عفوا دة مش زمن الرقة والبسكوت

دايما متعودين أن البنت لازم تبقى رقيقة وبسكوتة وكتير من الصفات اللى الكل بيحبها فى أى بنت ومفيش واحدة ما تحبش تبقى رقيقة

ولكن المشكلة الأيام دى أن الزمن أتغير والناس كمان أتغيرت وبقى الوحشين أكتر من الكويسين والغدر والخداع والمشاكل الكتيرة اللى بقت مالية الدنيا بتمثل خطر كبير على نفسية الناس وخاصة الناس الحساسة والرقيقة

وخاصة لما يصاحب الأنسانة الرقيقة الحساسة دى معاملة خاصة من أهلها ومحاولة التقفيل عليها قوى ومنعها من الأختلاط الزيادة والمجتمع والمشاكل

وفجأة تطلع البنت للدنيا تلاقى نفسها فى وش المدفع لوحدها أهلها اللى كانوا معاها فى كل حاجة فى حياتها وواقفين جمبها فى كل مشاكل وهموم الدنيا ودايما بيتصدروا ليها ما بقوش موجودين وعليها أنها تواجه كل حاجة لوحدها وتعديها

وطبعا بتكون النتيجة أنها تتكسر من أول ضربة وأول مشكلة وبتبقى ضعيفة قوى فى مواجهة أى حاجة

على سبيل المثال لما يكون عندك قطة مربيها من صغرها وعمرها ما خرجت من البيت بتاكل وتشرب وتنام جوه البيت وكل شىء متوفر لها وبعد ما كبرت قمت فجأة مطلعها فى وسط قطط الشوارع وسبتها لوحدها ومشيت

تخيل هيحصل لها إيه ؟؟

هو ده بالظبط زى ما تبقى عايش مع واحدة ومقفل عليها قوى وبتحاول ما تعرضهاش لأى شىء حتى لما بتتعرض لأى ظروف أو مشاكل بتلاقى حد واقف معاها وفى ضهرها وفى وشها كمان واقف ولكن بعد 20 أو 22 سنه بيبقى مطلوب منها أنها تطلع للدنيا لوحدها وتواجه كل شىء ومهما عدى عليها لازم تعدية وتكون قوية

وده بيكون نتيجتة أنها بتتكسر بسرعة وبتاخد وقت لحد ما تقدر تعدى وتفوت أى مشكلة لأن مناعتها بتكون أقل من اللى الدنيا شالتها وحطت فيها

ويمكن الضربة اللى ما بتموتش بتقوى بس المشكلة أنها لازم تاخد ضربات كتيرة قوى وتتكسر لحد ما تبقى فعلا قوية وقد الدنيا ومشاكلها

أكيد مفيش مانع من أن البنت تكون رقيقة ولكن رقة عن رقة بتفرق

رقيقة ولكنها شافت وأتعلمت وأختلطت بالناس والدنيا وبقيت قوية أحسن من رقيقة وكل حاجة تكسرهها وتجرحها

علشان كده ما تقفلوش على بناتكم قوى خلوهم يشوفوا ويتعلموا ويجربوا من غير طبعا ما يتعدوا أى حدود أو عادات أو أخلاق ولكن بلاش القفلة الجامدة اللى تخليهم زى القشة أى شوية هوا يطيروها

وبلاش تخلوها هشة لينة وبتتكسر بسرعة

بقلم بسمه عبدالباسط