هل عندك شك

لية دايما البنت بتكون محل شك من كل اللى حواليها سواء أم أو أب أو أخ أو زوج أو أبن أو أى حد موجود حوالين البنت أو الست
لية دايما كل أفعال وتصرفات البنت مراقبة ومحل شك من كل الناس كأنها كائن مخطىء دايما ومن السهل أنه يغلط وأنها ماعندهاش عقل تميز الصح من الغلط ولا تقدر تفرق بين الحلال والحرام

لية دايما الولد عنده كل الصلاحيات لكل حاجة ودايما الأهل وكل الناس بتثق فيه على عكس البنت اللى شوية وهيعلقوا لها رادار يراقب تصرفاتها
الولد أنسان والبنت أنسانة والأتنين من الممكن أنهم يغلطوا ويعملوا حاجات كتيرة غلط وحرام والأتنين عندهم نفس العقل وعندهم الحياة والآحلام والطموح

يبقى لية ندى لطرف كل حاجة وناخده من الطرف التانى

لية ندى للولد الثقة العمياء زى ما بيقولوا ونشك فى البنت دايما

مع أن عدم الثقة سواء كان للبنت أو للولد ممكن يدفعهم لعمل حاجات كتيرة غلط وممكن يكونوا كويسين جدا ومش بيغلطوا وأخلاقهم عالية جدا ولكن لعدم الثقة فيهم وغضبهم من الموضوع ده فنلاقيهم بيعملوا حاجات غلط كنوع من أنواع أسترداد حقهم الضايع

يعنى أحنا بندفع البنت لفعل الخطأ بمزاجنا وبأرادتنا

وللأسف الحرية والخصوصية كلمات مازالت بتتفهم غلط لما تنطقها أى واحدة ويمكن ده بسبب تعدى بعض من البنات على الأخلاق والعادات والتقاليد بقولها أنا حرة ومحدش له دعوة

ولكن ما ينفعش ناخد كل البنات بذنب فئة مش مسئولة

حالة كبت الحريات وحرمان البنت من كل حاجة وأى حاجة لأنها بنت للأسف لسة منتشرة

وحالة الغاء الخصوصية للبنت برضة منتشرة

يعنى كتير ما يبقاش مسموح للبنت أنها تتكلم فى التليفون وباب الأوضة مقفول عليها كأنها لو أتقفل عليها باب الأوضة لازم هتعمل حاجة غلط أو هتستعمل التليفون فى شىء مش كويس

حاجات البنت زى الورق بتاعها ، كتبها أى شىء خاص بيها من حق الكل يلعب ويفتش فيه ولما تحاول تعترض وتقول أن المفروض محدش يفتش فى حاجتها بيكون الرد أنها بنت ولازم أهلها يعرفوا عنها كل حاجة

بس مش هيا دى الطريقة الصح أساسا فى معرفة كل شىء عن بنتك

لأن لو أى أسرة صديقة لولادها كانت هتبقى عارفة كل كبيرة وصغيرة فى حياتهم من غير ما يفتشوا ومن غير ما تحس البنت أنها قاعدة فى جهاز مخابرات وكل حركة ليها مراقبة

ولكن المشكلة واللى بيضايق أى بنت لما تلاقى أن مالهاش الحق فى أى خصوصية مع أن ممكن يكون ليها أخ ومحدش بيقرب ناحيته وده بيخلق جواها آلم نفسى من التفرقة فى المعاملة

مع أن المفروض الأهل ما يفرقوش فى المعاملة وده لأنهم بيخافوا على الأتنين يبقى ليه كل شىء عندها مباح أى حد يشوفه بحجة أنهم أهلها وخايفين عليها ولازم يعرفوا كل حاجة عنها

وما بيحصلش ده مع أى ولد

بالأضافة الى منع البنت من حاجات كتيرة وكتير بتبقى الحاجات دى صح مش غلط وبتبقى حريتها متقيدة بسبب أنها بنت وبسبب كلام الناس ونظراتهم

لية حرية البنت مازالت بتثير جدل واسع وكبير أول ما حد يتكلم فيها

البنت كائن له عقل زيها زى الولد وأكيد هتقدر تفرق بين الصح والغلط ده حتى الحلال والحرام المفروض أنه حلال وحرام عليهم الأتنين

ولكن المجتمع مازال بيحلل كل حاجة للولد ويحرمها على البنت

وتلاقى أى بنت قدامها قايمة ممنوع ولا وبلاش

والولد قدامه قايمة أعمل اللى يريحك مع أنه ممكن يكون بيستغل الموضوع ده غلط

وتكون هيا ما بتعملش حاجة غلط

مفيش أى مانع أن الأهل يتابعوا بناتهم ويعرفوا عنهم كل حاجة ولكن مش بالعافية والقهر والكبت ليهم ولازم يبقى فيه مساحة للخصوصية علشان الخنقة الزيادة ممكن تؤدى لمشاكل كبيرة بعد كده

زى الجملة اللى أتقالت فى مسرحية سك على بناتك وكانت الخلاصة فعلا وهيا سك على بناتك بس إيديهم المفتاح

بقلم بسمه عبدالباسط