لا أريدك أنانى

bos bos

الأنانية الصفة اللى محدش بيحبها أبدا واللى للأسف موجودة فى ناس كتيرة سواء كانوا ستات أو رجالة ولكن اللى هتكلم عنه حالا هو الرجل الأنانى
الرجل الأنانى بيكون أى علاقة لية أو أى معاملة معاه بتغلب عليها صفة الأنانية بدرجة كبيرة ولكن أى معاملة أو أى علاقة ممكن تعدى الا علاقة الراجل بزوجته
الزوج الأنانى اللى بيحب كل حاجة تكون ليه وما بيحبش أى حد الا نفسه فعلا العيشة معاه بتكون مستحيلة
ولكن ساعات بنات كتيرة ما بتعرفش الصفة دى وما بتكتشفهاش الا بعد الزواج ولكن للأسف هو لو فكر شوية وأدى كل واحد حقة زى ما هو بياخد كل حقوقه هتكون الحياه حلوة قوى
الزوج الأنانى أول حاجة تلاقية أختار زوجة مفيش زيها يعنى زى ما بيقولوا مال وجمال وحسب ونسب وكل الصفات اللى أحنا نعرفها دى وممكن نلاقية أختار واحدة كمان بتشتغل شغلانة محترمة جدا وناجحة فيها لدرجة كبيرة ولكن أول ما يتجوزوا يظهر على حقيقتة ويحب دايما يكون هو فى الصورة وعلشان كده كتير بيطلب من مراته تسيب شغلها وتقعد فى البيت وكمان بيكون عايزها تعمل له كل حاجة وتحاول تسعده بكل الطرق الممكنة وبياخد فعلا كل حقوقه كاملة ولكن للأسف ما بيديش أى حد حقه لا بيدى مراته حقها ولا بيدى ولاده كمان حقهم وتلاقيه بيبرر ده مثلا بأنه مشغول أو بأنه مش عارف يعبر عن اللى جواه أو بأى شىء تانى
لكل رجل لازم قبل ما تفكر فى حقوقك تعرف أيه هى واجباتك الأول تجاه زوجتك وأبناءك وبلاش تكون أنانى وتفكر فى نفسك وأسعادها بس لأنك فى النهاية مش هتلاقى حد جمبك وكل الناس هتسيبك وأولهم مراتك وولادك اللى أنت خدت منهم كل حاجة وما أديتش ليهم أى حاجة
وكل البنات والستات عموما بتكره الرجل الأنانى
لا نريد رجل أنانى فالحياه بدونك أسهل وأحسن بمراحل من وجودك فيها