البنات عايزة إيه

اهو جه ياولاد

2011-07-31T02:39:00.000+02:00

كل سنه وكلكم طيبين ورمضان كريم عليكم ويارب يكون أحلى رمضان وربنا يغفر لنا كلنا ذنوبنا ويعتقنا من النار ويكتبنا من أهل الجنة إن شاء الله

المرأة الشرقية بين ظل الرجل وظل الحائط

2011-07-13T21:10:00.002+02:00

حاولت كثيرًا أن أصل لحقيقة تمسك المرأة بوجود الرجل في حياتها أيًّا كان هذا الرجل، حتى ولو لم يكن رجلًا بمعنى الكلمة، ولا يوجد له تأثير حقيقي في حياتها، ولكنها تريده، معتقدة بالمثل الشعبي القديم: (ضل راجل ولا ضل حيطة)!!
وظللت أبحث كثيرًا وكثيرًا حولي وفي كل من أعرفهم ولا أعرفهم؛ لكي أصل لحل لهذه العقلية التي تصر على إذلال نفسها، وتظل طوال حياتها في عذاب ومشاكل، ولكنها تفضلها عن الانفصال عن زوجها، أو عن عدم الزواج - إذا كانت غير متزوجة.

فلم لا، فبالنسبة لهن (ضل راجل ولا ضل حيطة)!! ولكن ما الذي سوف تستفيده من هذا الظل الذي لا يفعل شيئًا في حياته ولا حياتها، ولكنه مجرد إنسان موجود لا يقدم ولا يؤخر، ويعاملها أحيانًا كثيرة بعنف وقسوة...

ولكن لا أستطيع أن ألقي اللوم عليهم، فمن تفكر في نفسها هكذا، وتعمل بهذا المثل، لا تلوم غير نفسها؛ لأنها هي التي أعطتهم الفرصة لكل ما يحدث...
وللأسف الشديد إن تطبيق هذا المثل لا يقتصر فقط على بعض الطبقات أو الفئات، ولكنه مثل العدوى منتشر في كل الطبقات!!

ولكن هل سوف نختصر دور الرجل في وجوده كظل، ولكن أي ظل هذا؟ لو كان ظلًّا حقيقيًّا ومصدر أمان وسعادة وسكن وطمأنينة فلا بأس به، ولكن إذا كان ظله لا يمثل شيئًا ولا يقدم ولا يؤخر فما فائدته؟ فوقتها سوف يكون مثل خيال المآتة.

فالمسألة ليست جوازة والسلام، والمفزع في الأمر هو اكتشاف العديد من السيدات حقيقة أزواجهن بعد الزاوج، وأنه لا وجود حقيقي لهم في حياتهن، وأنهم مصدر بؤسهن طوال حياتهم، بالإضافة إلى الإهانات والضرب في أحيان كثيرة!!

فلماذا ترضى المرأة بكل هذا الذل الذي يكون أحيانًا كثيرة غير قاصر على ما يحدث من إهانات بينها وبين زوجها داخل المنزل، ولكنه يحدث في الشارع، وفي أي تجمع، وكثير منا رأى هذا بعينيه مرات عديدة.

ففي خلال سيري في الشارع أرى بعيني الكثير من الأزواج يتشاجرون مع زوجاتهم بصوت مرتفع، ولا تخلو هذه المشاجرة من إهانتها علنًا، وفي الشارع، وأحيانًا يصل الموضوع للضرب!!
فماذا حدث لهؤلاء الرجال؟ ولماذا هذا الموقف السلبي من السيدات على ما يحدث؟

ففي مرة رأيت رجلًا وزوجته، وكانت زوجته تحمل طفلهما، وواضح جدًّا من شكل ملابسهم أنهم من وسط اجتماعي جيد، ولكن ما لفت نظري إليهم هو ارتفاع صوت الرجل في كلامه مع زوجته، والتلفظ بألفاظ غير لائقة بالمرة لاستخدامها مع امرأة، والعجيب أنها كانت صامتة حزينة لا تنطق بأي كلمة، وتحتضن ابنها الصغير كأنها تحتمي به، وزوجها لا يكف عن الكلام والشجار معها، وعندما نظرت إليه وجدته ينظر لي متعجبًا من أني لاحظت ما يفعله، كأنه كان يتحدث بالهمس، وعندما دققت النظر لها وله، نظر إلي نظرة معناها: (عايزة إيه أنتي كمان.. روحي لحالك بدل ما أوريكي شغلك زيها)!!

مرة أخرى كنت مع والدتي في الشارع، ورأينا فئة أخرى، وهي فئة غير المتعلمين، وواضح من طريقة ملابسهم الطبقة التي ينتمون لها..
كان الزوج يتشاجر مع زوجته ومعهما ابنهما الصغير أيضًا، ولكن هذه المرة كان الشجار بالأيدي، بالإضافة إلى الألفاظ الخادشة للحياء، وكان معهما رجل آخر من الحين والآخر يحاول فض الاشتباك، لكن العجيب أنه كان يشاهد ما يحدث كأنه شيء عادي، وفي خلال المشاجرة أخذت السيدة موبايل هذا الرجل لتتصل بشخص طرفها ليأتي ليضرب زوجها!! وكأن كل همها ليس الإهانة التي حدثت لها، ولا أنها تريد الطلاق أو الانفصال عنه، ولكن كل ما كانت تريده رجلًا يضربه ليأخذ حقها فقط!!
ومن الملاحظ أن هذه الطبقة لا يوجد عندها أدنى اعتراض على الضرب أو الإهانة بينهم، فهذا شيء طبيعي ورأيته كثيرًا...

موقف آخر لرجل وزوجته يسكنان في عمارة في الشارع الخلفي لمنزلنا، وتقريبًا كل أسبوع أو أقل أسمع صوت شجارهما الذي لا يخلو من العبارات غير اللائقة، بالإضافة إلى الضرب والجري على السلالم، مع الضرب طبعًا!! وتحدث مثل هذه المشاجرة بصفة دائمة ومتكررة.

وكثيرًا في وسائل المواصلات المتعددة نستمع للكثير من المشاجرات بين أي زوج وزوجته كأنهما ليسا في مكان عام وكل من حولهما يسمع ما يحدث!!

وبغض النظر عن طبيعة أي رجل يسمح لنفسه بإهانة زوجته، سواء كانت تستحق هذا أم لا، لكن لماذا تتمسك المرأة بمثل هذا الرجل الذي لا يراعي أي قواعد الاحترام؟

لماذا دائمًا تتمسك المرأة بوجود الرجل في حياتها أيًّا كانت صفاته وطباعه؟

لماذا ومليون لماذا لم أجد لها إجابة حتى الآن، والإجابة تتلخص عند هؤلاء في جملة: (ضل راجل ولا ضل حيطة)!!

بقلم بسمه عبدالباسط

يوم التدوين ضد التحرش الجنسى ( كرهت كوني أنثى.. مع أني أحبها

2011-06-20T12:56:00.002+02:00

كرهت كوني أنثى.. مع أني أحبها

خطبوها استعجلت طلقوها أتندمت

2011-06-17T10:11:00.001+02:00

مشهد بشوفه كتير قدام المحكمة ويمكن كل يوم المشهد ده بيتكرر وهو تسليم العفش بتاع المطلقات وبغض النظر عن ظروف كل طلاق أو إيه الأسباب وبغض النظر كمان عن سن المطلقات اللي ممكن يبقى صغير

فيه ملاحظة تانية إن الجواز ممكن ما يكونش كمل شهرين ثلاثة !!!

طبعا فيه أسباب كتيرة للطلاق ولكن من أهم الأسباب مؤخرا هو الاستعجال بمعنى أن البنت وأهلها ما بيصدقوا يلاقوا عريس وهوب يمسكوا فيه بأيديهم وسنانهم عشان تلحق قطر الجواز اللي جنن كل الناس ده وطبعا ما بيهمهمش السؤال عن العريس ولا عن أخلاقة ولا ظروفه وبتكون النتيجة اكتشاف حاجات كتيرة بعد الجواز

بالإضافة إلى أن الناس ممكن تستعجل في الجواز بدون ما الطرفين ياخدوا على بعض ويتقبلوا طباع بعض وممكن تكون فيه ناس ما بيشوفوش بعض مرتين ثلاثة وبسرعة بسرعة يخلصوا الجوازة وبتكون النتيجة في النهاية الطلاق

وطبعا فيه أسباب كتيرة جدا للطلاق وقبل ما حد يتهمني أنى برمي اللوم على البنت وأهلها بس كأن الراجل وأهله ملايكة هقول لهم مفيش طرف كله ملايكة ولا كله شياطين كل طرف فيه من ده على ده

ولكن اللي عايزة أركز عليه دلوقتى هو الاستعجال اللي بيبقى من ناحية البنت وأهلها بغض النظر عن أي حاجة

وبنظرة سريعة على الناس والبنات اللي حوالينا هنلاقى مثلا من بين كل عشر بنات 6 أو 7 عندهم ثقافة ضل راجل ولا ضل حيطة ولازم نلحق القطر قبل ما يدوسنا وغيره وغيره وتبقى النتيجة أنها تبقى مطلقة وبتندم بعد فوات الأوان وفى وقت ما ينفعش فيه الندم

شارع البنات

2011-05-26T02:39:00.003+02:00

العدد الأول المطبوع من مجلة البوسطجى

ما تحسبوش يا بنات إن الجواز راحة

أغنية معروفة وبنات كتيرة وستات أكتر بتغنيها وحفظاها ولكن الأغرب واللافت للنظر لما الجواز مافيهوش راحة بتتجوزوا ليه ؟
ليه بتشجعوا البنات أنهم يتجوزوا مع إنكم بتقولوا أنه مش راحة ؟
ليه بتدوروا ليهم على عرسان عشان يلحقوا القطر قبل ما يجرى ويسيبهم

كلمة أخيرة أحب أقولها وأنا بكامل قوايا العقلية مازالت الست بتخاف على نفسها وبيتها وجوزها من الحسد وعشان كده حتى لو كانت مبسوطة وكل شيء تمام لازم تقول أنها مش مبسوطة وأول ما تكلميها تشغل أسطوانة الزن والنكد وتفضل تلعن في الجواز وفى الراجل والعيال عشان تبعد عنها العين !!

زفة التوك توك

صدق أو لا تصدق زفة بالتكاتك
أينعم زفة بالتكاتك وشفت بعيني محدش قالي
في عادة بعض البلاد إن جهاز العروسة لازم يتعمل له زفة بالعربيات والموتوسيكلات ولكن أحدث صيحة زفة التكاتك
جهاز العروسة محطوط على العربيات وحواليهم وقدامهم ووراهم كذا توك توك بيزفوا الجهاز
هل ممكن الخطوة الجاية تبقى زفة الفرح في توك توك برضة ؟؟

خطبوها استعجلت طلقوها أتندمت

مشهد بشوفه كتير قدام المحكمة ويمكن كل يوم المشهد ده بيتكرر وهو تسليم العفش بتاع المطلقات وبغض النظر عن ظروف كل طلاق أو إيه الأسباب وبغض النظر كمان عن سن المطلقات اللي ممكن يبقى صغير
فيه ملاحظة تانية إن الجواز ممكن ما يكونش كمل شهرين ثلاثة !!!

طبعا فيه أسباب كتيرة للطلاق ولكن من أهم الأسباب مؤخرا هو الاستعجال بمعنى أن البنت وأهلها ما بيصدقوا يلاقوا عريس وهوب يمسكوا فيه بأيديهم وسنانهم عشان تلحق قطر الجواز اللي جنن كل الناس ده وطبعا ما بيهمهمش السؤال عن العريس ولا عن أخلاقة ولا ظروفه وبتكون النتيجة اكتشاف حاجات كتيرة بعد الجواز
بالإضافة إلى أن الناس ممكن تستعجل في الجواز بدون ما الطرفين ياخدوا على بعض ويتقبلوا طباع بعض وممكن تكون فيه ناس ما بيشوفوش بعض مرتين ثلاثة وبسرعة بسرعة يخلصوا الجوازة وبتكون النتيجة في النهاية الطلاق
وطبعا فيه أسباب كتيرة جدا للطلاق وقبل ما حد يتهمني أنى برمي اللوم على البنت وأهلها بس كأن الراجل وأهله ملايكة هقول لهم مفيش طرف كله ملايكة ولا كله شياطين كل طرف فيه من ده على ده
ولكن اللي عايزة أركز عليه دلوقتى هو الاستعجال اللي بيبقى من ناحية البنت وأهلها بغض النظر عن أي حاجة
وبنظرة سريعة على الناس والبنات اللي حوالينا هنلاقى مثلا من بين كل عشر بنات 6 أو 7 عندهم ثقافة ضل راجل ولا ضل حيطة ولازم نلحق القطر قبل ما يدوسنا وغيره وغيره وتبقى النتيجة أنها تبقى مطلقة وبتندم بعد فوات الأوان وفى وقت ما ينفعش فيه الندم

شارع البنات :)
إعداد وإشراف بسمه عبدالباسط

أماكن توزيع مجلة البوسطجي ..
فيرجن
مكتبة البلد .. مدبولى
وعمر بوك ستور
وكومت وكنوز
بوسط البلد
مكتبة ديوان جامعة القاهرة
مكتبات الشروق بسيتى ستارز والزمالك والقربة وفرست مول وطلعت حرب
المكتبة العصرية بالمنصورة
مكتبة فكرة بالاسكندرية
بوك سنتر بروكسى
ومكتبة الفرجانى بالخليفة المامون

الرجالة عايزين إيه؟

2011-04-19T00:46:00.003+02:00

وبما إن الستات نص المجتمع، وفيه ناس ما زالت شايفاهم كائنات معقدة ومش سهل أنهم يفهموها، كان لازم ما نهملش النص التاني برضه اللي فيه ستات شايفين إنهم معقدين وصعب فهمهم والتعامل معاهم، ولأني مش ضدهم، ولا جوايا أي اضطهاد ليهم، ولا أي مشاعر سلبية، علشان كده حاولت أتوصل لشوية حاجات الرجالة فعلًا عايزينها من الستات، وحاولت على قد ما أقدر أكون منصفة ليهم زي ما كنت منصفة للستات..

أي راجل في الدنيا بيكون محتاج إن الست تكون سنده ونصه التاني في الحياة.

تكون سكنه والحضن الدافي له.

عايزها ذكية، مثقفة، رقيقة، رومانسية... إلخ من الصفات اللي محدش يختلف عليها.

عايزها تشاركه كل حياته، وتقف جمبه في كل خطوة، وتشجعه وتدِّيه دايما الحافز لأنه يكون الأحسن.

الراجل عايز الواحدة تكون زوجته وحبيبته وأمه وأخته وصديقته وكل دول لازم يتعملوا بذكاء.

وزي ما بيقول الرسول عن المرأة حين سئل: أي النساء خير؟ قال: "التي تسره إذا نظر، وتطيعه إذا أمر، ولا تخالفه في نفسها وماله بما يكره"...

وقال صلى الله عليه وسلم: "ألا أخبرك بخير ما يكتنز المرء؟ المرأة الصالحة؛ إذا نظر إليها سرته، وإذا أمرها أطاعته، وإذا غاب عنها حفظته".

تعرفوا تبقوا كده؟ وتشوفوا إيه اللي المفروض تعملوه، وإيه اللي المفروض ما يتعملش؟

أكتر حاجات بيكرهها الرجالة في أي ست

البنت أو الست المسترجلة..

النوع ده بيضايق الرجالة بشكل غير طبيعي، ودايمًا الواحدة اللي بتبقى عايشة دور الولد وبتتكلم وتتصرف بطريقتهم بتسبب نوع من الاشمئزاز من الرجالة ناحيتها.

فخلي بالك إن تصرفاتك المبالغ فيها ودور الولد أو الراجل اللي ممكن تكوني متقمصاه ومتخيلة أنك كده كويسة، بيعمل نوع من أنواع الكره ليكي من جانب الرجالة..

الرغي عمَّال على بطال..

الكلام الكتير والمجادلة بهدف المجادلة بس، ومش بهدف الوصول لنتيجة من الكلام، دي حاجة بتخلق جو من الإزعاج وخنقة للراجل، وخاصة لما يبقى بيتكلم في موضوع مهم جدًّا وعايز يوصل لحل فيه، وأنتي عمَّالة تجادلي وبس بدون ما توضحي وجهه نظرك ولا تقولي رأيك، ولكنك مصممة تتكلمي وتظهري نفسك مش أكتر..

الطبع ده هو اللي بيخلي رجالة كتيرة تتبع أسلوب الصمت الرهيب مع أي واحدة، ويعمل اللي في دماغه وما يفكرش يتناقش ولا ياخد رأي أي واحدة في أي حاجة...

الست المادية..

طبعًا الماديات والمشتريات اللي مالهاش لازمة وعمَّال على بطال شيء مزعج جدًّا وبتضايق الراجل؛ حتى لو معاه فلوس.

ولما يحس أن الست معتبراه مجرد بنك ومفيش حاجة بتكفيها وكل شوية هات هات هات وعايزة تجيب أي حاجة وكل حاجة.

وخاصة لما تربط علاقته ودليل حبه ليها بالماديات وبأنها عايزة كل شوية هدية، ويا ريتها مثلًا هدية بسيطة لا ده لازم تكون غالية جدًّا جدًّا!!

النوع ده من الستات بيكرهه كل الرجالة، حتى لو كانوا مليونيرات والفلوس مش فارقة معاهم..

الغيرة الزيادة..

مفيش راجل ما بيحبش يحس بغيرة الست عليه، لكن - وآاااه من لكن دي - لما الغيرة دي تبقى زيادة عن الحد وتبوَّظ حياة الراجل وأحيانًا بتدمرها!!

أي واحد بيبقى عايز يحس بغيرة الست عليه، لكن مش الغيرة اللي تخنقه وتخليه يطفش وما يرجعش تاني..

الحشرية..

آاااااااه من التدخل في كل حاجة وأي حاجة تخصها أو ما تخصهاش..

دي من أكتر الحاجات اللي بتضايق الراجل تدخُّلها في اللي ليها واللي مش ليها، ولأن ده بيعمل مشاكل كتيرة جدًّا..

الدلع الرخم..

الرجالة بتحب الدلع أكيد، لكن فيه دلع رخم جدًّا ومالوش طعم ولا لون ولا ريحة، زي مثلًا كلمة (بيبي) اللي فيه بعض منكن بيقولها للرجالة!!

النكد..

الست النكدية أول عدوة لنفسها قبل ما تبقى للراجل، وبتنهي علاقتها بالراجل بدري بدري، ما بتاخدش وقت طويل، خاصة لما تمتلك أدوات النكد؛ من بوز شبرين، إلى تكشيرة ما تفارقش وِشَّها، إلى عين على طول مليانة دموع، إلى خناق وزعيق عمَّال على بطَّال...

الصوت العالي..

ثاني عدو للمرأة بعد النكد، سواء كان الكلام عادي أو خناق.. الصوت العالي مش مستحب لأي واحدة، وخاصة في كلامها مع الراجل؛ لأنها بتحسسه بعدم احترامها ليه، وكل الرجالة بيكرهوا الست اللي صوتها عال وعاملة إزعاج طول الليل والنهار بسبب وبدون سبب..

ماما قالت!!

مفيش اختلاف أن علاقة الست أو الراجل بالحماه لسه بيتحط تحتها مليون خط أحمر، ومهما كانت الحماه كويسة، ولكن كتير ما بيبقاش فيه عمار بين أي حد وحماته!!

وخاصة لما الواحدة تفضل معلقة على كلمة ماما قالت، وماما رأيها، وماما شايفة، هتخلِّي الراجل يكره حماته ومراته وولاده، ومش بعيد يكره مامته ويطفش ويسيب ليهم الدنيا كلها!!

شفت أختك ولا مامتك عملوا إيه؟!!

خط أحمر وأخضر وبكل الألوان لازم يتحط تحت الجملة دي، أي واحد أيًّا كان، وحتى لو كانت أخته ومامته شياطين، وهو عارف كده وشايف بعينه، ما يحبش لا خطيبته ولا مراته تشتكي منهم، ولا تجيب سيرتهم، ولا تقول له: شفت الهانم أختك عملت إيه؟! ولا الست والدتك؟!!

اللبس المبهدل!!

ليه ثقافة اللبس المبهدل بتبقى جوه البيت وبره لأ؟!

ليه الواحدة بيجيلها غباء تجاه الشيء المسمى الهدوم؟!

مع إن أي واحدة أكتر حاجة بتشتريها في جهازها الهدوم، ولكن إيه اللي بيحصل بعد الجواز؟! ده شيء في علم الغيب...

فجأة كل الهدوم الجميلة تختفي، وتظهر الواحدة بجلابية ولا عباية مقاسها 50 إكس لارج، وطويلة، وكمها طويل، ومش بعيد تخبي شعرها كمان بخمس ست إيشاربات!!!

وفجأة بتلاقي الواحدة جالها زهد يا عيني في الهدوم، ومعظم الحاجات اللي اشترتها في الجهاز لسه شايلاها جوه الدولاب!! طيب شايلاها لمين؟!

تكونيش ناوية تستعمليهم لما تتجوزي تاني؟!!

الشكوى الكتير..

الشكوى الكتير من كل حاجة وأي حاجة، وعاااااااا عااااااااا عاااااااااا طول الليل والنهار، ده شيء مستفز وممل جدًّا، وبيكره أي واحد في عيشته كلها مش في الست بس.

شوف جوز فلانة بيعمل إيه؟!!

جملة خطيرة قوي بتغيظ أي واحد لما مراته ولا خطيبته ما يكونش عاجبها حاجة وتقوم قايلة له: شوف فلان جوز فلانة بيعمل إيه؟! ولا فلان جارنا بيعمل إيه؟!

العند

العند لمجرد العند، والعند لمجرد إثبات إنها موجودة، والعند لمجرد الغلاسة والرخامة، والعند بدون سبب واضح... من أكتر الحاجات اللي بتخنق الرجالة.

معرفة الناس أسراركم!!

طبعًا ما كدبش اللي قال إن الستات ما بيتبلِّش في بقها فولة، مع إن مش كلهم كده، بس فيه منهم كده، وفجأة تلاقي العيلة كلها والشارع والبلد والبلاد اللي جمبكم عرفت أسراركم؛ لأن حضرتك بتحكي كل حاجة حتى أدق الأسرار والتفاصيل لصحابك وجيرانك وقرايبك، وكل واحدة بتقوم بدورها في نشر الكلام والحكايات...

ومش بعيد الراجل يكون راجع من شغله يا عيني يلاقي البواب بيقول له: أخبار الصداع اللي كان عندك امبارح إيه؟!!

مراقبة الراجل..

فيه ستات أو بنات أول ما تتخطب وتتجوز تعمل فيها المفتش كرومبو، وتفضل تدوَّر ورا الراجل في كل مكان وأي مكان، وخاصة تفتيش موبايله، جيوبه، جهاز الكمبيوتر بتاعه؛ لمحاولة معرفة علاقاته في الشغل وكل حاجة بيعملها.

والحقيقة أن ممكن يكون الراجل كويس جدًّا جدًّا جدًّا، ولكن بسبب مراقبة الست له هيعمل حاجة من اتنين؛ يا هيسيبها، يا هيعمل حاجة غلط فعلًا، يا هنلاقيه صابر وساكت وبقى بيكلم نفسه، ونهايته تبقى العباسية!!

خلف خلاف!!

وده طبع في بعض الستات، كل ما الراجل يقول لها حاجة تقول له عكسها..

يقول لها: تعالي نخرج.. تقول له: لأ نقعد في البيت أحسن.. والعكس.

وهكذا في كل حاجة بقى، ودي نقطة أساسية في خنقة الراجل من أي ست، إنها تبقى خلف خلاف دايمًا وأبدًا..

المساواة!!!

حاجة مهمة قوي ومؤثرة قوي وبتضايق كل الرجالة، وهي إن الواحدة تفضل تتكلم عن المساواة، وأنها بتنادي بيها، وأنه من حقها وحق الستات يبقى فيه مساواة...

الشعر المنكوش!!

أيوه الشعر المنكوش، خير اللهم اجعله خير، الواحد يرجع من شغله يفتح باب الشقة يلاقي واحدة شعرها بقى فوقها راسها بخمس أمتار!!

ما اعتقدش يعني إن الخمس دقايق اللي هتظبطي فيهم شعرك هما اللي هيبوَّظوا الدنيا!!

وبعدين ذنبه إيه الراجل يتخض كل يوم بالمنظر اللي بيشوفه ده؟!!

------------------------
بقلم بسمه عبدالباسط

ده أول جزء من فصل الرجالة عايزين إيه من كتابى الجديد

عريس تقفيل ثورة كلاكيت تانى وتالت مرة

2011-03-17T16:18:00.000+02:00

عريس تقفيل ثورة كلاكيت تانى مرة فى موقع الشرقية اليوم
هنا

وكلاكيت تالت مرة فى جريدة نهضة مصر
العدد الأسبوعى 17،18 مارس 2011

عريس تقفيل ثورة

2011-03-11T16:03:00.002+02:00

أنا عايزة عريس من شباب الثورة

جملة ممكن تسمعها كتير الأيام دى ومن بعد ما الثورة قامت

ومع أن جيلنا والأجيال اللي بعدنا كانت كل معلوماتهم عن الثورات من كتب التاريخ والأفلام وماكانش يخطر ببال حد أبدا أننا هنعاصر ثورة ونبقى مشاركين فيها بأي طريقة من الطرق

ولكن بعد أيام قليلة من هدوء الأحوال ومن قيام الثورة وظهور سلوكيات جديدة كانت مختفية قبل كده ظهرت جملة أنا عايزة عريس من شباب الثورة

ومش بعيد حاليا لما يتقدم عريس لأى بنت يبقى السؤال الأول هو أنت من شباب الثورة ؟؟

وممكن نلاقى ورقة بالمواصفات المطلوبة في العريس الأيام اللي جاية زى

أنه يكون خرج على الأقل في 3 مظاهرات

أتضرب وأتعذب من الشرطة

وقف ما لايقل عن أسبوع في اللجنة الشعبية اللي تحت بيتهم

ما بيلبسش بلوفرات

عنده حساب على الفيس بوك وتويتر وعنده خمسين ستين صفحة مؤيدة للثورة والثوار ومعارضة للنظام القديم

يتأسف ويبدى الندم بخصوص صفحة الراجل اللي واقف ورا عمر سليمان وفى البداية يعرف هو مين ولو معرفش يبقى هو الجاني على نفسه

عنده ما لايقل عن خمس أجندات وشغل كشاكيل السلك لا يغنى عنهم

ما بياكلش كنتاكى ولا يعرف طعمه

يكون من المترددين على التحرير دايما ويعترف بقيمة هذا الميدان ولازم الزفة بتاعت الفرح تعدى على التحرير وتقف فيه شوية

يقول كل اللي يعرفه عن ( وائل غنيم ، أحمد شومان ، ماجد بولس ، موقعة الجمل )

وفى النهاية يكون أتقتل فيما لا يقل عن مرتين ثلاثة وحارب في الحلم

وأخيرا السؤال اللي بيطرح نفسه مش الشباب اللي كانوا في الثورة وشاركوا فيها بأي طريقة من الطرق هما نفس الشباب اللي كانوا موجودين قبل كده وكان فيه تار بينهم وبين البنات وكل طرف مش طايق التانى وبيطلع أي حاجة فيه عشان يرفضه وخلاص

أعتقد أننا كلنا بنات أو ولاد جوانا رواسب وموروثات محفورة جوانا ومازالت بتأثر على علاقاتنا ببعض وزى ما الثورة طلعت أحلى شباب وبنات وظهرت صفات وسلوكيات رائعة جداااااااااااا لازم نبدأ نمسح الرواسب والحاجات اللي بتضايق كل طرف من التانى ونبدأ صفحة جديدة من تانى زى ما بنبدأها في كل حاجة في حياتنا حاليا

بس ياترى هايجى فعلا اليوم وينتهي الصراع اللي خلقناه بأيدينا وعشنا فيه سنين وسنين

بقلم بسمه عبدالباسط

نهضة مصر

2011-03-08T12:41:00.002+02:00

مقال عزيزى فالنتين لبسمه عبدالباسط

جريدة نهضة مصر

العدد الأسبوعى
4مارس 2011

ثورة مختلفة

2011-02-24T03:01:00.001+02:00

من ساعة ما الثورة قامت وناس كتيرة عمالة تنادى بالتغيير مش بس بالتغيير العام ولكن بالتغيير الخاص يعنى كل واحد يغير من نفسه الأول واللى كان فيه حاجة وحشة يبدأ يغيرها

وفيه ناس لاحظت فعلا تغير سلوك ناس كتيرة فى التعامل معاهم ولكن المهم هل التغيير ده وقتى وشوية وهترجع كل حاجة زى ماكانت والناس هترجع زى ما هيا

وبما أنى طول عمرى ما بتعجبنيش حاجات بتحصل حواليا وفى سلوك الناس والمجتمع وبهاتى بيها لدرجة أنه ناس كتيرة شافونى متمردة وما بقاش كلامى بيعجبهم جه الوقت اللى أقدر أعلى فيه صوتى أكتر وأكتر وأقول لهم أنى مش هرتاح ومش هسكت الا لما فعلا كل الحاجات اللى مش عاجبانى وعاجبة ناس كتيرة تتغير

بداية من العادات والتقاليد الغريبة اللى بنتوارثها جيل بعد التانى واللى ما تمتش بصلة للدين ولكنها حاجات محفوظة وبنطبقها بحذافيرها بغض النظر عن كونها حلال ولا حرام الى تفكير المجتمع عامة

والمجتمع ده ما بقاش كده لوحده من تلقاء نفسه ده هو نتاج تربية أهالينا لينا مع أنهم كانوا زمان ما بيعجبهمش حاجات ولكن لما جه دورهم فى التربية حصل لهم انفصام فى الشخصية وبقوا برضة بيصنعوا المجتمع بنفس السلوك والعادات

أعتقد أنه جه الوقت ولازم حاجات كتيرة تتغير وطالما كل واحد عايز يغير من نفسه يبقى يفكر بقى فى كل حاجة فى سلوكه فى تفكيره فى كل حاجة أتربى عليها فى الحاجات اللى بيمارسها وساعتها هيعرف أنه فيه حاجات فعلا لازم تتغير وتتمحى تماما

ودى تعتبر مقدمة لمجموعة مقالات عن سلوكيات كتيرة محتاجين نغيرها

بقلم بسمه عبدالباسط

الورد اللى فتح فى جناين مصر

2011-02-09T03:53:00.001+02:00

لما أنت مش قدها بتنطقها ليه !!!!!! ؟؟

2011-01-21T18:12:00.001+02:00

أه فعلا لما أنت مش قد كلمتك بتنطقها ليه ؟؟ وليه بتقول حاجة مش هتقدر تنفذها

حاجة غريبة بقت منتشرة بصورة بشعة الأيام دى وهيا أن الواحد يروح يخطب واحدة وهيا كل الحكاية دبلتين ويفضل داخل خارج واكل شارب عايش حياتة وبعدها بكام شهر يخلع وأدى وش الضيف

أيوة يخلع وهو ما بيسيبش البنت عشان مثلا ما لاقاش توافق بينهم أو لاقى فيها عيوب ومش هيقدر يكمل

لا لا ده سابها عشان خلاص زهق وعشان هو من الأول ماكانتش نيتة سليمة وكان بس عايز يعيش له يومين وخلصت على كده

وبعد ما يعشم البنت ويعلقها بيه فجأة يختفى !!!!!!!!

وعشان محدش يتهمنى بأنى متحاملة على الشباب أنا بقالى تقريبا أيام طويلة بسمع حكايات من هنا وهناك وكلها نفس المضمون وهو

يا أما واحد راح كلم أهل البنت وقروا فاتحة ولبسوا دبل أو وعدهم أنه بعد فترة هيلبسوا الدبل وكل ده عشان بس يعرف يكلم البنت ويخرج معاها ويعيش حياته وبعد كام شهر يختفى بدون أى مبررات

وفى النهاية لما يحبوا يعرفوا هو إيه السبب فى أنه خلع يطلع بحجج واهية ومش منطقية وتقريبا كلهم بيقولوا نفس الكلام

أصلك ناشفة معايا قوى فى التعامل وأنا ما بحبش كده !! على أعتبار أنها لازم تتمايص وتتدلع لواحد أصلا المفروض كلامها معاه يكون فى حدود المعقول لأنه مش جوزها

أصلك عمرك ما فهمتينى ولا هتقدرى تفهمينى !! طيب وكان بقالها كام شهر بتعمل إيه معاك ولا أنت فجأة صحيت من النوم أكتشفت أنها مش فهماك

أصلك مش عايزة واحد زيى !! وهيا لو كانت عايزة واحد غيرك كانت وافقت عليك ليه من الأول

أصلى مش عايز أظلمك ولا أجرحك عشان ظروفى ملخبطة !! على أعتبار أنه لما علقها شوية ووعدها بكلام وبعدين خلع ما يبقاش ظلمها ولا جرحها

إن شاء الله بكرة ربنا يرزقك بواحد أحسن منى مليون مرة !! لا يا شيخ وقلبك عليها كمان أدعى لنفسك الأول ربنا يهديك وتتقى ربنا فى بنات الناس

وكلام كتير وأكتر من ده ملايين المرات بيتقال بالحرف زى ما يكون فيه هوجه ماشية فى البلد الأيام دى للأستهبال وبغض النظر عن الظروف الأقتصادية والبطالة وغيره وغيره هو أنت مش المفروض شرحت ظروفك للبنت وأهلها وهما وافقوا مالكش حجة بقى فى اللى بتعمله غير شوية حاجات كده منهم أنك كنت من الأول مش واخدها جد

أو أنك من كتر الضغوط قررت تهرب وبتبقى عمال تقنع نفسك أنك بتعمل كده لمصلحة البنت على أعتبار أنها ماعندهاش عقل ومش عارفة مصلحتها

ليه ما بقاش حد بيحترم كلمته حتى لو كانت الكلمه دى أتقالت للبنت نفسها

ليه بقينا بنستسهل جرح الناس والهروب من كلامنا ونمشى نقول شعارات مالهاش لازمة ونحاول نقنع نفسنا أن ده هو الصح

ليه بتستسهل جرح البنت وظلمها واللعب بمشاعرها مع أنك لا يمكن ترضى أن ده يحصل مع أختك ولا بنتك

ليه بتعيش دور الغرام والهيام وتعيشها فى حلم جميل وفجأة هوب ترميها وتقف عليها كمان برجليك والمشكلة أنك ما بتحسش أنك غلطت فيها ولا فى حقها

وفعلا لما أنت مش قد كلمتك لا مع البنت ولا مع أهلها ياريت ما تقولهاش من الأول لأن المفروض الراجل راجل بكلمته وبوعوده

بقلم بسمه عبدالباسط

أنا هتجوز بابا

2011-01-15T19:33:00.000+02:00

أنا هتجوز بابا جملة بتقولها كل بنت وهيا سنها صغير قوى ويمكن هيا ما بتبقاش قاصدة المعنى الحرفى للكلمة لأنها ما بتبقاش فاهمة أصلا معنى الكلام ولكن الجملة بتتقال من كتر حب وأرتباط أى بنت بالأب اللى كتير ما بياخدش باله من بنته ومن أحتياجاها لية مش بس وهيا صغيرة لا لما بتكبر كمان

ولأن من أول ما بيكون عمر البنت شهور ولسة بتبدأ تتعرف على اللى حواليها بنلاقى أى بنت مرتبطة بالأب بصورة كبيرة قوى ولو كلنا لاحظنا هنلاقى فعلا كده أن البنت بتحب والدها جدا وبتكون قريبة منه أكتر من اللازم وعلشان كده المفروض الأب يحس بده ويفهم ده وما يتجاهلش أرتباطها بيه ويديها الحنان والحب اللى هيا محتاجاه

بتبدأ البنت تكبر وبيبدأ أرتباطها بالأب يزيد ولكن للأسف فيه ناس كتيرة ما بتاخدش بالها من كده وبيبدأو يهملوا البنت ويهملوا مشاعرها بطريقة غير أدمية وما بياخدوش بالهم من أرتباط بنتهم بيهم وسبحان الله دى بتبقى حاجة فطرية بتلاقى البنت ميالة أكتر لأبوها ولكن للأسف هو ما بيكونش حاسس بكده ومش عارف أن أهماله ليها ولمشاعرها وعدم أحساسها بحنانه ممكن يسبب مشاكل كتيرة قوى

زى مثلا لما البنت تلاقى الأب بعيد عنها وهيا بتكون محتاجاه جدا ومحتاجه حنانه وحبه وعطفه بتعمل أيه بتتجه مشاعرها فورا لأى راجل تانى موجود حواليها ويكون فعلا كويس وحنين وفيه صفات هيا نفسها تشوفها فى باباها ومش شرط تحس بالمشاعر دى وهيا كبيرة لا دى بتحسها من وهيا صغيرة ممكن تلاقيها مرتبطة بمدرس عندها فى المدرسة بدرجة كبيرة وهيا لسة فى المرحلة الأبتدائية يعنى لسة طفلة وكل ما بتتنقل لمرحلة أكبر كل ما بتحتاج للحنان أكتر وبتفضل مشاعرها تدور معاها على حد يحل محل والدها اللى غايب عنها ومش حاسس بيها

وعن تجربة شفتها بعينى لأم منفصلة عن زوجها بنتها لسة فى المرحلة الأبتدائية والبنت محرومة طبعا من حنان والدها ومن وجوده فى حياتها وفى مرة قالت لمامتها أنها بتحب مدرس عندها قوى ومرتبطة بيه جدا والأم لاحظت كده فعلا ولاحظت على بنتها أرتباطها الكبير بالمدرس ده وطبعا حبها ليه حب أبوى لأنها محرومة من عاطفة الأبوه

البنت وهيا لسة صغيرة محتاجة منك تلعب معاها وتتكلم وتهزر تاخدها على رجلك وتحكى لها حكاية تحسسها بوجودك فى حياتها

وكل ما بتكبر بتحتاج لوجودك أكتر ولنصايحك ولكلامك معاها وبتحتاج تحس بخوفك عليها

وجود الأب فى حياه بنته لازم يكون وجود حقيقى

خليك صاحبها وكلمها فى كل حاجة وأعرف عنها كل حاجة وشاركها فى حياتها ما تكونش مجرد صورة موجودة أو بنك بيصرف فلوس وخلاص

وفى النهاية نوصل لبنت عندها 16 أو 17 سنه وقعت فى شباك راجل كبير ضحك عليها وده نتيجة لإيه نتيجة لعدم وجودك فى حياتها

وحتى لو مفيش حد ضحك عليها هيا مشاعرها كل شوية هتتجه لأى حد كبير فى السن وخلاص أى حد يعوضها الحنان والحب الأبوى اللى هيا مش لاقياه

وحتى لو مشاعرها ما أتجهتش لأى حد الحرمان اللى بتبقى حاسة بيسبب لها آلم نفسى رهيب وده بيكون أكتر وأفظع من أى آلم تانى

بقلم بسمه عبدالباسط

أمثال زمان

2011-01-07T23:22:00.002+02:00

المرأة الكائن اللى بيمثل نص المجتمع وبدونة يختل المجتمع تعانى أحيانا من الأهانة والسخرية ولكن بتختلف وسائل السخرية وتتعدد ومنها على سبيل المثال الأمثال الشعبية والمقولات اللى بتستعمل فى كل دول العالم وبيتوارثها الأجيال جيل ورا التانى وبتترسخ فى عقول الرجالة والستات وللأسف فيه رجالة مصدقين الكلام ده

وبتأثر طبعا النظرة دى على أى ست لأن فيه أمثلة ومقولات كتيرة بتنقص من قدرها

وكتير بتأثر على عقليتها من وهيا لسة طفلة وتخلق فيها طابع الأنكسار والخجل بسبب أنها بتنتمى لهذا الجنس زى مثلا

ضل راجل ولا ضل حيطة ( مثل مصرى )

من الأمثال القديمة واللى ساهمت فى تشكيل رؤية بنات وستات كتيرة قوى للراجل وفى كونه مهم جدا فى حياتها حتى لو كان وجوده مالوش تأثير بس أهو أحسن من الحيطة وأهو راجل والسلام

وساهمت الموروثات فى تضخيم الفكرة دى وبقى قدامنا نماذج كتيرة بتعمل بالمثل ده

ولكن هل لو الراجل ده مالوش أصلا ضل ولا له وجود ولا قيمة فى حياتك هيبقى إيه فايدتة أعتقد ساعتها هتكون الحيطة أفضل بكتير من أنك تبقى محسوبة على واحد مش موجود أصلا

لأن أى واحدة عايز واحد يكون سندها ويكمل معاها مسيرة حياتها ويكونوا مكملين لبعض طول الحياة

تحس معاها بطمأنينة وسكن ومودة وأستقرار وأمان

ولكن لو كل ده مش موجود هيبقى إيه فايدتة تبقى فعلا ساعتها ضل حيطة ولا ضل راجل مالوش وجود

إكفى القدرة على فمها تطلع البنت لأمها ( مثل مصرى )

مثل كل الناس عرفاه ولكن للأسف ما بيتقالش الا فى حالة أن البنت تبقى مش كويسة فى أى حاجة سواء فى تصرفاتها فى شخصيتها فى كل حياتها عامة ساعتها أى حد هيقول المثل ده ويتهم الأم بأنها السبب فى اللى البنت فيه وبأنها لو كانت كويسة كانت بنتها بالطبع طلعت كويسة

ولكن المثل ده نادرا لما يتقال على بنت كويسة جدا فى كل حاجة زى ما يكون البنت اللى مش كويسة طالعة لمامتها ومامتها هيا السبب فى كده ولما تكون كويسة تبقى الأم مالهاش دخل فى كده ومحدش بينسب ده للأم

مع أن الأم هيا اللى بتربى فى الحالتين وفى الحالتين مش لازم يكون البنت الكويسة أو الوحشة طالعة كده بسبب مامتها

ولكننا أتعودنا دايما نلزق أى شىء مش كويس للست وبس

اللي ماتعرفش ترقص تقول الأرض عوجه ( مثل مصرى )

ودة على أعتبار أن الرقص مهنة الست الأولى وبدونها مش هتبقى ست !!!!!!!!!!!!!!!

زى القطط ياكلوا وينكروا ( مثل مصرى )

نكران الجميل موجود فى كل مكان وفى كل طرف

لا بيقتصر على الستات ولا الرجالة وكل طرف فيه اللى منهم ناكر للجميل

النساء يتعلمن البكاء ليكذبن ( مثل رومانى )

من المؤكد أن فيه ستات بتستعمل البكاء كوسيلة للكذب ولحاجات تانية ولكن الأغلب منهم دموعهم بتسبقهم نسبة لطبيعتهم الرقيقة

لاتستند الى الجدار المائل ولا الى المرأة ( مثل تشيكى )

مع أن أكتر حد أى واحد بيستند عليها لما يكون فى شدة الأم أو الأخت أو الزوجة وهيا أكتر واحدة بتستحمله

الشيطان استاذ الرجل وتلميذ المرأة ( مثل يابانى )

المرأة الجميلة تحتاج الى ثلاتة أزواج واحد ليدفع ديونها وواحد لتحبة وواحد ليضربها ( مثل تشيكى )

سلاح المرأة لسانها فكيف تدعة يصدأ بعدم الاستعمال ( مثل فرنسى )

الشيطان يكفية عشر ساعات ليخدع رجلا والمرأة يكفيها ساعة واحدة لتخدع عشرة شياطين ( مثل المانى )

وعود المرأة تكتب على صفحات الماء ( مثل يونانى )

عندما تفكر المرأة بعقلها فإنها تفكر فى الاذى ( مثل لاتينى )

المرأة كظلك إتبعها تهرب واهرب منها تتبعك ( مثل اسبانى )

المرأة كالسجادة كلما ضربتها بالعصاة تخلصت من الغبارالعالق بها ونظفت ( مثل صينى )

للمرأة سبعا وسبعون رأيا فى آن واحد ( مثل روسى )

لاتثق بشمس الشتاء ولا بقلب المرأة ( مثل بلغارى )

وغيرها من الأمثال زى

يامخلفه البنات ياشايله الهم لحد الممات

كيد النسا غلب كيد الشيطان

لبس البوصة تبقى عروسة

هم البنات للمات

أكسر للبنت ضلع يطلع لها 24

البنت ضرة أمها

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

بقلم بسمه عبدالباسط

ممكن تفهمنى من غير ما أتكلم ؟

2010-12-22T21:18:00.000+02:00

عمرك حسيت بحد من غير ما يتكلم ؟؟

عمرك كلمت حد أو أتصلت بيه وأول ما رد عليك قالك ياااااه ده أنا كنت من جوايا نفسى أتكلم معاك هو أنت حاسس بيا ولا إيه ؟؟

عمرك حطيت إيدك على كتف أختك أو مراتك أو خدتها فى حضنك لمجرد أنك حسيت أنها من جواها محتاجة الحضن دة ؟؟

عمرك فهمت من نظرة عين اللى قدامك سواء كان أخوك ، أختك ، صاحبك ، مراتك ، خطيبتك أى حد أيا كان هو عايز يقول إيه وهل هو فرحان ولا زعلان من جواه حتى لو كان بيظهر غير كده ؟؟

للأسف كتير مننا ماعندوش ثقافة الحوار الداخلى والأحساس بالغير حتى لو كانوا أقرب ناس ليك وحتى لو حسيت باللى جمبك بتعمل إيه هل بتعمل الى حاسس بيه وحاسه جوه اللى جمبك ولا بتطنشة وتقول وأنا مالى هو أنا ناقص جنان لما يبقى أو تبقى تقول اللى عايزاه أبقى أعمله !!!!

يمكن لأنى جربت الموضوع ده مع ناس فى حياتى وفعلا من غير ما أكون قدامهم كانوا بيحسوا بيا ومن نظرة عينى ليهم بيفهونى ويعرفوا أنا عايزة إيه وفى نفس الوقت فيه كتير بحس بيهم حتى وهما مش معايا ومن نظرة عينهم بيوصلنى اللى جواهم

بالأضافة الى الناس اللى فعلا ما بتهتمش باللى حسته منك أو شيفاه وبتنضم للجزء اللى بيقول وأنا مالى لما تبقى تقول اللى عايزاه أبقى أرد عليها أو أشوف هعمل إيه !!!!!!!!!!

لغة الحوار الداخلية دى شىء مهم قوى فى حياتنا وخاصة بالنسبة لأى واحدة لطبيعتها الرقيقة والحساسة جدا واللى ممكن فى أوقات تخليها مش قادرة تقول اللى جواها ولا تعبر عنه

بس ياترى كام واحد وواحدة بيفهموا لغة الحوار دى وبيقدروا يتواصلوا معاها خاصة مع أقرب ناس ليهم ؟؟

بقلم بسمه عبدالباسط

تعلم كيف تحبنى

2010-12-21T18:51:00.001+02:00

أن تحب فتاة مثلى فيجب أن تعرف عدة أشياء هامة حتى تمر حياتنا بسلام فكما قلت لى أنى مجنونة وغريبة فأنا أعترف أنى بالفعل مجنونة وغريبة ومتناقضة وبى كل شىء وأى شىء تتوقعه

ولكن اليس جنونى هذا الذى جذبك لى وجعلك تقتحمنى لتعرف من هذه الفتاة الغريبة التى تكون بمليون حالة فى الدقيقة الواحدة

أذن فأنت من أخترت فلا تلومنى على جنونى ولا على أى شىء أطلبه منك

أن تحب فتاة مثلى يجب أن تعرف مسبقا ما يفرحها وما يحزنها ما يبكيها وما يضحكها وأعلم أنها مثل الأطفال أقل شىء يجعلها فى غاية السعادة وأقل شىء مثله يجعلها فى قمة الحزن

أن تحب فتاة مثلى يجب أن تعرف أن غيرتها عليك ليست غيرة عادية ولكنها لا تظهرها بسهولة لا لشىء الا لأنها تعلم أنك سوف تحافظ على مشاعرها ولا تفعل ما يثير نار غيرتها حتى لا تحترقا بها سويا

أن تحب فتاة مثلى يجب أن تعرف أنها تريدك أن تشاركها كل شىء فى حياتك حتى همومك ومشاكلك التي تحاول اخفائها وعدم التحدث عنها فاعلم أن هذا الفعل يثير غضبها جداااااااااااااا لأنها تشعر وقتها أنها غير مهمة وليس لها وجود فى حياتك

أن تحب فتاة مثلى فاعلم أن بداخلها كمية حنان وطيبة تملأ الكون كله ولكن عندما تجرح أو تهمل أو تهان تكون فى قمة القسوة

أن تحب فتاة مثلى وتراها تبادلك نفس المشاعر فاعلم أنك أصبحت الهواء الذى تتنفسه وتريد رؤيتك وسماع صوتك فى كل لحظة وثانية ودقيقة وأنها أصبحت أقوى بك وتكون فى قمة ضعفها بدونك

أن تحب فتاة مثلى متمردة فاعلم أنها لم تتمرد عليك يوما ما الا إذا فعلت كل ما تكرهه هى

أن تحب فتاة مثلى فاعلم أن بداخلها بركان مشاعر سوف يملأ كل حياتك ولكن لا تتركها تشعر بالأحتياج لك ولا تجدك لأنك بهذا تؤلمها جداااااااااا وتجرح إحساسها ولأنك عندما تحتاج اليها تجدها فوراااا

أن تحب فتاة مثلى عقلها لا يتوقف عن التفكير أو التدقيق فى كل شىء وأى شىء فاعلم أنها تحب الكلام والنقاش فى كل شىء وأى شىء وتكره الشىء المسمى الأوامر والنواهى بدون ما تفهم لماذا

أن تحب فتاة مثلى فاعلم أنها عندما أحبتك فأصبحت لها كل شىء وكل العالم لا يهمها ولكن أحذر من أهمالك لها ولكل ما تحب وتكره ولأن غضبها وحزنها مثل البركان الذى لا يهدأ الا بنظرة منك وكلمة جميلة تنسيها الدنيا وما فيها

أن تحب فتاة مثلى فاعلم أنها عندما تحب تحب بكل ما فيها من قوة وعندما تكره تكره بكل ما فيها من قوة أيضا

أن تحب فتاة مثلى فاعلم أن حياتك معها سوف تكون مختلفة تماما لا لشىء الا لأنها تكره الروتين والملل وأى شىء يدعو للحزن وتحب كل شىء جديد ومجنون وغير طبيعى

أن تحب فتاة مثلى فاعلم أن دموعها غالية جدا وعندما تسقط يكون جرحها كبييييير فلا تجعلها تنام يوما وفى عيناها دمعة حزن ولا بأس من دمعة فرح

أن تحب فتاة مثلى وتفعل معها كل ما تفعل فاعلم أنها تحبك أكثر مما تحبها ملايين المرات ولكن لا تغضيها وتهملها وكن معها دائما وأبداااااااااااااا ولا تتركها تشعر بالأحتياج لك يوما ما ولا تجدك لأنك أصبحت الماء والهواء لها

بقلم بسمه عبدالباسط

أعشق تمردى

2010-12-15T22:36:00.002+02:00

نعم أعشق تمردى ولا أرى فيه شىء خطأ مع أن الكثيرون يرون أن التمرد يتمثل فى الصوت المرتفع والتعدى على كل شىء صحيح وفعل الكثير من الأشياء الخاطئة

لكن تمردى أنا تمرد من نوع خاص لا يرتبط أبدا بالصوت المرتفع بالعكس فتمردى يرتبط كثيرا بالصمت والرفض المستميت لأى شىء لا أرغب فيه

فقد أحترفت الصمت منذ الصغر وصارت عندى موهبه فيه وصار الصمت فن أتقنه بشده ونادرا ما يفهمنى أحد أو يعلم ما بداخلى ولكن المقربين منى فقط يعرفون كل ما بداخلى فمجرد نظرة منى كفيلة بإيصال ما أود قوله ولكن يوجد كثيرون لا يفهمون لغة العيون ولكن من لا يفهمها لا يهمنى فى شىء فيكفينى فهم أقرب الناس لى ولأنى أتخذت من صمتى خطا دفاعيا عن كل شىء يمر بى ولأن الكلام كثيرا لا يصل لنتيجة وينتهى الأمر بالجدال فقط والمعارضة والنقد لمجرد النقد والمعارضة ليس الا

أحببت خجلى وأنطوائيتى الزائدة وأنا صغيرة التى جعلتنى صامتة رغما عنى نسبة لكم الخجل والأنطوائية التى كنت بها ولكن عندما كبرت وتخلصت من هذه الأنطوائية وأصبحت أجتماعية نوعا ما أخترت الصمت طريقا لى بدلا من الجدل الذى ينتهى الى جدل ومشاكل لا نهاية لها

فكثيرا ما نتكلم ونقول ونقول وينتهى الكلام بلا شىء ولا نتيجة ففى هذا الوقت يكون الصمت أصلح حل وتكون لغة العيون هى طريقى لإيصال ما أريد

وقلمى وورقى هما الطريق الثانى وبهذا أخرج ما بداخلى

أعشق تمردى على العادات والتقاليد والموروثات الخاطئة والتى لا ترتبط بالحلال والحرام ولكنها أشياء موروثة فى عقولنا فلا داعى من خجلى أو تصريحى من تمردى عليها

أعشق تمردى على الخوف والفشل والأحباط واليأس وكل شىء يأخذنى للخلف

وأريد أعلانها بأعلى صوت بأنى بشر وأريد أن أعيش مثل أى بشر وأنى مللت وحدتى التى يغلفها الصمت والبرود والجمود والأحتياج فبداخلى بركان ثائر يود أن يخرج ويصيح بأعلى صوت ويصرح بأنه بشر ويود أن يعيش مثل باقى البشر

بداخلى بركان مشاعر يود أن يصيح بعلو صوته ويخرج من صمته وهدوئه ويصبح كالفيضان يملأ الكون كله ويعلن ما بداخله بكل قوه وبدون خوف

مازلت أتمرد حتى على نفسى ولا أعلم نتيجة هذا التمرد الا أنى أعشق تمردى بشدة

بقلم بسمه عبدالباسط

هل عندك شك

2010-12-14T23:09:00.002+02:00

لية دايما البنت بتكون محل شك من كل اللى حواليها سواء أم أو أب أو أخ أو زوج أو أبن أو أى حد موجود حوالين البنت أو الست
لية دايما كل أفعال وتصرفات البنت مراقبة ومحل شك من كل الناس كأنها كائن مخطىء دايما ومن السهل أنه يغلط وأنها ماعندهاش عقل تميز الصح من الغلط ولا تقدر تفرق بين الحلال والحرام

لية دايما الولد عنده كل الصلاحيات لكل حاجة ودايما الأهل وكل الناس بتثق فيه على عكس البنت اللى شوية وهيعلقوا لها رادار يراقب تصرفاتها
الولد أنسان والبنت أنسانة والأتنين من الممكن أنهم يغلطوا ويعملوا حاجات كتيرة غلط وحرام والأتنين عندهم نفس العقل وعندهم الحياة والآحلام والطموح

يبقى لية ندى لطرف كل حاجة وناخده من الطرف التانى

لية ندى للولد الثقة العمياء زى ما بيقولوا ونشك فى البنت دايما

مع أن عدم الثقة سواء كان للبنت أو للولد ممكن يدفعهم لعمل حاجات كتيرة غلط وممكن يكونوا كويسين جدا ومش بيغلطوا وأخلاقهم عالية جدا ولكن لعدم الثقة فيهم وغضبهم من الموضوع ده فنلاقيهم بيعملوا حاجات غلط كنوع من أنواع أسترداد حقهم الضايع

يعنى أحنا بندفع البنت لفعل الخطأ بمزاجنا وبأرادتنا

وللأسف الحرية والخصوصية كلمات مازالت بتتفهم غلط لما تنطقها أى واحدة ويمكن ده بسبب تعدى بعض من البنات على الأخلاق والعادات والتقاليد بقولها أنا حرة ومحدش له دعوة

ولكن ما ينفعش ناخد كل البنات بذنب فئة مش مسئولة

حالة كبت الحريات وحرمان البنت من كل حاجة وأى حاجة لأنها بنت للأسف لسة منتشرة

وحالة الغاء الخصوصية للبنت برضة منتشرة

يعنى كتير ما يبقاش مسموح للبنت أنها تتكلم فى التليفون وباب الأوضة مقفول عليها كأنها لو أتقفل عليها باب الأوضة لازم هتعمل حاجة غلط أو هتستعمل التليفون فى شىء مش كويس

حاجات البنت زى الورق بتاعها ، كتبها أى شىء خاص بيها من حق الكل يلعب ويفتش فيه ولما تحاول تعترض وتقول أن المفروض محدش يفتش فى حاجتها بيكون الرد أنها بنت ولازم أهلها يعرفوا عنها كل حاجة

بس مش هيا دى الطريقة الصح أساسا فى معرفة كل شىء عن بنتك

لأن لو أى أسرة صديقة لولادها كانت هتبقى عارفة كل كبيرة وصغيرة فى حياتهم من غير ما يفتشوا ومن غير ما تحس البنت أنها قاعدة فى جهاز مخابرات وكل حركة ليها مراقبة

ولكن المشكلة واللى بيضايق أى بنت لما تلاقى أن مالهاش الحق فى أى خصوصية مع أن ممكن يكون ليها أخ ومحدش بيقرب ناحيته وده بيخلق جواها آلم نفسى من التفرقة فى المعاملة

مع أن المفروض الأهل ما يفرقوش فى المعاملة وده لأنهم بيخافوا على الأتنين يبقى ليه كل شىء عندها مباح أى حد يشوفه بحجة أنهم أهلها وخايفين عليها ولازم يعرفوا كل حاجة عنها

وما بيحصلش ده مع أى ولد

بالأضافة الى منع البنت من حاجات كتيرة وكتير بتبقى الحاجات دى صح مش غلط وبتبقى حريتها متقيدة بسبب أنها بنت وبسبب كلام الناس ونظراتهم

لية حرية البنت مازالت بتثير جدل واسع وكبير أول ما حد يتكلم فيها

البنت كائن له عقل زيها زى الولد وأكيد هتقدر تفرق بين الصح والغلط ده حتى الحلال والحرام المفروض أنه حلال وحرام عليهم الأتنين

ولكن المجتمع مازال بيحلل كل حاجة للولد ويحرمها على البنت

وتلاقى أى بنت قدامها قايمة ممنوع ولا وبلاش

والولد قدامه قايمة أعمل اللى يريحك مع أنه ممكن يكون بيستغل الموضوع ده غلط

وتكون هيا ما بتعملش حاجة غلط

مفيش أى مانع أن الأهل يتابعوا بناتهم ويعرفوا عنهم كل حاجة ولكن مش بالعافية والقهر والكبت ليهم ولازم يبقى فيه مساحة للخصوصية علشان الخنقة الزيادة ممكن تؤدى لمشاكل كبيرة بعد كده

زى الجملة اللى أتقالت فى مسرحية سك على بناتك وكانت الخلاصة فعلا وهيا سك على بناتك بس إيديهم المفتاح

بقلم بسمه عبدالباسط

عفوا دة مش زمن الرقة والبسكوت

2010-12-03T18:37:00.001+02:00

دايما متعودين أن البنت لازم تبقى رقيقة وبسكوتة وكتير من الصفات اللى الكل بيحبها فى أى بنت ومفيش واحدة ما تحبش تبقى رقيقة

ولكن المشكلة الأيام دى أن الزمن أتغير والناس كمان أتغيرت وبقى الوحشين أكتر من الكويسين والغدر والخداع والمشاكل الكتيرة اللى بقت مالية الدنيا بتمثل خطر كبير على نفسية الناس وخاصة الناس الحساسة والرقيقة

وخاصة لما يصاحب الأنسانة الرقيقة الحساسة دى معاملة خاصة من أهلها ومحاولة التقفيل عليها قوى ومنعها من الأختلاط الزيادة والمجتمع والمشاكل

وفجأة تطلع البنت للدنيا تلاقى نفسها فى وش المدفع لوحدها أهلها اللى كانوا معاها فى كل حاجة فى حياتها وواقفين جمبها فى كل مشاكل وهموم الدنيا ودايما بيتصدروا ليها ما بقوش موجودين وعليها أنها تواجه كل حاجة لوحدها وتعديها

وطبعا بتكون النتيجة أنها تتكسر من أول ضربة وأول مشكلة وبتبقى ضعيفة قوى فى مواجهة أى حاجة

على سبيل المثال لما يكون عندك قطة مربيها من صغرها وعمرها ما خرجت من البيت بتاكل وتشرب وتنام جوه البيت وكل شىء متوفر لها وبعد ما كبرت قمت فجأة مطلعها فى وسط قطط الشوارع وسبتها لوحدها ومشيت

تخيل هيحصل لها إيه ؟؟

هو ده بالظبط زى ما تبقى عايش مع واحدة ومقفل عليها قوى وبتحاول ما تعرضهاش لأى شىء حتى لما بتتعرض لأى ظروف أو مشاكل بتلاقى حد واقف معاها وفى ضهرها وفى وشها كمان واقف ولكن بعد 20 أو 22 سنه بيبقى مطلوب منها أنها تطلع للدنيا لوحدها وتواجه كل شىء ومهما عدى عليها لازم تعدية وتكون قوية

وده بيكون نتيجتة أنها بتتكسر بسرعة وبتاخد وقت لحد ما تقدر تعدى وتفوت أى مشكلة لأن مناعتها بتكون أقل من اللى الدنيا شالتها وحطت فيها

ويمكن الضربة اللى ما بتموتش بتقوى بس المشكلة أنها لازم تاخد ضربات كتيرة قوى وتتكسر لحد ما تبقى فعلا قوية وقد الدنيا ومشاكلها

أكيد مفيش مانع من أن البنت تكون رقيقة ولكن رقة عن رقة بتفرق

رقيقة ولكنها شافت وأتعلمت وأختلطت بالناس والدنيا وبقيت قوية أحسن من رقيقة وكل حاجة تكسرهها وتجرحها

علشان كده ما تقفلوش على بناتكم قوى خلوهم يشوفوا ويتعلموا ويجربوا من غير طبعا ما يتعدوا أى حدود أو عادات أو أخلاق ولكن بلاش القفلة الجامدة اللى تخليهم زى القشة أى شوية هوا يطيروها

وبلاش تخلوها هشة لينة وبتتكسر بسرعة

بقلم بسمه عبدالباسط

الحما حمة

2010-11-28T18:45:00.002+02:00

الحما عقرب تقرص و تهرب ،، الكي بالنار ولا حماتي في الدار ،، بوس إيد حماتك تحبك مراتك ،، دايما حماتى تتمنى مماتى

وملايين من الأمثلة والكلمات اللى بتتقال على الحما واللى بتخلق جو من التوتر جوه أى حد مقبل على الجواز وحتى لو الحما دى ملاك ( فى المشمش يعنى ) محدش بيصدق أنها كده وتلاقى كل طرف متوجس خيفة من حماته

ولكن بالتجربة العملية أتضح أن فعلا فيه حموات كتيرة هما اللى بيعملوا كده فى نفسهم بسبب تعاملاها مع مرات أبنها أو جوز بنتها من تحت الضرس كأنها داخلة حرب وجوازات كتيرة بتفشل بسبب الحموات يا أما فى فترة الخطوبة أو بعد الجواز

وطبعا المشكلة الكبيرة أن أى واحد مش عايز يزعل مامته حتى لو شايف أنها شيطان مع مراتة وهكذا بالنسبة لأى واحدة

طيب إيه الحل وليه أصلا أى أم لما بتبقى حما بيحصل لها أنفصام فى الشخصية وتلاقيها ملاك مع ولادها ولكن مع الطرف التانى بتتقلب 360 درجة

ولأن العقلية المصرية الفذة لازم تبتكر كل شىء فأحنا عندنا الحموات بيختلفوا عن أى مكان وليهم طابع خاص فى كل حاجة

ولكن الحق يقال أن فيه حموات كويسين جدا وبيبقوا فعلا زى الأم وأكتر كمان ودة أنا شفته بعينى مع ناس أعرفهم مع أنى ماجربتوش شخصيا وشربت من كاس الحموات الفاتنات لما أستكفيت فعلا ولكن حواليا ناس كويسين جدا وبغض النظر عن طبيعة أى ست ولكن الحرب اللى بتحصل دى ليه أساسا تحصل وإيه هدف أى واحدة لما تنكد على مرات أبنها أو العكس هتوصل لإيه فى النهاية وبعدين ما هو النكد دة هيتقلب على أبنها أو بنتها بعد كده يعنى درجة تحمل كل طرف للى بيحصل دة مش هتستمر طول العمر ولو عدوا مرة وأتنين وثلاثة ومية ممكن بعد كده ما يقدروش يستحملوا وبيتهم يتخرب بسببها

هل هيا هتبقى مبسوطة كده ؟؟

أنا نفسى فعلا أدخل جوه دماغ وقلب كل حما مفترية وأشوفها بتفكر أزاى وإيه منطقها فى الموضوع ده بس أعتقد أنى حتى لو دخلت هخرج من غير ما هعرف حاجة لأنى هلاقى جواها كمية صراعات حتى مع نفسها ممكن تلاقيها بتخانق نفسها فمش هطلع بشىء وممكن صراع منهم يخبط فيا وأنا جوه فمالوش لازمة

طيب لو قلنا أن نسبة من الحموات دى عندهم عقدة لأن حمواتهم كانوا وحشين معاهم طيب الباقيين مالهم ما هو مش معقول كلهم كانت حمواتهم مفترية يعنى

ولازلت أبحث فى لغز الحما المفترية ومش هرتاح الا لما أوصل له

العدد السابع

لتحميل العدد
http://www.mediafire.com/?hiccvs6iuq3mc63

أول دقة قلب

2010-11-13T15:03:00.001+02:00

عارفين أول دقة قلب وكلمة حب بيبقوا عاملين أزاى ؟

ولأن غالبا أول دقة بتبقى فى سن صغير قوى وأول ما البنت أو الولد بيدخلوا مرحلة المراهقة وتبدأ شخصياتهم ونفسياتهم وكل حاجة فيهم تتغير ويحسوا أنهم فعلا كبروا وما بقوش أطفال زى زمان مستنين مصاصة ولا لعبة من بابا وماما

ولكن فيه حاجة ناس كتيرة بتغفل عنها وتنساها وهيا مشاعر الحب اللى بتتولد جوه البنت أو الولد وكتير بتبقى المشاعر دى مش حب حقيقى وممكن تبقى مجرد اعجاب بحد قدام البنت أو الولد سواء كان فى نفس سنهم أو أكبر

ولكن للأسف الأهل ماعندهمش ثقافة التعامل مع مشاعر وأحتياجات ولادهم النفسية والعاطفية ويبدأ يحصل الصدام ما بين أحساس الأبناء بأنهم كبروا وبيمروا بمرحلة أنتقالية فى حياتهم وكل شىء بيتغير جواهم وقدامهم وما بين عدم فهم الأهل لكيفية التعامل معاهم ويفضلوا مصرين على التعامل معاهم على أنهم مازالوا أطفال محتاجين لعبة وفسحة علشان يبقوا مبسوطين

ونبدأ نسمع من الأبناء شكاوى كتيرة وأهم حاجات بيقولوها وبيبقوا حاسين بيها أن أهلهم مش فاهمينهم والأهل نفس الشىء نلاقيهم بيشتكوا من ولادهم وبأنهم مش عارفين يتعاملوا معاهم ولا يرضوهم أزاى وبأن ولادهم مش عايزين يسمعوا الكلام

وطبعا صراع الأجيال دة مش عايز ينتهى ولأن الموضوع بسيط جدا وبهدوء كده لو من الأول بقى الأهل أصحاب ولادهم ومعودينهم أن أى حاجة يشاركوهم فيها أكيد مش هتحصل كل المشاكل دى

بالأضافة الى أن الأب والأم لازم يكونوا عارفين أن أبنهم أو بنتهم أول ما بيدخل مرحلة المراهقة هيحصل له تغيير كبير وأحتمال تتقلب شخصيتة 360 درجة والمفروض يقربوا منهم أكتر ويبقوا واعيين جدا لكيفية الكلام والنقاش والتعامل معاهم

والمفروض الأم تبدأ بمهمتها فى توعية البنت وتوضح لها كل التغيرات اللى حصلت لها فى جسمها وكل حياتها سببها إيه

وكمان نقطة مهمة جدا لازم تفهمها أن مشاعرها والحاجات اللى هتتحرك جواها مش عيب ولأن للأسف الشديد مهما حاولنا نكبت ونقهر بناتنا ونبعدهم عن كل شىء وأى شىء برضة هيحصل تحرك لمشاعرها حتى لو كان اعجاب بس المهم البنت هتتصرف معاه أزاى وده دور الأسرة

ونفس الشىء بالنسبة للولد وأن والده المفروض يقعد معاه ويكلمه فى كل حاجة خاصة بيه بطريقة مبسطة ومش مبتذلة ويقرب منه أكتر

وفى النهاية هيبقى الأب والأم أصدقاء لولادهم وعارفين كل شىء عنهم ومفهمينهم كل شىء وحتى لو حصل والبنت أو الولد خبوا على أهلهم شىء خاص بمشاعرهم هيبقوا على الأقل واثقين أن ولادهم مش هيغلطوا وأن الموضوع مش هيتعدى شوية دقات قلب مع آحلام وردية مش أكتر ومع مرور الوقت هتروح لحالها

ولأن أول تجربة وأول دقة قلب دى بتعمل أثر كبير جوه أى واحد وواحدة وبيترتب عليها حاجات كتيرة بس المهم نعرف أزاى تتعامل معاها من غير ما نعمل حواجز وأرهاب لأولادنا ومن غير ما نسيب ليهم الباب مفتوح على الآخر ولكن خير الأمور الوسط

فيه حاجة أخيرة ومهمة جدا أن كل ما كانت الأسرة مستقرة وفيه بينهم وفاق وعلاقات كويسة ده بيقلل من موضوع حدوث مشاعر الحب أو الأعجاب عند البنت أو الولد لأى حد

لأنهم ما بيكونوش مفتقدين الحب والحنان وعلشان كده ما بيدوروش علية برة ولأن أكتر حاجة بتخلى الأبناء تتحرك مشاعرهم فى السن دى لأى حد أفتقادهم للحب والحنان داخل الأسرة وأنشغال الأب والأم عن ولادهم وإهمالهم ليهم وأن يكون فيه مشاكل كتيرة وتكون الأسرة مفككة ومفيش صداقة بين الأهل وولادهم

يعنى الخلاصة تصاحب ولادك وتديهم لمسة حنية وحضن دافى علشان ما يدوروش عليم برة

أتكلموا معاهم وصاحبوهم علشان ما يدوروش على الصاحب ده بره وممكن يكون صاحب سوء

كل سنة وأنتم طيبين

2010-11-11T09:52:00.001+02:00

ليلى الأستبن

2010-11-07T01:25:00.002+02:00

يولد الطفل صغيرا لا يعلم شيئا فى هذه الدنيا ولكنه سرعان ما يكتسب ويرى بعينية الكثير من العادات التى تحفر فى عقله ولا تخرج أبدا منه مهما حدث

منها أنه يجب أن يكون الأمر الناهى وكلمتة تسير على أخوته البنات !!

وأنه يجب أن يجلس مثل الديك الشركسى وكل من حوله يخدمونه فهذه تحضر له كوب الماء وهذه الطعام وهذه الملابس وهو جالس سلطان زمانه ويعتقد أن هذا حق مكتسب له

فأنا لا أمانع من مساعدة وخدمة البنت لأخيها ولكن بأى منطق بمنطق أنها الخادمة الموجودة فى هذا البيت ويجب أن تفعل كل شىء أم تفعل هذا بكل حب لأخيها ولكل من فى البيت

بالطبع كثيرات يفعلوا هذا لأن الكل ينظر لهم على أنهم يجب أن يخدموا أخواتهم الولاد ولا يكلف الولد بأى شىء كأنه كائن من الفضاء مثلا

وعندما أرى هذه الأشياء وبالطبع هذه أشياء بسيطة بالنسبة الى الضرب والقهر والخ

أحمد الله على أن والدتى لم تفرق فى تربيتى أنا وأخوتى وكنت بالطبع أفعل لهم أشياء كثيرة ولكنى كنت أفعلها بالحب لا بالقهر وكثيرا عندما كنت أتجمع أنا وهم ونجلس سويا أمام التلفاز يقوم أحدنا يحضر العشاء وأخر يدخله وأخر يحضر الشاى وهكذا فلم أشعر معهم بأى تمييز أو قهر

ويظل يتدرج الولد فى الأشياء التى يفعلها ويكتسبها حتى يصل الى وجود عدة ليلات فى حياتة ووجود من هن أستبن ( يركنهم على جمب حتى يحتاج اليهم )

ومن الممكن أن تكون ليلى الأستبن زميلة أو حبيبة أو عشيقة أو زوجة أو أخت أو أم الخ

فكثيرا ما يكون الرجل متزوج وفى نفس الوقت يعرف أمرأة أو أكثر على زوجتة ويترك زوجتة جانبا كالأستبن ويعلم جيدا أنها موجودة لن تذهب الى أى مكان ويفعل هو كل ما يحلو له وعندما يريد العودة للأستبن يعود

وأيضا عندما يكون حول الولد عدد من الفتيات ويشعر بحب أحداهن له ولكن هو لم يحسم قراره بعد تجاهها فيتركها هكذا معلقة لا يقطع علاقتة بها ولا يوطدها ولكنه يتركها كالأستبن ويظل يتنقل بين واحدة والآخرى ويترك المسكينة هكذا حتى يحن عليها فى نهاية المطاف ومن الممكن أن لا يحن عليها ولكنه يشعر بمتعة كبيرة من مجرد أحساسة بمشاعرها تجاهه وبأنها موجودة تحت الطلب

والكثير والكثير من الأمثلة والتى يضع فيها الرجل عدد من النساء أستبن له

ولكل ليلى لا تتركى نفسك فى هذا الوضع مهما كلفك هذا وتعرضتى لمشاكل وألم ولكن سوف يكون شعورك أهون بكثير من شعورك بأنك شىء مركون على الرف حتى يفعل الرجل ما يحلو له ويفكر ماذا يفعل معك

-------------------------------
العدد السادس من مجلة البوسطجى لتحميل العدد من
هنا

الجواز مسئولية مين ؟

2010-10-31T22:00:00.001+02:00

أنا عايز أتجوز ؟

أنا عايزة أتجوز ؟

كلام كلنا بنسمعه أو كنا بنسمعه قبل ما البنات والولاد يدخلوا فى مرحلة الأضراب الجماعى عن الجواز

ولكن هل حد فينا فكر فى هل هو أو هيا قد المسئولية وهيقدر يتحمل الحياة بكل مشاكلها ومسئولياتها ؟

هل كل أسرة حاولت تربى فى ولادها شعور تحمل المسئولية وبتبدأ من صغرهم تغرس جواهم مفهوم الأسرة المتكاملة والمسئولية تجاه البيت وأنهم فى يوم من الأيام هيعملوا أسر وهيبقوا مسئولين عنهم ؟

هل فكرنا فى يوم من الأيام أننا عايزين نبنى أسرة ما تتهدمش أبدا ؟

ولا كل تفكيرنا بس فى حاجات سطحية ومالهاش لازمة وكل طرف بيبقى مخطط أنه هيرمى مسئولية البيت من أولها لأخرها حتى الأولاد وكل شىء على الطرف التانى

أكيد هتكون الأجابة عند معظمنا مفهوم أسرة إيه ومسئولية إيه دى أنا عايز أتجوز أو عايزة أتجوز وخلاص

هو أنا هدور على عروسة ولا عن رئيس جمهورية

ولا أنا هدور على عريس ولا هفكر فى الكلام اللى مش جايب همه ده مش لما الاقى عريس الأول

الخ من الكلام اللى ممكن تسمعه من بنات وشباب وكتير قوى

واللى منهم لما بيفكر يتجوز ما بيفكرش فى شىء غير فى أنه عايز يتجوز وخلاص ولكنه ما بيفكرش فى بعد كده ولا بيخطط لبعد كده

طيب هو العيب فى مين فى البنات والولاد ولا فى الأهل من البداية اللى ما ربوش جواهم مفهوم الأسرة والمسئولية

وهو لسة فيه حد أصلا بيفكر فى الكلام ده وفى أنه لما بيدور على نصه التانى مش بس بيدور على جوازة والسلام ده بيدور على حد يكون معاه أسرة وعيلة ليها هدف محدد مش بس جواز علشان تكملة الشكل الأجتماعى والأنضمام الى ملايين الناس المتجوزة وبتخلف وخلاص وبعدها ترمى ولادها ولا تعرف عنهم حاجة

لو بصينا بصة سريعة على حالات الطلاق المبكرة واللى ما بيعديش على الجواز شهور أو سنه أو أتنين هنلاقى أن حالات كتيرة منهم قوى سببها أن الجواز ماكانش مبنى على أسس من البداية وأن كل طرف ما دورش على طرف يكمل معاه الحياة ويتحمل ويعانى معاه ويكافح علشان يبنوا نفسهم ويبنوا أسرة ما تنهدش أبدا

ولكن للأسف محدش بيفكر كده كل واحدة أهلها عايزين يجوزوها علشان يخلصوا منها أو ممكن تكون هيا عايزة تتجوز علشان كلام الناس والمجتمع والتخلص من العنوسة

وهو عايز يتجوز لمجرد الجواز وخلاص ومش فارقة معاه أى حاجة

ولأنهم من الأول محدش فيهم فكر هل ده هينفع يبقى أب كويس لولادى وقدوة ليهم وهيقدر يبنى معايا أسرة كويسة

وهل الأنسانة دى هتبقى فعلا أحسن أم لأولادى وأعظم زوجة تقف معايا ونكافح مع بعض ونكمل حياتنا سوا لآخر يوم فى عمرنا وينتج عن ترابطنا ولاد يكملوا المسيرة من بعدنا

محدش فكر أن الجواز ده لازم يكون مودة ورحمة مش خناق ومشاكل ومظاهر فارغة

محدش فكر أن الجواز ده توافق وقبول من البداية ولو ماكانوش موجودين يبقى بلاش الجواز دة لأنه هيفشل

محدش فكر أن عايز أنسانة تبقى كل حاجة له فى الدنيا

محدش بيفكر فى أى حاجة لأننا ما أتربيناش على كده ولا لاقينا حد يكبر الفكرة دى جوانا وملايين الأسر المفككة بينتج عنها بنات وشباب تفكيرهم مش سوى وبعد كده لما بيتجوزوا بيعملوا أسر مش سوية ومفككة ويفضل الموضوع مستمر وممتد الى ما لانهاية

ولكن لازم يبدأ الحل مننا ما هو مش هنفضل طول عمرنا نقول أهلنا السبب وبغض النظر خلاص أحنا عرفنا المشكلة وفى إيدينا الحل لية ما نبدأش بنفسنا وكل واحد يفكر فى الجواز بطريقة مختلفة وبأنه فعلا عايز يبنى أسرة يكون ليها هدف فى الحياة ، أسرة مترابطة ما تتهدمش مهما حصل ويكون ليها أمتداد ، أسرة بينها مودة وحب وأخلاص وصداقة وكل الحاجات اللى نفسنا تبقى موجودة

البداية مننا ولأن النهاية هتكون بسبب البداية وأحنا اللى هنحدد النهاية هيكون شكلها إيه

بقلم بسمه عبدالباسط

كيلو العروسة بكام النهاردة ؟؟

2010-10-27T20:13:00.003+02:00

كثيرا كنا نسمع جملة ( أحنا بنشترى راجل ) لأى شخص متقدم للزواج من أى فتاة وكان هذا قبل تغير المفاهيم والموازين والمعايير لأختيار العريس

ولكن الآن بعد التطور الفظيع الذى أصاب مجتمعاتنا أصبح المقابل لهذه الجملة وأنت هتدفع كام أو بلغة أرقى وأنت ناوى تعمل إيه والمقصود بها عند بعض الناس ناوى تدفع كام أو هتشترى بنتنا بكام زى ما أحنا هنشتريك كده

وليس غريبا أن نرى قريبا معلق على كل منزل يافطة بسعر كيلو العرائس الموجودة فيه

صدقونى هذه ليست نكتة ولا قصة من خيالى ولكن للأسف مع كل المشاكل التى تحيط بنا من كل أتجاه وأهمهما المشكلة الأقتصادية والتى تعتبر سبب كل المشاكل توجد أسر تقدر بناتها بمن يدفع أكثر وهذا ليس خاص بطبقات معينة ولكنه موجود فى كل الطبقات والفئات ولكن يختلف بأختلاف المستوى الأجتماعى والطبقة المنتمى لها العريس والعروسة

ولكن منطق البيع والشراء موجود فمثلا فى الطبقات العادية تجد شبكة العروس من الذهب ويجب الا تقل عن مبلغ معين ولكن فى الطبقات الراقية تجد الشبكة أغلى بكثير وثمنها أضعاف ثمن الشبكة الذهب ولكنها تتكون من قطعة أو قطعتان من الألماظ مثلا

فكل طبقة لها مفهومها فى البيع والشراء

وبغض النظر عن المستوى المادى الذى يتمتع به كل هؤلاء وحتى لو كانوا قادرين على دفع كل هذه الأموال فالمشكلة فى منطق البيع والشراء لا أكثر ولا أقل فلا يوجد مانع من الشبكة والمهر وخلافه ولكن بالقدر المعقول والمقبول

ولكننا أصبحنا مثل السلع تماما تباع وتشترى وللأسف توجد فئة من الناس عقولهم مبرمجة على هذا المنطق ويتخيلون أن العروسة سلعة ويجب أن يوضع لها سعر وكل يوم يزداد السعر حسب العرض والطلب

ولا داعى للتعجب أذا ما سمعنا يوما عريس يسأل عن كيلو العروسة بكام النهاردة

بقلم بسمه عبدالباسط

موضوعى فى العدد الخامس من مجلة البوسطجى

لتحميل العدد

تتجوزينى

2010-10-19T07:28:00.003+02:00

كلمة تتمنى سماعها كل بنت وتفرح كثيرا عند سماعها حتى لو كانت من داخلها سوف ترفض هذا الشخص لأى سبب ولكن الكلمة نفسها لها وقع جميل على أذنها

ولأننا منذ صغرنا لا يفعل المحيطين بأى بنت سوى القاء هذه الكلمة على مسامعها من كل من هب ودب فكل من يرى أى فتاة صغيرة الا ويقول لها تتجوزينى حتى أصبحت تسمع هذه الكلمة أكثر مما تسمع أسمها

ومع تطور كل شىء فى حياتنا فأصبحت كلمة تتجوزينى نادرة الوجود وأصبح الزواج عملة صعب الحصول عليها

فالكل الآن يسير بمبدأ أحبك أه أتجوزك لا

نمشى مع بعض قشطة خطوبة وجواز وحوارات أشوف وشك بخير

وأصبحنا نرى أضراب عن الزواج منتشر جدا بين البنات والشباب لأسباب كثيرة لا داعى لذكرها الآن ولكن الغريب والملفت للنظر أنه عندما يفتحها الله على بعض الشباب ويفكرون فى فك الأضراب وفى الزواج يبحثون عن فتاة بها الكثير والكثير من الصفات وهذا لا مانع منه ولكن الغريب والذى يستفز الكثيرات هو أنه يوجد بعض الشباب عندما يسمعون بعض الأشياء التى تفعلها الفتاة يفعلوا شيئان لا ثالث لهما

الأول أن يصرف نظر عنها ويبحث عن عروسة آخرى

الثاانى أن يطلب منها ترك هذه الأشياء التى يراها غير لائقة لأن تفعلها خطيبتة أو زوجتة وأم أطفاله مستقبلا

فما هى أذن الأشياء

أولا النت فأنه العدو رقم واحد لفئة من العرسان وعندما يسمعون كلمة نت تنقلب وجوههم ويرسم عليها مليون وحداشر مش مية وحداشر بس وأذا كان كريم فسوف يطلب منك الأمتناع عن أستخدام هذا الشىء المسمى بالنت وأذا كان غير ذلك فسوف يتركك ويبحث عن غيرك فالنوعان ينظران للنت على أنه رجس من عمل الشيطان

فكيف لزوجة المستقبل أن تكون من البنات النتيتة فاللعنة عليكى مئات المرات

ثانيا لو ربنا كرمك والعريس عدى موضوع النت فأحذرى فمازال أمامك الكثير من العقبات فعندما يسمع كلمة فيس بوك سوف تجدى كل ما حولك أصبح فوق راسك وهذا ليس بسبب تغير الطقس ولكن بسبب المعركة الحامية التى سوف تحدث بينك وبينه

أزاى يعنى فيس بوك وياترى ضايفة بقى ولاد

لا وكمان الناس بتدخل ترد على كلامك وأكيد فيهم ولاد

والمصيبة لتكونى بتفتحى شات الفيس بوك لكل من هب ودب

ثالثا مازالت المعركة قائمة ومازال أمامك الكثير فالقادم بالفعل أسوأ أقصد أفضل ويجب أن تستعدى لأى شىء

فبعد معركة النت والفيس وأذا كان عريسك طويل النفس سوف يتركك لتقصى عليه باقى هواياتك

أحذرى من بعض الكلمات كتابة ، مدونات

طااااااااخ طووووووووووووخ تشششششششششششششششش

لا لا فهذا صوت عقل العريس بعدما وقع عليه خبر حبك للكتابة وأنك بعد الشر تمتلكى مدونة أو أكثر وتكتبى هنا وهناك وفى العديد من المجلات والجروبات ويا حبذا لو كان بينهم جريدة أو أثنان

فالنتيجة هنا غير محسوبة ولا أوعدك بأن الأمور سوف تمر كما تحلمى فغالبا سوف تكون النتيجة بهروب العريس بحثا عن عروسة آخرى

ولو كان من النوع العاقل نوعا ما فسوف يعطيك فرصة للرجوع لعقلك وترك كل هذه الأشياء

وبالطبع سوف تفعلى ما يريحـــــــــــــــــــــــــــــــــــــــــــــــــــــــــــــــــــــــــ إيه بتدوروا على إيه ــــــــــــــــك

وبعدها سوف يذهب العريس غير مأسوف عليه

وفى النهاية وتلخيصا لكل ما فات فيوجد بالفعل نوعيات من الرجال تفكر بهذه الطريقة وحتى لا يعتبرنى البعض جانية ويتهمونى بأنى أظلم الرجال فأنا أؤكد أنه يوجد النقيض تماما من هذه النماذج ولكنى هنا أذكر هذه النماذج التى تتعمد الغاء عقلها بسبب أفكار وموروثات غبية سوف تظل معهم طوال حياتهم

فيوجد بالفعل رجال عندما يعلمون أن أى فتاة تستخدم النت أيا كان نوع أستخدامها له ينظرون لها نظرة غريبة عجيبة ويا أما يتركها ويبحث عن غيرها أو يطلب منها ترك التعامل نهائيا مع النت والموضوع ليس خاص بالنت فقط ولكن بموضوع الكتابة هنا وهناك

ولكن أذا كانت هذه أفكاركم فلماذا تحللوها لأنفسكم أم أنها صواب لكم وخطأ على غيركم

ولماذا أخترتم فتاة من البداية تفعل أشياء أنتم ترونها غير لائقة فالدنيا مليئة بالفتيات التى لا تفعل أى شىء فى حياتها والتى لا تستخدم النت والتى لا تكتب ولا توجد لها هوايات ضد رغباتكم أم أن نداء سى السيد مازال يسيطر على البعض منكم فكل شخص يريد فتاة بها كل المواصفات التى يتمناها أى شخص وبعد ذلك يمارس عليها لعبة سى السيد فى كبت حريتها وهوايتها بدون مبرر واضح ومفهوم

وكل مبرره بأنه عيب وما يصحش

وفعلا العقل زينة ولكن لمن يستخدمه لا يضعه على الرف حتى يملأه التراب

بقلم بسمه عبدالباسط

عروسة كدة وكدة

2010-10-10T17:25:00.006+02:00

كثيرا منا يعلم جيدا معنى كلمة عروسة الا وهى العروسة واخدين بالكم طبعا

ولكن الغريب أن يظن الكثيرون أن حضرتك عروسة وأنتى مش عروسة ولا يحزنون وتظلى تسمعين فى كل وقت وكل موقف مبروك يا عروسة لتصرخى فى وجوههم مش أنا العروسة والله ما أنا العروسة والمشكلة أن لا أحد يصدقك ويتخيلون أنك تتظاهرى بهذا حتى لا يحسدك الآخرين

بدأت الشكوك تدور حول كونى عروسة منذ أكثر من عام ونصف بعد خطوبة أخى الكبير ولأن الكل يسمع أصوات زغاريط وأغانى فى شقتنا ولا يوجد بالطبع غيرى لأن أخواتى خارج البلاد فالكل يستخدم عقله الذكى ويترك له العنان ليستنتج زغاريط من هذه أكيييييييييد أنا مع أنى أكدت مئات المرات أن هذه الزغاريط خاصة بأخى ولكن لا حياة لمن تنادى

فالفهلوة المصرية لا تعلو على أى فهلوة والكل يصر أنها خاصة بى لدرجة أنى مللت من كلامهم وتطفلهم وتركتهم يتخيلون أنى العروسة طالما لا أحد يصدقنى

والغريب أن الأمر لم يتوقف على جيراننا وأصحاب المحلات الموجودة فى شارعنا والذين يعرفون دبة النملة عن كل شخص فى العمارة والشارع فنحن تحت المراقبة طول اليوم ولا يخرج أحد من البيت أو يدخل الا ونجد كل العيون تترقبنا ولو معنا أكياس أو شنط من الممكن أن تخرمها أعينهم المتعطشة لمعرفة ما بداخل هذه الشنط

ولكن الغريب أن السيدات التى تعمل فى المحلات التى نتردد عليها أنا وأمى كثيرا لنشترى أشياء خاصة بتجهيز المنزل يرددون نفس الكلمة ولا أدخل أى مكان الا وأسمع كلمة مبروك يا عروسة وإيه رأيك فى دى يا عروسة وربنا يتمم بخير يا عروسة وبعد سيل من الكلمات التى يتبعها كلمة عروسة أرد عليهم بكل هدوء وتعلو وجهى أبتسامة متعجبة مش أنا العروسة أنا أخت العريس ليردوا جميعا عقبالك يا عروسة

وبما أن التطفل طبع أصيل فوجدت واحدة منهم بعد معرفة الحقيقة تقول لى إيه ده هو أخوكى هيتجوز قبلك كأنها مشكلة قومية مثلا وكأنه يجب على كل أخ الا يتزوج قبل زواج أخته

فقلت لها أيوة هيتجوز قبلى وقلت لها على فكرة أنا فسخت خطوبتى من زمان ولأنى أكتشفت أنها متذكرة أنى كنت مخطوبة فى وقت ما وكنت أتردد على هذا المحل لشراء أشياء كثيرة

ولكنها تعجبت أكثر وأكثر كأنى شتمتها مثلا وقالت لى لية بس حصل إيه ، ربنا يوفقك وتلاقى نصك التانى ووالله هو الخسران ، يا بنتى هو يلاقى زيك فين ، وتركت لها الميكروفون هى وسيدة آخرى لسيل الدعوات والكلمات كأننى من باقى عائلتهم وهى تعرفنى جيدا وأنا أنظر لها بأبتسامة بلهاء لا أكثر ولا أقل

وتكرر مشهد مبروك يا عروسة عند حجز القاعة والكوافير وكروت الفرح وكل شىء وأى شىء خاص بالفرح وأرد عليهم بنفس الأبتسامة مش أنا العروسة أنا أخت العريس

طيب عقبالك يا عروسة صبرنى يارب

فأنا الآن والحمدلله سمعت كلمة عروسة كثيرااااااااااااا وبشكل مستفز لدرجة أن هذا كفيل فى أعلان كراهيتى لكلمة عروسة فما هو دليل كل هؤلاء على أنى العروسة ولماذا الغباء والأستنتاج العبيط لكل تصرف وحركة يفعلها أى أنسان

فما أن يسمع أى شخص زغروطة أو أغنية مفرحة عند بعض الجيران الا ويطلق لعقله العنان لأستنتاج ما سبب هذه الأغانى والزغاريط

وما أن يروا أى أشخاص يشتروا طلبات كثيرة ويدخلون بها المنزل الا ويجب أن يكون وراء هذه الأشياء سبب وإن عرف السبب بطل العجب

ولكنه هو بغباوتة بسلاطاتة ببابا غنوجه التطفل الغبى والمستفز والتدخل فيما لا يعنى الآخرين ومحاولة معرفة ما السبب وراء كل ما يجرى عند الآخرين بفهلوة وحداقة غريبة

ومازلت أسمع كلمة عروسة وأستعد نفسيا لسماع كلمة عقبالك ولكن هذه المرة من غير عروسة وسوف أسمعها بلايين المرات فى الأيام السابقة والمتزامنة لفرح أخى

والعاقبة عندكم فى التطفل

ومبروك يا عروسة

-------------------------------
العدد الثالث من مجلة البوسطجى

لينك المجله علي عيون مصر
http://www.egypteyes.com/ar/life-style/elbostagy-magazine/2006-el-postagy-third-issue.html

لينك مباشر لتحميل المجله من ميديا فاير
http://www.mediafire.com/?808jfezvc757cuz

بقلم بسمه عبدالباسط

شات المحبة أتخرم

2010-09-02T15:40:00.002+02:00

بعد تطور التكنولوجيا وتوغلها فى حياتنا بشكل كبير لدرجة أنها جعلت العلاقات الواقعية تندثر وأصبحت معظم علاقات الناس أفتراضية من تواصل عبر ( الميل ، الفيس بوك ) وغيرها من وسائل الأتصال

ليس غريبا أن نجد علاقات المتزوجين أو المخطوبين أو الحبيبة ما علينا أصبحت أفتراضية ولكن ماذا سيكون شكل الحياة بالفعل أذا كان الطرفان من هواه النت ويقضون عليه ساعات طويلة

فللأسف أفقد النت روح التواصل الواقعى بين كل الناس وخاصة الأسرة الواحدة فكل فرد فى الأسرة مشغول بجهازة أو لاب توبه ومنهمك عليه ولا يشعر بأى شخص حوله

وليس مستبعد أبدا أن نجد الزوج والزوجة يجلسان على كنبة الأنترية وكل واحد منهم يمسك باللاب توب الخاص به ولا ينطقان بحرف واحد مع بعضهما ولكنهما يتكلمان على الميل أو الشات ويتخذونه وسيلة للحوار بدل الكلام المباشر وهذه بدايات الخرس الزوجى فبعد ما كان التليفزيون والجريدة من أسباب الخرس أنضم اليهم ضيف جديد وأشد قوة منهم الا وهو النت

ولكن هل سوف نجد فى يوم من الأيام الزوجة غاضبة من زوجها لأنها أكتشفت أنه عامل لها بلوك على الميل وأنه لا يعلق على أى شىء تكتبه فى مدونتها ولا فى الفيس بوك وتعتبرها أهمال والعكس بالنسبة للزوج ونجدها تغنى شات المحبة أتخرم من كتر تنفيضك

أعتقد أذا أخذت الحياة هذا الشكل بينهما سوف تفشل فشلا ذريعا لأنه ليس من الضرورى أن يعلق الخطيب أو الزوج على كل ما تكتبه الزوجة والعكس صحيح لأنه بكل بساطة ممكن أن يعبر لها عن رأيه وجها لوجه ويرى أنه لا داعى لتعليقة وهذه وجهه نظره

ولكن المشكلة الأكبر أن أنبهارنا وأعجابنا وأدمانا للأنترنت عامة من الممكن أذا لم نفكر جيدا فى تصرفاتنا ونحاول أن نوجد أوقات للتواصل الواقعى بين الأهل والأزواج والأولاد أن يؤدى الى كارثة كبيرة

فالصمت أو الخرس لأنه الأقرب لما يحدث وأنشغال كل طرف بما يفعله دون النظر لأى شىء آخر يعد شىء خطير

فأين الحوارات التى كانت تحدث بين الأهل كلهم وأين حوارات الزوج والزوجة ، الخطيبة والخطيبة

واليك / ى ليس معنى قلة أو كثرة التعليقات أو اللايكات الأفتراضية هو الدليل على كثرة أو قلة الأهتمام أو الحب فأبحث / ى على طرق للتواصل الواقعى وأنجز/ ى ما تفعلوه على النت حتى تجدوا وقت للتواصل الواقعى تجبنا لوصولنا لحالة الأصنام التى لا تتكلم ولا تتحرك

فساعة من وقتكم للحديث مع الأهل الأزواج الأصدقاء أيا كانت العلاقات تساوى مليون ساعة تواصل على النت

بقلم بسمه عبدالباسط

زهرة المرأة التى لا نعرفها

2010-08-29T06:01:00.003+02:00

زهرة وأزواجها الخمسة عنوان غريب وملفت للمسلسل الجديد لبطلتة غادة عبدالرازق ولكن ليس العنوان كل المشكلة لأنه جاء من خلال قصة غريبة نوعا ما ولكنها من الممكن أن تحدث فى الواقع

وبغض النظر عن القصة وعن ما بها من أشياء غريبة ولكن نموذج المرأة التى ظهرت عليه زهرة هو الملفت للنظر ويستحق الكلام والبحث

فمن هذه المرأة التى يتحدثون عنها وما هو الهدف من تقديم هذا النموذج وما هى القيمة التى خرج بها من شاهد هذا النموذج المشوه للمرأة

النتيجة التى أستخلصتها حتى الآن هى أنها امرأة لا تبحث الا عن المال بغض النظر عن أى شىء

امرأة ليس لها مبادىء ولا عندها وفاء وفى أول كارثة لزوجها تركتة وطلبت الطلاق فعلا ونعم الوفاء والأخلاص

وفجأة أحبت شخص آخر وتحركت مشاعرها وعاشت مشاعر الحب ولكنه حب وقتى فبعد موت الزوج والأنهيار العصبى والحالة النفسية السيئة لم تتردد عن الزواج من صديق زوجها

فأين الحب الذى كانت تتكلم عنه وأين الوفاء وأين المبادىء التى لم نرى لها حس ولا خبر فى حياتها

وأين واجبها تجاه أطفالها فكل دورها أن تتزوج وتنجب وترمى الطفل وهكذا

وحتى عندما حدثت المفاجأة وألغى زوجها الأول حكم الطلاق وظهر زوجها المتوفى وهى على ذمة زوج ثالث وبغض النظر عن صحة أو خطأ أى زواج منهم نجدها هادئة باردة أعصابها فى ثلاجة ولا يفرق معها أى شىء

لم تفكر للحظة هل ما هى عليه الآن صواب أم خطأ ، حلال أم حرام كل ما كان فى بالها أن تهرب من زوجها الذى أخذ حكم ببطلان الطلاق

فما هو الهدف من رؤيتنا لهذا النموذج من المرأة وما هو الهدف أو القيمة التى خرجنا بها فكل ما أستخلصته حتى الآن يتلخص فى النقاط التالية

أولا أنها امرأة بلا مبادىء ولا قلب

ثانيا لا يهمها غير المال

ثالثا لا تعرف معنى للوفاء والأخلاص والحب

رابعا لا تعرف معنى كلمة أم

خامسا لا يهمها غير مصلحتها والجرى وراء غرائزها

وأخيرا هل هذه هى المرأة التى يحبها كل الرجال ويتهافتون عليها وعلى التقرب لها كما هو واضح فى المسلسل أم أنهم يبحثون عن الجمال الشكلى فقط لا غير؟

ولماذا جاءت فى المسلسل كأنها ضحية ومجنى عليها ؟

بقلم بسمه عبدالباسط

عمل خير وفطار جماعى

2010-08-14T23:14:00.001+02:00

التفاصيل هنا

الحياة بقى لونها صينى

2010-08-01T12:17:00.001+03:00

قرب قرب قررررررررررررررب عروسة يا بيه عروسة يا هانم

عروسة صينى بأقل التكاليف ب 1500 جنية بس هتحصل على زوجة صغيرة الحجم لا تتكلم هتعمل فيها خرسة يعنى وحتى لما تتكلم سيبها تكلم نفسها بقى ما أنت مش فاهم حاجة

وصغيرة الحجم ممكن تشيلها فى جيبك جمب المحفظة ومش عايزة فرح ولا شبكة ما هو كفاية أنها لاقت حد يتجوزها وهتضمن أن عيالها يبقى ليهم شكل مختلف بدل النسخ المكررة عندهم

تقدس الحياة الزوجية وماهرة فى فنون الطبخ خاصة الضفادع والصراصير الطازجة وكل يوم هتعملك أكله مختلفة يوم صينية صراصير بالبشاميل ويوم صراصير محمرة ويوم ضفادع مقلية وهكذا وعيش بقى

قرب قرب قرب البضاعة مش مضمونة ولا ترد ولا تستبدل وعلى المتضرر اللجوء لمصلحة البضائع الصينية وقابلنى لو حد عبرك

قرب وجرب وممكن تاخد فكرة وتشترى بكرة

فبعد غزو الصين لنا بكل شىء بداية من الأبرة الى الصاروخ ودراستها لسوقنا وطريقة تفكير الغالبية العظمى بدأت فى الترويج لبضائع أكثر وأهم حتى تحظى على نسبة مبيعات عالية

فمنذ عدة شهور فاجئتنا العزيزة الصين بمنتجها الأكثر وقاحة الا وهو غشاء البكارة الصينى وبعد ما وجدت خيبه أمل فى ترويج بضاعتها أو ربما تكون كسبت منها الملايين الله أعلم فكرت فى غزونا بمنتج جديد سوف يلاقى رواجا هائلا الا وهو العروسة الصينى وبغض النظر عن العروسة سواء كانت صينى أو تايوانى أو حتى هولندى فكل أنسان حر فى أختياراتة وما يتبعها من مشاكل اليس داخل روؤسهم عقول يفكرون بها

ولكن أكثر ما أستوقفنى هو كمية الأتهامات الملقاه على عاتق الفتيات المصريات وأنهم أستغفر الله العظيم سبب كل مشاكل تأخر سن الزواج بالنسبة للطرفين وتعددت الأسباب منها المغالاه المبالغ فيها مع أنى أرى بعينى هذه الأيام ومنذ زمن الكثيرات يقللن جدا فى طلباتهن ويحدث شىء من أثنين يا أما يستخف بها الطرف الآخر ويراها تبيع نفسها ومش لاقية حد يبص لها ويا أما لا ينظر لها من الأساس ولا يفكر فى الأرتباط بها

وأسباب أخرى منها أن الفتيات متعجرفات وتريد أن تكون الند بالند بالرجل وأنها لا تتحمل مسئولية بيت وغيرها من الأتهامات التى أراها ظالمة وكلامى هذا عن تجربة ورؤية لفتيات كثيرات وليس كلام خيالى أو من كوكب المريخ مثلا

ولكن نسبة الى أن مجتمعنا مازال يتمتع بفكر ذكورى بحت فمازال يلقى كل التهم على الفتيات فى كل شىء

لذلك لم أرهق نفسى فى الكلام أو الدفاع عن جزء من الفتيات يأخذ فى الرجلين ولكن لى كلمة أخيرة للشباب أذا كانت الفتيات المصريات بهن كل العبر فالبهنا والشفا عليكم العرايس الصينى

بقلم بسمه عبدالباسط

قعدة ستات

2010-07-18T15:18:00.002+03:00

جلست بينهم أستمع الى حديثهم بشغف شديد وأنا صامتة أستمع فقط وهذا لأننى أعتبر الأصغر سنا فكلهم يتراوح عمرهم من 40 الى 60 عاما لذلك لم أتدخل فى حديثهم حتى أرى هل ما يدور بعقلى هو ما يدور بعقلهم مع أختلاف الأعمار

لا أعرف سببا للحديث عن هذا الموضوع الا وهو سر أنجذاب الرجل لأى امرأة خارج المنزل ونفس الشىء بالنسبة للمرأة

فكلهن متزوجات ومنهم من تزوج أبنائهم أيضا ولكن وجدت نفس الكلام يتردد وكانت هذه بعض كلماتهم

ما هو لو الراجل شاف الواحدة اللى برة البيت دى ولابسة اللى على الحبل ومهتمة بشكلها جوه البيت وبتطبخ أو بتعمل شغل البيت وبيبقى شكلها أزاى ما كانش بص لها أساسا ولأنهم فاكرين أن اللى بيشوفوه برة هيبقى موجود معاها جوه ولما واحد فيهم بيجرب ويعرف واحدة تانية ويتخيل أن الكلام الحلو بتاعها والمياصة والشكل الحلو هيفضلوا موجودين لو أتورط معاها ووصل الموضوع لأكتر من كده هيعرف أنها جوه البيت مش زى براه

ما هى لو الهانم اللى شايفة الراجل لابس وحاطط برفان وعمال يضحك ويهزر معاها وواخد كل حاجة أيزى وهو قاعد فى بيته بالفانلة وكرشة قدامه مترين وشعره منكوش ودقنة عاملة زى العنكبوت ماكانتش عاشت فى الوهم كتير ولكن اللى بره دايما بيبقى غير اللى جوه

وبعد سماعى لهذه الكلمات وأكثر منها بكثير لم أستطع لوم واحدة منهم على كلامها ولأن هذا الذى يحدث بالفعل كل رجل متخيل أن أى فتاة يراها خارج المنزل على شكل سوف يراها كما هى داخل المنزل ونفس الشىء بالنسبة لأى فتاة وهذا سبب الكثير من المشاكل بين معظم المتزوجين لأنهم الى الآن ليس عندهم أى أستعداد للنظر الى نص الكوب المملوء والى محاولة حل المشكلة ولكن كل ما يحدث هو هروب من المشكلة الى مشاكل أكثر وأكثر وأكثر

فمثلما يريد الرجل أن يرى زوجتة فى المنزل مثل نانسى عجرم وغيرها وغيرها فماذا يفعل هو وهل يكون هو مثل الكثيرون ممن تراهم أم هو يريد أن يأخذ فقط

الكثير من الفتيات يكون عندهم أستعداد لأن يكونوا مارلين مونرو ولكن عندما يقابل هذا بشخص مثلما يقال قاعد بالفانلة وشعره منكوش ودقنه زى العنكبوت هيكون عند أى واحدة نفس تعمل حاجة فى نفسها

الأمر بسيط فى الغاية ولكننا نريد تعقيد كل شىء بإيدينا وأسهل حل هو النظر خارج المنزل أو البحلقة فى التليفزيون على الممثلات والمطربات ولوم الزوجة على كل شىء وأى شىء

فكلمة صغيرة لك عزيزى الرجل أذا كنت تريد زوجتك أنثى بجد فيجب أن تكون لها رجل بجد

بقلم بسمه عبدالباسط

المهم أنها بنت

2010-06-30T21:17:00.001+03:00

"المهم أنى بنت"

" والأهم أنى لسة محافظ عليها بنت"

تفكير غريب بقى منتشر جدا بين البنات والولاد فى علاقات الحب وما شابه... وهو أنهم ممكن يعملوا أى حاجة وكل حاجة وفى النهاية تلاقى الواحدة تقولك المهم أنى بنت ونفس الشىء بالنسبة للولد تلاقية يردد نفس الكلمة أحنا عملنا كل حاجة ولكننا محافظين أنها بنت

يعنى هو مش مشكلة أصلا هما علاقتهم وصلت لفين وعملوا إيه...!!!

مفيش عيب ولا حرام ولا احترام خطهم الاحمر بس انها بنت

وبغض النظر عن الحب نفسه وإيه الخطوط اللى لازم ما حدش يتعداها ولكن من كام سنة كده وأنا تقريبا فى الثانوية كنت أسمع واقرأ وأشوف أن أخر حدود الأتنين اللى بيحبوا بعض أنهم ممكن يمسكوا أيدين بعض وكانوا بيعتبروها جريمة وبيحسوا بالذنب قوى

وعشان يبرروا لنفسهم أى حاجة تانية عايزين يعملوها أنتشر الجواز العرفى وباقى أنواع الجواز اللى مازالت منتشرة عشان يقنعوا نفسهم أنهم ماشين صح ولكن على الأقل كان جواهم شوية أحساس أنهم مش عايزين يعملوا حاجة غلط وكانوا بيحاولوا يحللوا لنفسهم الموضوع ده

شوية شوية الموضوع كبر بقى وما بقاش فيه حدود ولا حاجة غلط ولا عيب ولا حرام وبقى عادى جدا أتنين بيحبوا بعض يمسكوا أيد بعض يلمسوا بعض يعملوا أى حاجة وكل حاجة والمشكلة فى دماغهم اللى مصورة ليهم أن كل ده عااااااااااادى والحاجة الوحيدة الغير مسموح بيها هو القضاء على عذرية البنت !!!

طيب سؤال كده على السريع

هما لية بس بيحاولوا يحافظوا على النقطة دى ؟؟

وطبعا الأجابة الطبيعية والمنطقية أنهم حاسين أنهم بيغلطوا ولكنهم بيحاولوا يقللوا أضرار الغلط ده بحيث لو حصل مشاكل والأهل ما وافقوش على الجواز كل واحد يكمل حياتة مع حد تانى ولا كأن فيه حاجة حصلت

كل اللى أعرفه ومؤمنة بيه بغض النظر عن نوع ديانة أى واحد أو عاداته وتقاليده أو مستواه الأجتماعى والثقافى أن جسم البنت ده حاجة كبيرة قوى ولازم تحافظ عليه وما يبقاش مباح لأى حد حتى لو ديانتها أو تقاليدها اللى هيا فيها مش مانعة ده بس اللى أعرفه أن أى واحدة عندها كرامة وعزة نفس لازم يبقى جسمها عندها له قيمة أكتر من كده مش أى حد يضحك عليها بكلمتين تسلم نفسها له حتى لو كان بيحبها بجد

فى النهاية المشكلة كبيرة وبتكبر وبتنتشر بشكل غير طبيعى وفيه بنات وشباب كتير جدا شايفين أنه عادى جدا أو ان ده التطور الطبيعى للحب

هنوصل بقى لنقطة الدين واللى أكيد بتحرم العلاقات دى ومهما كل البنات والولاد دول حافظوا على كون البنت بنت ده ما يمنعش أن كل حاجة بتحصل حتى لمسة الأيد غلط وغلط كبير جدا وحراااااااااااااااااااااااام

زمان وكان يا ماكان كانت اللى بتفكر بس مجرد التفكير فى واحد وما بيتعداش الموضوع موضوع العقل والتفكير مش أكتر كانت بتعتبر نفسها بتعمل حاجة غلط وكبيرة قوى وبتحاول ما تعملهاش

ولكن ياترى إيه اللى حصل خلى البنات تبيع نفسها كده وإيه اللى حصل وخلى الولاد يستسهلوا كل حاجة كده

ما هو الغلط مشترك بين الأتنين والأتنين عقولهم وتفكيرهم بقت محتاجة إعادة تأهيل وبناء من جديد ولكن هل فيه أمل عقولهم دى تتغير وترجع تانى طبيعية

ياريت أعرف رأيكم ووجهه نظركم وإيه الحل علشان ترجع قيمنا من جديد تنتشر بدل الأفكار الغريبة اللى بقت مسيطرة على عقول الناس

بقلم بسمه عبدالباسط

هو صحيح الحب بيختفى

2010-06-29T00:57:00.003+03:00

اختفاء الحب بعد الجواز موضوع قتل بحثا ولكن مازال عندى فضول كبير أعرف الأسباب اللى بتخلى الحب يهرب من الشباك لما المأذون يدخل من الباب وتبقى الحياة روتينية ممله وتبقى الناس زى اللى مربوطين فى ساقية عمالين يلفوا حوالين بعض وحوالين نفسهم وعايشين فى خنقة ومشاكل وعدم تفاهم مالوش نهاية

والحكاية بسيطة قوى كل ما أكلم واحدة صاحبتى أو أعرفها بأى طريق ومتجوزة وتيجى سيرة البيت والجواز والعيال الاقى كم من الخنقة والتريقة واللعن فى الجواز وسنين الجواز وفى الراجل والعيال وفى العيشة كلها وطبعا بعد كم الأكتئاب اللى بيشع من كلامهم فجأة الاقى التفاؤل نزل تانى وأسمع السؤال المحفوظ ها مفيش حاجة

بالذمة بعد الكلام اللى بسمعه منهم هيبقى عندى نفس أعمل حاجة ده حتى لو فيه حاجة هقتلها بدل ما أدخل فى نفس الساقية دى

والأهم أن مش كلهم جواز صالونات ولا جواز حب بس ولكن من ده على ده ولكن فى النهاية كل كلامهم بيبقى متشابه يعنى مش فارقة فى النهاية لا الجواز عن حب ولا جواز صالونات ولا حتى مساطب وطبعا دة بناء على تجاربهم والكلام والحاجات اللى بشوفها منهم

وأكيد الكلام دة موجود حوالينا فى ملايين المتجوزين والغريب أن قبل جوازهم بيبقوا حاجة وبعد الجواز بيتغيروا ويتبدلوا ويلبسوا نضارة سودة للحياة وبيحسوا أن الجواز نهاية المطاف والحياة وبكده هما نهوا رسالتهم فى الدنيا

طيب لو كان هو ده الحال وفعلا الحب بيهرب من الشباك أول ما المأذون بيدخل من الباب أمال هما عايشين مع بعض لية شفقة يعنى

يعنى لو مفيش حب حتى لو أتولد بعد الجواز أمال الناس هتعيش مع بعضها لية بيعذبوا نفسهم وخلاص ولا هيا بتتجوز علشان لازم تتجوز وبس

هو أكيد الحياه مابتكونش حب فى حب وكلام حلو ورمانسيات على طول وأكيد لازم يكون فيه مشاكل ومنغصات كتيرة ودى الحياه العادية لكن حكاية أن الحب مايبقاش موجود وينتهى دى بجد مش قادرة أصدقها أمال أحنا هنعيش مع بعض لية لو ماكناش بنحب بعض أو لو ما حاولناش نحب بعض

ومازلت طارحة السؤال اللى مقدرتش أوصل لأجابة نهائية ليه

هو صحيح الحب بيختفى ؟؟

بقلم بسمه عبدالباسط

دى عادتنا ولا هنشتريها

2010-06-08T19:50:00.003+03:00

العادات والموروثات المصرية الأصيلة اللى مهما عدى عليها سنين بتفضل زى ما هيا كل حاجة بتتطور وتتغير الا العادات دى بتفضل زى ما هيا ويمكن بنزود عليها شوية كمان

وغالبا بتبقى الستات عامل مشترك وأساسى فى فعل العادات دى وتحريض المحيطين على تنفيذها

عادات الزاوج

من أول ما بيتم الأتفاق بين الأسرتين وتبدأ الزيارات وكل زيارة ليها معنى ومدلول وهدايا كتيرة لا تعد ولا تحصى

والعادات دى يمكن متأصلة أكتر فى الأرياف والمدن اللى مش كبيرة قوى

رد الشبكة

ودة بيبقى بعد شرا الشبكة مباشرة ولازم العروسة وأهلها يجهزوا زيارة معتبرة مكونة من أنواع كتيرة من الطيور بالأضافة الى الرز والسكر والزيت والشاى والفاكهة وكل اللوازم الأساسية واللى مش أساسية كمان

تخيلوا بقى كل ده بيدخل له فى كام وإيه لازمته أصلا !!!!!!!!!!!!!!

والغريب أن ممكن يكون الأتنين ما أشتروش شبكة وكل اللى جابوه دبلتين ومحبس وخاتم مثلا وبيبقى رد الشبكة تقريبا ثمنه أضعاف ثمن اللى أشتروة ده

حرب المواسم والزيارات

بعد كده كل طرف بيحاول يبين مهاراته كأنه داخل حرب وكل زيارة لازم ياخدوا معاهم حاجات كتيرة وغالبا بتبقى موازية فى قيمتها المادية للحاجات اللى جات لهم فى الزيارة اللى قبلها فبيردوها وتستمر الزيارات ورد الزيارات بطريقة مستفزة وبتستهلك فلوس كتير جدا بالأضافة الى المواسم وطبيعى أحنا شعب مبتكر دايما وكل حاجة نعملها موسم وليها أحتفال وطقوس مختلفة وتبقى الزيارة من أهل العريس للعروسة متكلفة قد كده وطبعا ما ينفعش أهل العروسة يروحوا بعد كده لزيارة أهل العريس وإيدهم فاضية أو معاهم هدية بسيطة ولازم ياخدوا حاجات قيمتها المادية موازية للى جالهم قبل كده

والمواسم متعددة ومتشعبة ومتفرعة وهيا ( عيد الفطر ، عيد الأضحى ، عاشوراء ، شم النسيم ، عيد الأم ، المولد النبوى ، رمضان ، رجب ، شعبان ) وبكرة يضموا ليها عيد الزلانطين وعيد الشرطة وعيد العمال وعيد النصر وعيد الفلاح والعيد القومى والسيرك القومى وعيد الوكسة وعيد الأسرة

ومفيش تعليق ممكن يتقال على كم الفلوس والهدايا والحاجات اللى بتفضل رايحة جاية ما بين أسرة العريس والعروسة لحد ما يتم الجواز وللأسف الناس دماغها مازالت محتاجة إعادة تأهيل وبناء علشان يفهموا أن التكاليف والمظاهر الكدابة دى ولا ليها أى قيمة

ولكن لا حياة لمن تنادى

فرش العفش

فرش العفش فى بيت العروسين مش مقتصر على المقربين منهم ويروحوا يساعدوهم لا ده بيبقى مولد وصاحبه غايب أو تقريبا بتجيلة نقطة من اللى بيحصل لأنكم هتلاقوا كل عيلة العريس والعروسة وأحتمال البلد كلها جاية ومش جايين علشان يساعدوا فى الفرش لا دول جايين يتفرجوا على العفش وعلى الحاجات اللى العروسة جيباها من سجاجيد ، ستاير ، لوازم المطبخ والنيش اللى مازال أنتيكة والناس بتتعامل معاه على أعتباره المتحف والحاجات اللى فيه للفرجة وبس

بالأضافة الى فرجة الناس على الملايات والبطاطين الخ وخاصة بقى لبس العروسة ولأنهم للأسف ماعندهمش حاجة أسمها خصوصية وما سمعوش عنها قبل كده

عروسة محبوسة

من العادات اللى نفسى أعرف أصلها من فصلها موضوع أن العروسة ما تخرجش بعد الجواز من بيتها قبل أسبوع ودة منتشر جدا فى البلاد الأرياف العروسة ممنوعة منعا باتا من الخروج من البيت قبل أسبوع من بيتها وفيه ناس عندها أكتر من كده

بالأضافة الى الخرافات اللى بتحصل زى مثلا ما يخلوش العروسة والعريس يدخلوا بيتهم يوم الفرح برجلهم لازم حد يشيل العريس ويطلع بيه السلم حتى لو كان مليون دور ويدخله البيت وهكذا العروسة

الصباحية

طبعا الموضوع لسة ما أنتهاش ومش معنى أن الأتنين أتجوزوا كده خلاص بقى الناس هتهدى لا دة لسة فيه بلاوى

يوم الصباحية بقى لازم أهل العروسة يروحوا لها ومعاهم زيارة طبعا كلها أكل وشرب فاكرين رد الشبكة كدة دى بتبقى زيها بس أضعاف أضعافها ولازم تتحط فى عربية مفتوحة ويلفوا بيها البلد كلها علشان تتفرج عليها وتعرف أن أهل العروسة مش مقصرين معاها فى شىء

وبعد ما بتوصل الزيارة لبيت العروسة ياريتها مثلا بتستفيد منها أو أهل العريس ولكن اللى بيحصل أنها بتتوزع على عيلة العريس وأهل العروسة أحيانا !!!!!!!!!!!!!!!!!!!!

وبيفضل موضوع المواسم بالنسبة لأهل العروسة مستمر ولازم برضة أى موسم يروحوا لها ياخدوا حاجات كتيرة ومش بس المواسم دة لو زيارة عادية لازم يكونوا محلمين وشايلين

النقطة

زى ما كلنا عارفين أن لكل فعل رد فعل وكل مناسبة عندنا لازم نخترع لها نقطة اللى هيا الفلوس

يوم قراية الفاتحة لازم أهل العريس ينقطوا العروسة

يوم الحنة لازم عيلة العريس والمعارف والجيران والأصحاب تنقطة وهكذا بالنسبة للعروسة

يوم الصباحية برضة بيبقى فيه نقوط للعروسين من الناس اللى بتزورهم

أول مولود له نقطة

تانى مولود له نقطة

لحد المولود المليون برضة له نقطة

ودة غير المواسم اللى لازم مع الزيارة يبقى فيه فلوس برضة يديها العريس أو أهله للعروسة

وكفاية كده لأنى حاسة أنه هيجيلى نقطة

بقلم بسمه عبدالباسط

أحكى يا شهرزاد ونظرة مرعبة للمرأة

2010-05-30T22:42:00.002+03:00

لم أكن أتوقع أن تكون كل مشاكل المرأة المطروحة فى فيلم خاص بها هى الجنس والرجل فقط ولا شىء غير ذلك

فعندما سمعت أسم الفيلم والضجة التى دارت حولة وحول بطلتة منى ذكى بسبب مشاهدها المثيرة لم يشغل بالى كل هذه الضجة فهى فى الأساس على دراية بما تفعله وما فى صالحها أو ضدها وكنت أتخيل أن الفيلم يطرح بالفعل مشاكل المرأة كلها أو بعض منها على الأقل

الى أن شاهدتة ولا أعلم الى الآن ما هى وجهه نظر المقيمين على الفيلم من هذه النظرة للمرأة ومشاكلها

الفيلم بأختصار صور كل مشاكل المرأة الا وهى الرجل والجنس وكل حياتها تتمحور حول الرجل وعلاقتها به وبأنها بدون الرجل والعلاقة بينهم تعيش فى مأساة ويجب عليها الوصول الى حلها أو دفن نفسها والأنعزال عن الحياة !!!!

فبطلة الفيلم والمحور الأساسى فيه هى منى ذكى المذيعة اللامعة التى كان لها تجربة زواج سابقة ثم تزوجت من الصحفى الطموح جدا والذى يريد كل شىء على حساب كل شىء حتى زوجتة

وعلاقتة هو وزوجتة ليست الا علاقة جنسية ليس أكثر فكل المشاهد والحوارات التى تمت بينهم تدور حول شيئين العلاقة الجسدية ومستقبل الزوج المهنى وطلبه من زوجتة أن تضحى بمبادئها وعملها أذا تطلب الأمر حتى يصل الى ما يطمح له ولا نرى أى حوارات أو مشاهد بينهم تدور حول أى مشاكل أو أشياء آخرى تحدث فى حياتهم

لنصل الى علامة تعجب كبيرة من فكرة أرتباطهم الغريبة هذه ومن نظرة زوجها لها على أنها أداة للمتعة فقط ونظرتها هى الى نفسها وموافقتها على هذا الوضع فهل الحياة الزوجية تتمثل فى العلاقة الجسدية فقط لا غير !!

ويسير الفيلم على هذه الوتيرة وعرض لنماذج نسائية كثيرة مع أختلاف الطبقات والمستوى الأجتماعى والثقافى وكلهم تدور حياتهم حول الرجل والجنس

فمنهم المرأة التى كبر سنها بدون زواج وعندما عرض أحدهم عليها الزواج وأملاها كل شروطه سألته سؤال محدد وهو ماذا سوف يعطيها مقابل موافقتها على كل هذه الشروط ليكون رده أنه سوف يكون زوجها وعندما طلبت توضيح لمعنى الكلمة كان أن المقابل سوف يكون العلاقة الجسدية بينهم !!! لتقابل طلبة بالرفض وبعدها عزلت نفسها عن الحياة وعاشت فى مصحة نفسية

وغيرها وغيرها من النماذج التى عرضها الفيلم والتى توضح وجهه نظر الرجل للمرأة على أنها أداة للمتعة فقط ووجهه نظر المرأة لنفسها ولحياتها على أنها حياة ناقصة ومشوهة بدون الرجل والجنس

فهل هذه هى كل مشاكل المرأة ؟؟

فنحن أمام نماذج مشوهة للرجل والمرأة معا

الرجل الذى لا يفكر فى شىء الا متعتة فقط بغض النظر عن كيفية حصوله عليها

والمرأة التى تسمح لنفسها أن تكون هذه الأداة وموافقتها على هذا ورؤيتها لحياتها على أنها ناقصة ومرعبة بدون الرجل والعلاقة بينهم كأن المرأة حيوان يجرى وراء شهواتة ليس أكثر ولا يوجد شىء يمنعها من الجرى ورائها مثل الحيوانات

فهذه النماذج شوهت شكل المرأة والرجل وأظهرتهم فى مظهر الحيوانات التى لا يهمها شىء فى الحياة الا غرائزها وشهواتها والحقيقة مختلفة تماما عن كل هذا وللأسف هذه الأفكار أحيانا تدخل فى عقول الشباب والبنات ويتخيلون أن الحياة ليست الا علاقة بينهم وبين الطرف الآخر لنصل الى مشكلة آخرى يقابلها كل الشباب والبنات فى مجتمعاتنا

فكنت أتمنى أن يعرض الفيلم مشاكل المرأة كلها ومن ضمنهم مشاكل العلاقة الجسدية بينها وبين الرجل ومتطلبات كل طرف منهم وكيفية معالجة هذه المشاكل بشكل موضوعى وصحيح

ولكن لا حياة لمن تنادى

بقلم بسمه عبدالباسط