المهم أنها بنت

"المهم أنى بنت"

" والأهم أنى لسة محافظ عليها بنت"

تفكير غريب بقى منتشر جدا بين البنات والولاد فى علاقات الحب وما شابه... وهو أنهم ممكن يعملوا أى حاجة وكل حاجة وفى النهاية تلاقى الواحدة تقولك المهم أنى بنت ونفس الشىء بالنسبة للولد تلاقية يردد نفس الكلمة أحنا عملنا كل حاجة ولكننا محافظين أنها بنت

يعنى هو مش مشكلة أصلا هما علاقتهم وصلت لفين وعملوا إيه...!!!

مفيش عيب ولا حرام ولا احترام خطهم الاحمر بس انها بنت

وبغض النظر عن الحب نفسه وإيه الخطوط اللى لازم ما حدش يتعداها ولكن من كام سنة كده وأنا تقريبا فى الثانوية كنت أسمع واقرأ وأشوف أن أخر حدود الأتنين اللى بيحبوا بعض أنهم ممكن يمسكوا أيدين بعض وكانوا بيعتبروها جريمة وبيحسوا بالذنب قوى

وعشان يبرروا لنفسهم أى حاجة تانية عايزين يعملوها أنتشر الجواز العرفى وباقى أنواع الجواز اللى مازالت منتشرة عشان يقنعوا نفسهم أنهم ماشين صح ولكن على الأقل كان جواهم شوية أحساس أنهم مش عايزين يعملوا حاجة غلط وكانوا بيحاولوا يحللوا لنفسهم الموضوع ده

شوية شوية الموضوع كبر بقى وما بقاش فيه حدود ولا حاجة غلط ولا عيب ولا حرام وبقى عادى جدا أتنين بيحبوا بعض يمسكوا أيد بعض يلمسوا بعض يعملوا أى حاجة وكل حاجة والمشكلة فى دماغهم اللى مصورة ليهم أن كل ده عااااااااااادى والحاجة الوحيدة الغير مسموح بيها هو القضاء على عذرية البنت !!!

طيب سؤال كده على السريع

هما لية بس بيحاولوا يحافظوا على النقطة دى ؟؟

وطبعا الأجابة الطبيعية والمنطقية أنهم حاسين أنهم بيغلطوا ولكنهم بيحاولوا يقللوا أضرار الغلط ده بحيث لو حصل مشاكل والأهل ما وافقوش على الجواز كل واحد يكمل حياتة مع حد تانى ولا كأن فيه حاجة حصلت

كل اللى أعرفه ومؤمنة بيه بغض النظر عن نوع ديانة أى واحد أو عاداته وتقاليده أو مستواه الأجتماعى والثقافى أن جسم البنت ده حاجة كبيرة قوى ولازم تحافظ عليه وما يبقاش مباح لأى حد حتى لو ديانتها أو تقاليدها اللى هيا فيها مش مانعة ده بس اللى أعرفه أن أى واحدة عندها كرامة وعزة نفس لازم يبقى جسمها عندها له قيمة أكتر من كده مش أى حد يضحك عليها بكلمتين تسلم نفسها له حتى لو كان بيحبها بجد

فى النهاية المشكلة كبيرة وبتكبر وبتنتشر بشكل غير طبيعى وفيه بنات وشباب كتير جدا شايفين أنه عادى جدا أو ان ده التطور الطبيعى للحب

هنوصل بقى لنقطة الدين واللى أكيد بتحرم العلاقات دى ومهما كل البنات والولاد دول حافظوا على كون البنت بنت ده ما يمنعش أن كل حاجة بتحصل حتى لمسة الأيد غلط وغلط كبير جدا وحراااااااااااااااااااااااام

زمان وكان يا ماكان كانت اللى بتفكر بس مجرد التفكير فى واحد وما بيتعداش الموضوع موضوع العقل والتفكير مش أكتر كانت بتعتبر نفسها بتعمل حاجة غلط وكبيرة قوى وبتحاول ما تعملهاش

ولكن ياترى إيه اللى حصل خلى البنات تبيع نفسها كده وإيه اللى حصل وخلى الولاد يستسهلوا كل حاجة كده

ما هو الغلط مشترك بين الأتنين والأتنين عقولهم وتفكيرهم بقت محتاجة إعادة تأهيل وبناء من جديد ولكن هل فيه أمل عقولهم دى تتغير وترجع تانى طبيعية

ياريت أعرف رأيكم ووجهه نظركم وإيه الحل علشان ترجع قيمنا من جديد تنتشر بدل الأفكار الغريبة اللى بقت مسيطرة على عقول الناس

بقلم بسمه عبدالباسط

هو صحيح الحب بيختفى

اختفاء الحب بعد الجواز موضوع قتل بحثا ولكن مازال عندى فضول كبير أعرف الأسباب اللى بتخلى الحب يهرب من الشباك لما المأذون يدخل من الباب وتبقى الحياة روتينية ممله وتبقى الناس زى اللى مربوطين فى ساقية عمالين يلفوا حوالين بعض وحوالين نفسهم وعايشين فى خنقة ومشاكل وعدم تفاهم مالوش نهاية

والحكاية بسيطة قوى كل ما أكلم واحدة صاحبتى أو أعرفها بأى طريق ومتجوزة وتيجى سيرة البيت والجواز والعيال الاقى كم من الخنقة والتريقة واللعن فى الجواز وسنين الجواز وفى الراجل والعيال وفى العيشة كلها وطبعا بعد كم الأكتئاب اللى بيشع من كلامهم فجأة الاقى التفاؤل نزل تانى وأسمع السؤال المحفوظ ها مفيش حاجة

بالذمة بعد الكلام اللى بسمعه منهم هيبقى عندى نفس أعمل حاجة ده حتى لو فيه حاجة هقتلها بدل ما أدخل فى نفس الساقية دى

والأهم أن مش كلهم جواز صالونات ولا جواز حب بس ولكن من ده على ده ولكن فى النهاية كل كلامهم بيبقى متشابه يعنى مش فارقة فى النهاية لا الجواز عن حب ولا جواز صالونات ولا حتى مساطب وطبعا دة بناء على تجاربهم والكلام والحاجات اللى بشوفها منهم

وأكيد الكلام دة موجود حوالينا فى ملايين المتجوزين والغريب أن قبل جوازهم بيبقوا حاجة وبعد الجواز بيتغيروا ويتبدلوا ويلبسوا نضارة سودة للحياة وبيحسوا أن الجواز نهاية المطاف والحياة وبكده هما نهوا رسالتهم فى الدنيا

طيب لو كان هو ده الحال وفعلا الحب بيهرب من الشباك أول ما المأذون بيدخل من الباب أمال هما عايشين مع بعض لية شفقة يعنى

يعنى لو مفيش حب حتى لو أتولد بعد الجواز أمال الناس هتعيش مع بعضها لية بيعذبوا نفسهم وخلاص ولا هيا بتتجوز علشان لازم تتجوز وبس

هو أكيد الحياه مابتكونش حب فى حب وكلام حلو ورمانسيات على طول وأكيد لازم يكون فيه مشاكل ومنغصات كتيرة ودى الحياه العادية لكن حكاية أن الحب مايبقاش موجود وينتهى دى بجد مش قادرة أصدقها أمال أحنا هنعيش مع بعض لية لو ماكناش بنحب بعض أو لو ما حاولناش نحب بعض

ومازلت طارحة السؤال اللى مقدرتش أوصل لأجابة نهائية ليه

هو صحيح الحب بيختفى ؟؟

بقلم بسمه عبدالباسط

دى عادتنا ولا هنشتريها

العادات والموروثات المصرية الأصيلة اللى مهما عدى عليها سنين بتفضل زى ما هيا كل حاجة بتتطور وتتغير الا العادات دى بتفضل زى ما هيا ويمكن بنزود عليها شوية كمان

وغالبا بتبقى الستات عامل مشترك وأساسى فى فعل العادات دى وتحريض المحيطين على تنفيذها

عادات الزاوج

من أول ما بيتم الأتفاق بين الأسرتين وتبدأ الزيارات وكل زيارة ليها معنى ومدلول وهدايا كتيرة لا تعد ولا تحصى

والعادات دى يمكن متأصلة أكتر فى الأرياف والمدن اللى مش كبيرة قوى

رد الشبكة

ودة بيبقى بعد شرا الشبكة مباشرة ولازم العروسة وأهلها يجهزوا زيارة معتبرة مكونة من أنواع كتيرة من الطيور بالأضافة الى الرز والسكر والزيت والشاى والفاكهة وكل اللوازم الأساسية واللى مش أساسية كمان

تخيلوا بقى كل ده بيدخل له فى كام وإيه لازمته أصلا !!!!!!!!!!!!!!

والغريب أن ممكن يكون الأتنين ما أشتروش شبكة وكل اللى جابوه دبلتين ومحبس وخاتم مثلا وبيبقى رد الشبكة تقريبا ثمنه أضعاف ثمن اللى أشتروة ده

حرب المواسم والزيارات

بعد كده كل طرف بيحاول يبين مهاراته كأنه داخل حرب وكل زيارة لازم ياخدوا معاهم حاجات كتيرة وغالبا بتبقى موازية فى قيمتها المادية للحاجات اللى جات لهم فى الزيارة اللى قبلها فبيردوها وتستمر الزيارات ورد الزيارات بطريقة مستفزة وبتستهلك فلوس كتير جدا بالأضافة الى المواسم وطبيعى أحنا شعب مبتكر دايما وكل حاجة نعملها موسم وليها أحتفال وطقوس مختلفة وتبقى الزيارة من أهل العريس للعروسة متكلفة قد كده وطبعا ما ينفعش أهل العروسة يروحوا بعد كده لزيارة أهل العريس وإيدهم فاضية أو معاهم هدية بسيطة ولازم ياخدوا حاجات قيمتها المادية موازية للى جالهم قبل كده

والمواسم متعددة ومتشعبة ومتفرعة وهيا ( عيد الفطر ، عيد الأضحى ، عاشوراء ، شم النسيم ، عيد الأم ، المولد النبوى ، رمضان ، رجب ، شعبان ) وبكرة يضموا ليها عيد الزلانطين وعيد الشرطة وعيد العمال وعيد النصر وعيد الفلاح والعيد القومى والسيرك القومى وعيد الوكسة وعيد الأسرة

ومفيش تعليق ممكن يتقال على كم الفلوس والهدايا والحاجات اللى بتفضل رايحة جاية ما بين أسرة العريس والعروسة لحد ما يتم الجواز وللأسف الناس دماغها مازالت محتاجة إعادة تأهيل وبناء علشان يفهموا أن التكاليف والمظاهر الكدابة دى ولا ليها أى قيمة

ولكن لا حياة لمن تنادى

فرش العفش

فرش العفش فى بيت العروسين مش مقتصر على المقربين منهم ويروحوا يساعدوهم لا ده بيبقى مولد وصاحبه غايب أو تقريبا بتجيلة نقطة من اللى بيحصل لأنكم هتلاقوا كل عيلة العريس والعروسة وأحتمال البلد كلها جاية ومش جايين علشان يساعدوا فى الفرش لا دول جايين يتفرجوا على العفش وعلى الحاجات اللى العروسة جيباها من سجاجيد ، ستاير ، لوازم المطبخ والنيش اللى مازال أنتيكة والناس بتتعامل معاه على أعتباره المتحف والحاجات اللى فيه للفرجة وبس

بالأضافة الى فرجة الناس على الملايات والبطاطين الخ وخاصة بقى لبس العروسة ولأنهم للأسف ماعندهمش حاجة أسمها خصوصية وما سمعوش عنها قبل كده

عروسة محبوسة

من العادات اللى نفسى أعرف أصلها من فصلها موضوع أن العروسة ما تخرجش بعد الجواز من بيتها قبل أسبوع ودة منتشر جدا فى البلاد الأرياف العروسة ممنوعة منعا باتا من الخروج من البيت قبل أسبوع من بيتها وفيه ناس عندها أكتر من كده

بالأضافة الى الخرافات اللى بتحصل زى مثلا ما يخلوش العروسة والعريس يدخلوا بيتهم يوم الفرح برجلهم لازم حد يشيل العريس ويطلع بيه السلم حتى لو كان مليون دور ويدخله البيت وهكذا العروسة

الصباحية

طبعا الموضوع لسة ما أنتهاش ومش معنى أن الأتنين أتجوزوا كده خلاص بقى الناس هتهدى لا دة لسة فيه بلاوى

يوم الصباحية بقى لازم أهل العروسة يروحوا لها ومعاهم زيارة طبعا كلها أكل وشرب فاكرين رد الشبكة كدة دى بتبقى زيها بس أضعاف أضعافها ولازم تتحط فى عربية مفتوحة ويلفوا بيها البلد كلها علشان تتفرج عليها وتعرف أن أهل العروسة مش مقصرين معاها فى شىء

وبعد ما بتوصل الزيارة لبيت العروسة ياريتها مثلا بتستفيد منها أو أهل العريس ولكن اللى بيحصل أنها بتتوزع على عيلة العريس وأهل العروسة أحيانا !!!!!!!!!!!!!!!!!!!!

وبيفضل موضوع المواسم بالنسبة لأهل العروسة مستمر ولازم برضة أى موسم يروحوا لها ياخدوا حاجات كتيرة ومش بس المواسم دة لو زيارة عادية لازم يكونوا محلمين وشايلين

النقطة

زى ما كلنا عارفين أن لكل فعل رد فعل وكل مناسبة عندنا لازم نخترع لها نقطة اللى هيا الفلوس

يوم قراية الفاتحة لازم أهل العريس ينقطوا العروسة

يوم الحنة لازم عيلة العريس والمعارف والجيران والأصحاب تنقطة وهكذا بالنسبة للعروسة

يوم الصباحية برضة بيبقى فيه نقوط للعروسين من الناس اللى بتزورهم

أول مولود له نقطة

تانى مولود له نقطة

لحد المولود المليون برضة له نقطة

ودة غير المواسم اللى لازم مع الزيارة يبقى فيه فلوس برضة يديها العريس أو أهله للعروسة

وكفاية كده لأنى حاسة أنه هيجيلى نقطة

بقلم بسمه عبدالباسط