مطلقات لكن شرفاء

طبعا كلنا عارفين أن كلمة مطلقة فى مجتمعنا أو فى أى مجتمع شرقى الناس بتبص لها أزاى وبيبقى محكوم عليها وعلى حياتها وآحلامها بالأعدام وأكيد مش كل الناس كده ولكن الأغلب بيتعاملوا معاها كأنها جرثومة أو فيروس أو تمثال مش بنى أدم من لحم ودم ومن حقه يعيش ويكمل حياته

وتعالوا كده نشوف بيحصل إيه

من بداية المشاكل اللى بتحصل بينها وبين جوزها والكل بيطلب منها حتى لو ماكانتش غلطانة ومفيش فيها أى عيب أو شىء يسبب المشاكل وأن المشاكل بسبب الزوج نلاقى الكل بيطلب منها بأنها تستحمل وتفضل متجوزة حتى لو هتعيش فى بؤس ومشاكل طول عمرها وكل ده علشان ما تبقاش مطلقة وأزاى تتطلق وأزاى ترجع بيت أهلها من تانى وأزاى هتعيش بعد كده ومليون حاجة بتتقال لها علشان تتراجع وتفضل عايشة فى ذل ومهانة لا حصر لها

وبعد ما خلاص بقت طالق تبدأ المشاكل تزيد من أول نظرة الناس وكلامهم واللى دايما بيطلعوا الست هيا اللى غلطانة وأنها السبب فى الطلاق وأنها لو كانت كويسة ما كانتش أتطلقت وفجأة تلاقى نفسها بقت محرومة من حاجات كتيرة وممكن جدا أهلها يكون ليهم دور كبير فى ده بأنهم بيمنعوها من الخروج والظهور قدام الناس كأنها عملت جريمة وتتقيد حريتها أكتر وأكتر ولو كان الأهل متفهمين لظروفها وبأنها أنسانة طبيعية زى أى حد مش هتترحم من كلام ونظرات الناس فى الشغل فى الشارع فى النادى فى أى مكان وكل مكان

وأكيد هيكون محكوم عليها تفضل كده من غير جواز باقى عمرها وده لية بقى لأن كل الناس شايفة أنه ما ينفعش واحد ما سبقش له الجواز يتجوز واحدة مطلقة حتى لو ماكانش عندها أطفال وده طبقا للتفكير الشرقى ولأن المجتمع عنده عقدة من الناحية دى فأزاى واحد ما سبقش له الجواز يتجوز واحدة مش بنت وحتى لو سبق له الجواز برضة كل الناس بتديله مليون حق يرتبط بواحدة ما سبقش ليها الجواز أصله راجل وبراحته عادى يتجوز مليون مرة ولازم اللى يتجوزها تكون بنت عذراء بمعنى أصح زى ما بيتقال

ودى طبعا عقدة كل الرجالة على أعتبار أن المطلقة واللى فقدت عذريتها وبطريقة شرعية بقت جرثومة ومالهاش حق فى أى حاجة

ولأن كل اللى بيتقال لأى واحد أنت لازم تتجوز واحدة محدش لمسها واحدة محدش جه ناحيتها غيرك

ومش قادرة أفهم لحد دلوقتى هيا المطلقة دى مش أنثى برضة واللى كان فى حياتها ده مش جوزها وكان اللى بينهم حلال وشرعى يبقى إيه المشكلة والعقدة عند الناس مش فاهمة

وياريت محدش يقولى أنتى جاية على المجتمع والرجالة وبتظلميهم لأنى فعلا ما بظلمش حد وعندى أمثلة كتيرة هعرضها ليكم من حياتنا الواقعية

هو أحنا بنرجع لورا ولا بنمشى لقدام مش عارفة لية كل مدى بحس أن تفكير الناس فى الحاجات دى بالذات بيرجع للعصر الحجرى ونفسى أعرف لية المطلقة مش من حقها تعيش حياه طبيعية بعيدة عن كلام الناس ونظراتهم

قصة حقيقة لصديقة ليا مطلقة واللى أعرفه أن المشاكل كانت من طليقها وبأنها أكتشفت أنه مش كويس بعد الجواز وحاجات تانية كتيرة مفيش داعى لذكرها وفى النهاية وصلت للطلاق

صديقتى دى مش قادرة تعيش حياتها طبيعية هيا أيوة بتشتغل وناجحة جدا فى عملها وبتشتغل فى مركز مرموق جدا ولكن حياتها الخاصة ضايعة جدا بسبب معاملة المجتمع وعدم فهمه بأن مطلقة دى مش عيب ولا حاجة غلط ومن ساعة طلاقها وأتعرضت لتجربتين جواز وفى المرتين كانت المشكلة أنها مطلقة وأن أسرة العريس وأسرتها مش قادرين يتفاهموا ولا يتفهموا الموقف وبالتالى ما تمتش ولا جوازة منهم فى حين أن طليقها أتجوز مرة تانية بنفس طريقة الخداع وطلق مراته التانية وفى طريقة للجواز من الثالثة وكلهم ماكانش سبق ليهم الجواز قبل كده

شفتوا مجتمعنا عامل أزاى يعنى الراجل يتجوز مليون مرة وعادى وبرافو عليه ومفيش مشكلة والست تفضل طول عمرها محرومة من الجواز وبأنها تعيش حياة طبيعية

قصة تانية لواحدة تربطنى بيها صلة قرابة بعيدة شوية ولكنى أعرفها والبنت دى أصغر منى بحوالى سنتين وأتجوزت وبعد الجواز نفس قصة المشاكل ووصلت للطلاق

قريبتى دى كانت مليانة نشاط وحيوية وعلى طول بتضحك وتهزر وأبتسامتها كانت على طول على وشها وعنيها كانت بتنطق من السعادة وحبها للناس والحياه شاء القدر أنها تتطلق وما شفتهاش الا بعد طلاقها بفترة طويلة جداااااااااااااااا ولكن حسيت أنى شفت واحدة تانية خالص واحدة مكسورة ومجروحة بشكل بشع واحدة صوتها ما بقاش بيطلع ما بقتش بتضحك من جواها مكسورة وموجوعة ومحدش حاسس بيها وكتير بتحاول ترسم بسمه على وشها ولكن الأسى والحزن واضحين قوى وعنيها دايما مليانة مليون دمعة ومليون سؤال للناس والمجتمع لية بتعاقبونا على حق ربنا أداه لينا حق شرعى لكل الناس ولكنكم بتحللوه للرجالة وتحرموه وتعتبروه جريمة على الستات

أنا مش عارفة أقول إيه تانى غير أننا فى مجتمع ظالم وقاسى بيحلل ويحرم بمزاجه

وهفضل أنادى بيها المطلقة أنسانة شريفة بلاش تعاملوها بأنها عكس كده علشان فيه واحد كان فى حياتها ولأنه كان جوزها مش واحد تعرفه من ورا الناس

المطلقة من حقها تعيش حياتها طبيعية وتخرج وتروح وتيجى وتشتغل وتتجوز من تانى بلاش تحرموا حاجات ربنا حللها لينا

وأرحموا المطلقات من نظرتكم دى وأعتقد لو كل واحد حط أخته ولا بنته فى الموقف ده لا يمكن هيقبل بكم المعاناه اللى بيشوفوه طول حياتهم

وعلشان كده أنا بضم صوتى لصوت ملايين المطلقات اللى المجتمع والناس بيعاقبوهم على جريمة مش هما السبب فيها

بقلم بسمه عبدالباسط

http://www.wostelbalad.com/index.php?option=com_content&view=article&id=576:2009-12-16-21-15-34&catid=46:2009-03-19-20-34-04&Itemid=73