RSS
Wecome to my Blog, enjoy reading :)

Wednesday, October 30, 2013

روح جديدة



أحببتك لدرجة جعلت روحى قطعة منك
فلا طعم للفرحة إلا بك ولا معنى للابتسامة إلا إذا كانت لك
وعندما افترقنا تركت لك روحى لتعيش بها لأنك بكل بساطة كنت منبهر بكل شىء فيها ولم تستطع أبدا العيش بدونها
وظهرت داخلى روح جديدة جعلتنى أعيش من جديد وأرى كل شىء على حقيقته

أما أنت فلك الله لأنك الى الآن تعيش بى حتى لو كنت تحاول إخفاء هذا فروحى مازالت بداخلك تحرك كل شىء فيك


_____________________________

لمزيد من الخواطر والمقالات على صفحة الفيس بوك

صفحة بسمه عبدالباسط


Saturday, October 26, 2013

مواقف بعد الانفصال (1 )



_ من أسوأ الحاجات اللى ممكن تسمعها أى واحدة بعد ما تنفصل عن جوزها

( بس خراب البيوت مش سهل ) ، ( الناس بتبص بصه وحشة للمطلقة )

( ما كنتى استحملتى وخلاص ) ، ( هتعملى إيه دلوقتى بقى هتبقى مجبرة تقبلى بفرصة أقل من اللى انتى فيها )

يعنى فى عقل بالكم كده فيه واحدة عايزة تخرب بيتها ولا ما حاولتش تستحمل بس ما نفعش

وبعدين لو المجتمع هيبص ليها بصه وحشة يبقى انتوا السبب عشان دماغكم اللى مش نضيفه واللى بتحرم شىء حلله الله ولان كل الناس مش ظروفها زى بعضها عشان نعمم كل حاجة

ولأن أغلب اللى بيقولوا الكلام ده ستات فهنتوقع إيه بقى من الرجالة ده حلو قوى اللى هما بيعملوه

وعشان خاطر سيادتك ما جربتيش ولا عرفتيش يعنى إيه استحالة العشرة بينك وبين جوزك وكان لازم تسيبيه فماشية تلقحى بكلام هنا وهناك
ولازم الأجيال اللى تيجى من تربيتك يبقى تفكيرها متخلف زى تفكيرك

وهايجى يوم وكل واحدة جرحت واحدة بكلامها هتجرب كل ده إذا ماكانش فيها هيبقى فى حد قريب قوى منها عشان تحرم ترمى أى كلام وعشان تربى عيالها صح


_ حاجة تانية بعض الرجالة اللى هما مش رجالة أصلا دى مش مشكلتهم دى مشكلة الستات
أيوة الستات لأنكم لو عرفتوا تربوا ولادكم ماكناش هنلاقى الأشياء اللى بقت ماليه البلد دى اللى شكلهم من بره رجالة وهما أصلا ما يعرفوش أى حاجة عن الرجولة
ياريت تربوا نفسكم الأول عشان تعرفوا تربوا ولادكم صح

كفاية بقى خنقتونا ومليتوا البلد من المسخ اللى لا ليه لون ولا طعم ولا ريحه اللى اسمه رجالة

وقبل ما يجى حد يقولى انتى بتغلطى فينا أنا قلت ( بعض ) أعتقد واضح الكلام


_ حاجة مهمة كمان فيه ستات كتيرة نفسها تنفصل ولكن لان مالهاش حد أو إن أهلهم مش موافقينهم ولا واقفين معاهم أو عشان مالهاش مصدر دخل أو عشان عارفة إن الراجل مش هيديها أى حق من حقوقها وهيساومها على كل حاجة وخاصة لو هيا اللى عايزة تنفصل مجبرين إنهم يفضلوا عايشين تحت سقف واحد وهيا من جواها قرفانة منه ومش طايقاه

ولفوا ودوروا كده فى كل الناس اللى انتوا تعرفوهم واللى ما تعرفوهمش وهتعرفوا إن كلامى صح

بالإضافة الى انهم بيبقوا خايفين من نظرة المجتمع ليهم ويمكن دى أكتر حاجة مخليه ستات كتيرة لحد دلوقتى مستحملة اللى هيا فيه وساكته عشان مؤمنة جدا بمثل ضل راجل ولا ضل حيطة حتى لو كان الراجل ده ما حصلش حتى قالب طوب واحد

وللحديث بقية
 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes