RSS
Wecome to my Blog, enjoy reading :)

Saturday, January 16, 2010

أمنحنى الحب

هل تتعارض المشاعر مع كون الشخص عملى وبيحب شغله وناجح فيه ؟


سؤال بسأله لكل الشباب والرجالة ولكل البنات والستات ولكل الناس عامة


أيه علاقة البرود والجمود فى المشاعر اللى بيصاحب الناس العمليين ياريت حد يفهمنى


لية دايما أى واحد بيربط نجاحه فى شغله وتفوقه فيه ببرود مشاعره وعدم الأهتمام بمشاعره تجاه خطيبتة أو مراته ودايما تلاقية بيتحجج بأنه أنسان عملى وعايز ينجح فى شغله


هيا المشاعر هيا اللى هتخليك ما تنجحش فى شغلك ؟


ولا نجاحك فى شغلك هيعوض خطيبتك أو مراتك عن برودك ناحيتها


عزيزى الرجل أو الشاب المقبل على الأرتباط المشاعر حاجة كويسة ومهمة جدا بين أى أتنين ومش بنقول تفضل تحب فيها طول اليوم لأن هلاقى واحد هيقولى أنا مش مراهق ودى كلمة بتتقال كتير

مين قال أننا عايزين واحد مراهق وعمال يتنحنح وطول اليوم كلام حلو ورومانسية ومشاعر


البنات والستات كمان مش مراهقات ودماغهم مش صغيرة كده ولكن كل شىء فى المعقول بيكون كويس يعنى أهتم بشغلك براحتك وأنجح فيه لأن أكيد نجاحك هيفرح الطرف التانى

ولكن ماتنساش الطرف التانى وتهمل مشاعره وما تسمعوش كلمة حلوة وأنت أصلا ممكن تكون بتموت فى الطرف التانى بس متخيل أن أعترافك وتصريحك بمشاعرك ضعف أو هيقلل منك قدام الطرف التانى


أهتم بمن تحب وعبر له عن مشاعرك وأمنحه الشعور بحبك وأطرب أذنية ببعض الكلمات الجميلة سوف تجد حياتك تتغير للأفضل


والنصيحة دى للطرفين ومش لطرف واحد بس


بقلم بسمه عبدالباسط




Wednesday, January 13, 2010

السلبية وسنينها

أوعى لما حد يعملك حاجة تتكلمى ؟


خليكى فى حالك ومالكيش دعوة بحد


ما ترديش على أى حد يعاكسك أو يضايقك


وملايين من النصايح اللى بتتقال للبنت من ساعة من توعى على الدنيا وتبدأ تروح وتيجى واللى بتكون نابعة من السلبية الشديدة اللى ضيعت كل حاجة حلوة فى حياتنا


أنا مش هتكلم عن موضوع التحرشات من ناحية لبس البنت هو السبب ولا لا ولا ديانتها ولا حجابها ولا الكلام ده ولكنى هتكلم عن السلبية اللى وصلتنا لكل اللى بيحصل ده بغض النظر عن لبس البنت أو ديانتها أو كانت محجبة ولا لا أو ماشية لوحدها وفى حالها ولا لا

هو لية فى ناس كتيرة بتأكد على البنت ما تتكلمش لما حد يعمل لها حاجة حتى لو كانت الحاجة دى مجرد كلمات معاكسة عادية جدا ؟

لية البنت ما تردش وتاخد حقها وتوقف اللى كلمها كلام مش كويس عند حده ؟

وجايين دلوقتى نشتكى من كم المعاكسات والتحرشات اللى بيحصل

معلش مع أعتذارى للجميع أحنا اللى عملنا فى نفسنا كده أيوة السلبية بتاعتنا هيا اللى خلت الولاد والرجالة متأكدين مليون فى الميه أنهم مهما عملوا مفيش واحدة هتنطق ولو عدينا على أيدينا كام واحدة لما حد بيضايقها بترد عليه أو لما بيعمل فيها حاجة بتحاول تاخد حقها ساعتها هتعرفوا أن السلبية اللى عشنا فيها سنين وسنين هيا اللى وصلتنا لكده

لأن كل واحد متخيل ومتأكد مليون فى الميه أنه مهما عمل مفيش واحدة هتتكلم وهتسكت وخلاص زى ما الكل بيسكت لأنها لو أتكلمت هيتقال عليها كلام مش كويس وملايين الحاجات اللى موجودة فى دماغ كل البنات واللى زرعها فيها المجتمع من زمان

والمشكلة أنه ما بقاش فيه فرق بقى بين واحدة ماشية فى حالها ولبسها كويس ولا ماشية مع والدتها ولا والدها ولا ماشية لوحدها ولا لبسها مش كويس ولا مش ماشية محترمة كله مابقاش فارق لأنه خلاص بقى معروف أنه محدش هيتكلم لأن السلبية طبع أصيل فى الناس


يعنى إيه واحدة ترد على واحد وتهزأه لما يعاكسها لا لا الناس هتقول عليها بنت مش كويسة


بجد حرام عليكم التفكير ده وحرام تزرعوا فى بناتكم الخوف والسلبية علموهم يتكلموا ويقولوا كلمة الحق علموهم ما يسيبوش حقهم يمكن ساعتها نقدر نمشى فى شوارعنا بأمان


كفاية سلبية بقى لأنها السبب الرئيسى والأساسى فى أنتشار المعاكسات والتحرشات والمشكلة أن السلبية مش فى البنات وبس اللى بيخافوا يتكلموا لا دى كمان فى الولاد والرجالة اللى ممكن واحد منهم يشوف واحدة بتتعاكس أو حد بيضايقها ويقف يتفرج ويقول أنا مالى وأدخل نفسى فى مشاكل لية

ما أنت لما تشوف واحدة ما تعرفهاش النهاردة وتقول أنا مالى بكرة هايجى الدور على أختك أو مراتك أو بنتك وواحد تانى يشوفهم فى نفس الموقف ويقول أنا مالى


أرجوكم كفاية سلبية لأننا خلاص وصلنا لمرحلة ما بقاش ينفع معاها السكات


علموا بناتكم وولادكم أزاى ما يكونوش سلبيين


عرفى بنتك ولا أختك أنه مش عيب لو حد ضايقها أنها تحاول توقفه عند حده ممكن مرة والتانية والثالثة ما يهموش ويسوق فيها ولكن لو كل البنات عملت كده وكل الولاد شافوا البنات ما بتسكتش عن حقها أعتقد مرة مع التانية هيخافوا يعملوا حاجة


ولو شافوا ولد ولا راجل بيقف ليهم فى لحظة وهما بيعاكسوا أى بنت مرة مع التانية هيخافوا


بلاش ثقافة الخوف وأنا مالى وخلينى فى حالى


لأننا هندفع ثمنها غالى قوى


بقلم بسمه عبدالباسط



 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes