الجواز مسئولية مين ؟

أنا عايز أتجوز ؟

أنا عايزة أتجوز ؟

كلام كلنا بنسمعه أو كنا بنسمعه قبل ما البنات والولاد يدخلوا فى مرحلة الأضراب الجماعى عن الجواز

ولكن هل حد فينا فكر فى هل هو أو هيا قد المسئولية وهيقدر يتحمل الحياة بكل مشاكلها ومسئولياتها ؟

هل كل أسرة حاولت تربى فى ولادها شعور تحمل المسئولية وبتبدأ من صغرهم تغرس جواهم مفهوم الأسرة المتكاملة والمسئولية تجاه البيت وأنهم فى يوم من الأيام هيعملوا أسر وهيبقوا مسئولين عنهم ؟

هل فكرنا فى يوم من الأيام أننا عايزين نبنى أسرة ما تتهدمش أبدا ؟

ولا كل تفكيرنا بس فى حاجات سطحية ومالهاش لازمة وكل طرف بيبقى مخطط أنه هيرمى مسئولية البيت من أولها لأخرها حتى الأولاد وكل شىء على الطرف التانى

أكيد هتكون الأجابة عند معظمنا مفهوم أسرة إيه ومسئولية إيه دى أنا عايز أتجوز أو عايزة أتجوز وخلاص

هو أنا هدور على عروسة ولا عن رئيس جمهورية

ولا أنا هدور على عريس ولا هفكر فى الكلام اللى مش جايب همه ده مش لما الاقى عريس الأول

الخ من الكلام اللى ممكن تسمعه من بنات وشباب وكتير قوى

واللى منهم لما بيفكر يتجوز ما بيفكرش فى شىء غير فى أنه عايز يتجوز وخلاص ولكنه ما بيفكرش فى بعد كده ولا بيخطط لبعد كده

طيب هو العيب فى مين فى البنات والولاد ولا فى الأهل من البداية اللى ما ربوش جواهم مفهوم الأسرة والمسئولية

وهو لسة فيه حد أصلا بيفكر فى الكلام ده وفى أنه لما بيدور على نصه التانى مش بس بيدور على جوازة والسلام ده بيدور على حد يكون معاه أسرة وعيلة ليها هدف محدد مش بس جواز علشان تكملة الشكل الأجتماعى والأنضمام الى ملايين الناس المتجوزة وبتخلف وخلاص وبعدها ترمى ولادها ولا تعرف عنهم حاجة

لو بصينا بصة سريعة على حالات الطلاق المبكرة واللى ما بيعديش على الجواز شهور أو سنه أو أتنين هنلاقى أن حالات كتيرة منهم قوى سببها أن الجواز ماكانش مبنى على أسس من البداية وأن كل طرف ما دورش على طرف يكمل معاه الحياة ويتحمل ويعانى معاه ويكافح علشان يبنوا نفسهم ويبنوا أسرة ما تنهدش أبدا

ولكن للأسف محدش بيفكر كده كل واحدة أهلها عايزين يجوزوها علشان يخلصوا منها أو ممكن تكون هيا عايزة تتجوز علشان كلام الناس والمجتمع والتخلص من العنوسة

وهو عايز يتجوز لمجرد الجواز وخلاص ومش فارقة معاه أى حاجة

ولأنهم من الأول محدش فيهم فكر هل ده هينفع يبقى أب كويس لولادى وقدوة ليهم وهيقدر يبنى معايا أسرة كويسة

وهل الأنسانة دى هتبقى فعلا أحسن أم لأولادى وأعظم زوجة تقف معايا ونكافح مع بعض ونكمل حياتنا سوا لآخر يوم فى عمرنا وينتج عن ترابطنا ولاد يكملوا المسيرة من بعدنا

محدش فكر أن الجواز ده لازم يكون مودة ورحمة مش خناق ومشاكل ومظاهر فارغة

محدش فكر أن الجواز ده توافق وقبول من البداية ولو ماكانوش موجودين يبقى بلاش الجواز دة لأنه هيفشل

محدش فكر أن عايز أنسانة تبقى كل حاجة له فى الدنيا

محدش بيفكر فى أى حاجة لأننا ما أتربيناش على كده ولا لاقينا حد يكبر الفكرة دى جوانا وملايين الأسر المفككة بينتج عنها بنات وشباب تفكيرهم مش سوى وبعد كده لما بيتجوزوا بيعملوا أسر مش سوية ومفككة ويفضل الموضوع مستمر وممتد الى ما لانهاية

ولكن لازم يبدأ الحل مننا ما هو مش هنفضل طول عمرنا نقول أهلنا السبب وبغض النظر خلاص أحنا عرفنا المشكلة وفى إيدينا الحل لية ما نبدأش بنفسنا وكل واحد يفكر فى الجواز بطريقة مختلفة وبأنه فعلا عايز يبنى أسرة يكون ليها هدف فى الحياة ، أسرة مترابطة ما تتهدمش مهما حصل ويكون ليها أمتداد ، أسرة بينها مودة وحب وأخلاص وصداقة وكل الحاجات اللى نفسنا تبقى موجودة

البداية مننا ولأن النهاية هتكون بسبب البداية وأحنا اللى هنحدد النهاية هيكون شكلها إيه

بقلم بسمه عبدالباسط