىء خطأ ومن حق الأسرة معاونتها فى أختياراتها والأختيار معها ولكن ليس من حقهم منعها من الأختيار فلماذا يعطون الولد الحق فى أختيار كل شىء ويمنعون البنت من أختيار أبسط حقوقها
وتوجد أشياء كثيرة تمنع البنت من الأختيار فيها وسوف نقوم بالكلام على كل شىء فى موضوع مستقل ومن ضمن هذه الأشياء
حقها فى التعليم وفى أختيار الشىء الذى تريد دراسته
حقها فى النجاح
حقها فى العمل
حقها فى العلاج
حقها فى أختيار شريك حياتها

وكثير من الحقوق الضائعة والممنوعة من أختيارها البنت فى كثير من الأحيان سوف نعرفها بالتفصيل لاحقا

--------------------------

حقى فى التعليم

البنت مالهاش غير بيتها ، يعنى هتعملى أيه هتجيبى الديب من ديلة ، انتى شوية وهايجى واحد ياخدك وخلاص بلا تعليم بلا كلام فارغ ، انتى مش ولد علشان تتعلمى الحاجات دى وتسافرى وتروحى وتيجى أتعلمى أى حاجة وخلاص ، دورات أيه وكلام فارغ أيه اللى عايزة تاخدية انتى مش خدى شهادتك خلاص كفاية عليكى كده
طبعا الكلام ده بنات كتيرة بتسمعه وبيتقال فى بيوت كتيرة لما البنت تكون عايزة تدرس حاجة معينة وتقول لأهلها عليها تلاقيهم رافضين تماما وعايزنها تدرس أى حاجة وخلاص ويقولوا لها انتى بنت مالك ومال الحاجات دى هو التعليم كمان فيه بنت وولد
وكمان لو عايزة تدرس فى كلية بعيدة شوية ولازم تسافر لها يقولوا لها لا لا مفيش سفر وكلام فارغ أدرسى أى حاجة وخلاص ماعندناش بنات تسافر وتروح وتيجى
ولما تخلص دراستها اللى فى الغالب بتكون درستها غصب عنها بتكون عايز تتعلم حاجات تانية تاخد دورات فى أى حاجة يبقى الرد أيه لا لا دورات أيه ماعندناش الكلام ده أنتى مش درستى وخدتى كلية وخلاص كفاية عليكى كده
وفى المقابل بنلاقى الولد يدرس أى حاجة هو عايزها ويدخل الكلية اللى بيحبها ويسافر ويروح ويجى عادى ما هو راجل ولو قال عايز أسيب الكلية دى وأروح دى عادى برضة ولما يحب ياخد أى دروات ماشى يا حبيبى خد مفيش مشكلة كل اللى أنت عايزة أعمله
طبعا الكلام ده بيحصل كتير قوى وعند ناس كتيرة وطبعا التعليم مفيهوش حاجة أسمها بنت وولد لية بنحرم البنت من حقها فى دراسة الحاجة اللى بتحبها لية بنحطها فى برواز خشب وعايزنها تدرس حاجة معينة وفى أى مكان قريب وخلاص لية ما نسيبهاش تختار الحاجة اللى بتحبها وحاسة أنها عايزاها وهتتفوق فيها
لية من حق الولد يدرس أى حاجة وكل حاجة هو التعليم كمان فيه ولد وبنت
أمنحونا حقنا فى التعليم

-------------------------------------

حقى فى النجاح

النجاح حلم لكل الناس تتمنى الوصول له فى أمور كثيرة فى حياتهم ولكن يوجد ناس محرومين من حقهم فى النجاح محرومين من أحساسهم بالنجاح والفرحة به
كثيرا ما نرى أسر تمنع أبنتها من النجاح وتدفعها للأسفل بكلامهم وتعليقاتهم ووقوفهم فى طريقها بحجه أنها بنت ولا يوجد شىء مهم تفعله
فكلامهم يكون بمثابة ضربة قوية لأى بنت تدمر بها نفسيتها ويجعلونها غير قابلة على الحياه ولا يوجد عندها طموح ولا حتى تحلم بالنجاح
وأيضا عدم مشاركتهم للبنت فى نجاحها والفرحة بيه يدفعها لعدم النجاح
فلذلك يجب على كل أسرة وكل شخص يتعامل مع أى بنت فتاه سيدة أن يشعرها بقيمه ما تفعله حتى تجد دافع يدفعها للنجاح
أمنحونا حقنا فى النجاح
-----------------------------

كده أنا أتكلمت عن كذا حق وباقى الحقوق هكملها فى تدوينة تانية ان شاء الله

كتاب البنات عايزة إيه فى معرض يوم الثلاثاء

ان شاء الله سيقام معرض للكتب المستعملة والحديثة التابع لدار نون يوم الثلاثاء القادم 31 مارس من الساعة 3 الى 9

فى المركز الدولى للتنمية الثقافية شارع السد العالى ميدان فينى بالدقى رقم 17

وهيكون فى المعرض عدد من الكتب المستعملة والكتب الحديثة وخاصة أصدارات دار الكاتب ومنهم

كتاب البنات عايزة إيه لـ بسمه عبدالباسط وبدرية طه

كتاب كلام فى الحب وأشياء آخرى وكتاب يوميات نونو لهند سيد

كتاب أشتغل وأنت فى البيت لمحمد التهامى

كتاب ظل رجل لهبه هانى

والعديد من الاصدارات الاخرى

وان شاء الله هتكون بسمه عبدالباسط وبدرية طه وهند سيد موجودين فى المعرض

عانس ولا مطلقة

بسمه عبدالباسط

موضوعى المرة دى موجه للبنات ونفسى بجد يسمعونى ويفهموا معنى كلامى كويس
دلوقتى هسأل سؤال تفضلى تبقى عانس ولا مطلقة
طبعا ممكن الاقى بنات ترد تقولى أتجوز وأطلق أحسن ليا من لقب عانس ولكن أنا مش مع كده ابدا
العانس اللفظ اللى أنا مابحبوش ونفسى الناس تبطل تستخدمه لأن الجواز مالوش سن والناس بتتجوز فى أى وقت ومفيش سن معين وبعدها نقول البنت دى خلاص مش نافعة للجواز أزاى أحنا هنحرم حاجة حلال الجواز موجود ومباح فى كل سن
دلوقتى سن الجواز أرتفع وما بقاش زى زمان يعنى فيه بنات عدت الثلاثين ولسة ما أتجوزتش ولسة بيجى لها عرسان وبيتخطبوا عادى ولكن للأسف لسة برضة فيه ناس معينة أول ما البنت تعدى ال 25 سنه يفضلوا يتكلموا ويضغطوا عليها علشان تتجوز أى حد وخلاص وشوية وهتبقى عانس ومش عارفة أيه وكلام مالوش لازمة
وفيه بنات للأسف بتتأثر بالكلام ده وبتوافق على أى حد وخلاص علشان تترحم من كلمة عانس ولكنها بتروح برجلها لكلمة مطلقة لأن الجواز ماكانش مبنى على أسس سليمة
وعلشان كده أنا بفضل كلمة عانس وأن البنت تتأخر فى الجواز عن كلمة مطلقة وأى جوازة وخلاص
لكل بنت بقول بلاش توافقى على أى حد وخلاص أستنى اللى ترتاحى له وتحسى أنه مناسب ليكى وبلاش تسمعى كلام أى حد مهما كان الحد ده ومعلش أستحملى التلميحات السخيفة اللى بتتقال بس صدقينى شوية والناس نظرتها هتتغير لما تلاقى فى يوم أنك لاقيتى الحد المناسب ليكى وأرتبطى بيه
لكل الناس ولكل المجتمع أرحمونا من كلمة عانس اللى بقيتوا بتوصفوا بيها البنات اللى سنها يكبر وياريت كل واحد يبص لأخته ولبنته ولأى بنت قريبة منه ويشوف يحب أنها تتوصف بالكلمة دى ولا لا
عانس أفضل بكتير من مطلقة وأى جوازة والسلام
عيشى حياتك وأحلمى بشريك حياتك وبمواصفاتة اللى أنتى عايزاها واتأكدى أن نصك التانى موجود بأذن الله
وبلاش تفرطى فى نفسك علشان تترحمى من كلمة عانس أرجوكى بلاش
أرحمونا من كلمة عانس وحتى لو فضلتوا مصرين عليها أحنا هنفضلها عن كلمة مطلقة

تفاصيل حفل التوقيع وأخبار جديدة

بجد أحنا بنشكر كل الناس اللى جت حفل التوقيع بتاع الكتاب ولو عايزين تعرفوا تفاصيل أكتر عن الحفل واللى حصل فيه

أدخلوا عند بسمه عبدالباسط

هنا

أو عند بدرية طه

هنا

---------------------------------------

وأنتظرونا قريبا جدا مع شكل ومضمون جديد للبنات عايزة إيه

خالص تحياتنا

بسمه عبدالباسط

بدرية طه

حفل توقيع كتاب البنات عايزة إيه مع مجموعة كتب آخرى

حفل التوقيع يوم الخميس 26 فبراير من الساعة 5 الى 7

فى مكتبة البلد

مكتبة البلد قدام الجامعة الأمريكية

بتنزل محطة مترو التحرير ( السادات ) وبتخرج من الباب اللى قدام الجامعة الأمريكية

هاتخرج من المترو اتجاه السهم اللي بيقول الجامعه الامريكيه اول ما تخرج هاتلاقي في وشك وواخد ناصيه كمان هارديز وامامه الجامعه الامريكيه تمشي مع اتجاه هاردز بعد خطوات هتلاقي ماكدولدز تمشي برضوه هتلاقي عماره تحتها كافية سلنترو هي ديه عماره المكتبه

الحفل هيكون للكتب الأتية

البنات عايزة إيه لـ بسمه عبدالباسط وبدرية طه

كلام فى الحب وأشياء آخرى هند السيد

ظل رجل هبه هانى

أشتغل وأنت فى البيت محمد التهامى

----------------------------

مستنينكم كلكم