استنونا الأسبوع الجاى

اعذرونا مش هنقدر ننزل موضوع الأسبوع ده لظروف خارجة عن أرادتنا ونوعدكم بموضوع جديد الأسبوع الجاى إن شاء الله

استنونا وتابعونا وشوفوا مواضيعنا اللى فاتت وناقشونا فيها وابعتوا لنا كل أقتراحاتكم وملاحظاتكم وافكاركم

وأى حد عايز يشاركنا يبعت لنا والمشاركة مش للبنات والستات بس لا دى كمان للشباب والرجالة ولكل الناس أى فكرة أو موضوع تحبوا تشاركونا بيها ابعتوا لنا

مملكة المرأة

Smasem

احيانا لا تريد المرأه ان يشاركها احد فى ادارة

المطبخ لانها تعتبره مملكه خاصه بها
ولكن حينما نفتح التلفاز نجد ان الشيفات معظمها رجال
فهل هذا يتعارض مع طبيعه المرأه أو طبيعه الرجل
هل لان المطبخ ملك لها.. ولماذا لا نجد الشيفات تساعد زوجاتهم في أعمال المطبخ أم انه يستكبر ان يدخل معها؟ ام ان هناك اسباب اخرى ؟
ولماذا ترفض المرآه وجود شخص اخر معها في المطبخ؟
كل هذه تساؤلات نناقشها سويا
ربما بعض النساء على حق في انها تمنع زوجها في الدخول معها ربما لانها لا تريد ان تكدس المكان حيث انها تريد ان تعمل في مكان واسع وربما ايضا انها الوحيده التي تعرف أماكن أدواتها لانها هي التي تستخدمها دوما وايضا ربما الوقت الذي سيساعدها فيه زوجها ستسغرق اكثر منه في تنظيف ما فعله الزوج وهذا اكيد سيرهقها كثيرا
لكن ليس كل السيدات يفضلن عدم دخول أحد معهم .. هناك البعض يسعدن بوجود أزواجهن ويسعدن بمشاركتهم لهم بالمطبخ .. تشعر بسعاده لانها تشعر انه يشاركها كل شيئ بحياتها حتى المطبخ التي تعتبره هي مملكه خاصه بها
وهناك من لا تفرق معهن ان يدخل زوجها المطبخ او لا يدخل فوجود شخص او عدم وجوده لا يؤثر عليهن بشيئ
فماذا عنك سيدتي ؟؟ وماذا عنك سيدي ؟؟
هل تريدي ان يشاركك أحد في عالمك الخاص بك ؟؟
وهل تقبل انت ان تشارك زوجتك بالمطبخ ام ستتكبر وتقول انه خاص بها وليس من شأني انا فعل ذلك ؟ اما بالنسبه لي : لا يزعجني وجود شخص ما معي ولكن بشرط الا اجد الجميع معي واجد المكان متكدسا بالبشر فانا لا امانع ان شخصا يشاركني فيما افعل لكن بوجود نظام ولكن اذا كان سيتكدس المكان افضل ان ابقى وحدي

-----------------------------

همسات ساكنه

عن نفسي افضل ان اعمل بمفردي فانا لا احب ان يشاركني احد وخاصه رجل ولكن في حاله وجود عزومه او كده ممكن يساعدني حد عشان اقدر انجز برضه بس احب ان اللي تشاركني اختي او ماما مثلا لكن في المستقبل ان شاء الله مش حخلي زوجي يساعدني في المطبخ مش لاني حستغرق وقت في التنظيف او كده لا لان اعتقد المطبخ عمل خاص بالمراه وايام شغله مثلا اكيد حيكون راجع مرهق ومحتاج ان يلاقي كل حاجه جاهزه وانا بفضل ان عمل المراه للمراه وعمل الرجل للرجل

------------------------------------

Bos bos

اولا هو فيه حاجة لازم نوضحها هومين اللى قال ان الراجل بيوافق اصلا يدخل المطبخ ويعمل حاجة أنتوا بتتكلموا على أساس أنه ماعندوش مانع وبيعرض مساعدته وكل واحدة بتقول رأيها
بغض النظر عن أن ده شغل الست ولا الراجل بس المفروض نتكلم على اللى بيحصل فى الواقع
اولا مفيش راجل بيحب دخول المطبخ او عمل شىء فيه سواء كان راضى بكده ولا لا
ثانيا الرجالة برضة ما بتتقنش شغل المطبخ كويس
ثالثا لو كان الواحد اضطرته الظروف انه يعيش لوحده فترة ممكن بيحاول يدخل المطبخ ويعمل كل حاجة لنفسه ولكن فى بيت اهله بيستنى لما والدته او اخته او اى حد يعمل له كل حاجة
رابعا المطبخ عمل المرآة اولا واخيرا ومش معنى كلامنا ده اننا بنطلب من الراجل يطبخ ويغسل اطباق والحاجات دى لكن على الاقل ممكن يعمل لنفسه كوباية شاى ويعمل لزوجته معاه وبتكون لفته جميلة منه او حتى وهيا بتعمل يقف معاها يتكلموا فى اى حاجة بجد ده بيسيب أثر جميل فى نفس الزوجة وكمان مفيش مانع لو بعد ما شربوا الشاى او اى حاجة يشيل هو الكوبيات ومرة من نفسها يغسلها
وممكن برضة بعد الاكل يشيل معاها مثلا الاطباق ومش هقول يغسلها لان ده صعب ولانه كمان شغل الستات ماشى ولكن لو حصل وكانت مراتك تعبانة وعملت الغدا وهيا مش قادرة ايه المانع انك تغسل الأطباق او تساعدها بأى شىء فى المطبخ
خامسا فى النهاية أحنا عارفين أن المطبخ شغل الست مش الراجل ومش بنطلب من الراجل يعمله هو بدلها ولكن مجرد وقوفك معاها مرة وهيا بتطبخ أو بتعمل حاجة مع كلمتين حلوين حتى لو مش هتساعدها صدقنى هتجيب أثر حلو قوى
ومرة كده كل مده ساعدها فى شيل الأطباق وحطها كده يعنى مش هيحصل ليك حاجة والله

ومفيش مانع لو ساعدها بأى طريقة ودخل المطبخ وعمل حاجة أيه المانع بس

--------------------------------------

قلوب حائرة

بصوا ياجماعة مش الموضوع موضوع أنه يدخل معاها المطبخ ويطبخ ده طبعا شي عادي وجائز جدا بس الاهم انها تحس بمشاركته ليها واهتمامه

أنا شايفة أنه الموضوع المهم أننا ننشر ثقافة مساعدة الرجل لزوجته ولو حتى في شيل الاطباق بعد الاكل او انه حتى يعمل الشاي على ماهي تنظف السفرة او تغسل الاطباق بعد الاكل مجرد أنه بيشعرها انه بيخاف عليها وبيوفر صحتها ده كفيل بانه يشعرها بانها ملكة متوجة

في نقطة كمان الامر ده محتاج تعود منذ الصغر يعني الام لازم تعود ابنها منذ الصغر أنه يساعد اخته في البيت وتفهمه ان ده عمره ما هينقص ابدا من رجولته لما يطلع على كده اكيد هيبقى نفس الوضع مع زوجته لكن لما من صغره الام تحسسه ان شغل البيت مهنة خاصة بس بالبنت دي مصيبة ومصيبة كبيرة قوي لانه بجد هيبقى متجوز شغالة الجواز شركة في كل شيء في شغل المنزل في تربية الابناء حتى في المصاريف

وعلى فكرة يا شباب عمل المراة في بيت جوزها تفضل منها مش واجب للعلم يعني ليكون اخوانا الرجالة فاكرين اننا اتخلقنا لكده لا احنا اتخلقنا لتربية الابناء وبناء جيل قوي
, وانتوا طبعا مش محتاجين افكركم بحديث رسولكم الكريم الي بيقول " خيركم خيركم لاهله وانا خيركم لأهلي " وانه خير الانام كان بيحلب الشاه ويخيط نعله

علشان كده انا بوافق وبوافق بشدة علي مشاركة الرجل للمراة في بيتها لعدة نقاط مشاركة نفسية منه لها ، ورغبة منه في وجودها في احسن حال الامر الذي ينعكس عليها والا لما هي تكون زي النحلة طول النهار ابقى تعالى قولي الوقت الي هتكلمها فيه هيكون امتى ، وده طبعا هينعكس على احترام الابناء لوالدتهم لما يشوفوا قدوتهم بيخاف عليها وبيحافظ على راحتها

كلمة لا تكلفك شيئا

قلوب حائرة

شكرا ، " تسلم أيدك " ، " ربنا يخليكي لينا " ، دي كلها كلمات بتعبر عن تقديرنا للحاجات الي حد بيقدمها لينا كلمات صغيرة بس ليها مفعول السحر لاتكلف عزيزي أدم اي شيء ولكن يكون لها مفعول تجعل من تقال له قادر على التضحية بالمزيد دائما حتى لو على حساب ذاته.

أن هذه الكلمات تعبر عن تقديرنا للاخرين ، وشعورنا بمدى الجهد الذي قاموا بيه من أجلنا ، الأمر الذي يحفزهم على تقديم المزيد ، فاذا كانت القاعدة العامة " أنه من لايشكر الناس لايشكر الله " ، وتطبق هذه القاعدة في الحياة بصفة عامة ، فماذا اذا ما طبقت مع من تربطهم بينا علاقة حميمية" الاخت ، الزوجة ، الام " ، بتهيلي دول اولى بالمعروف على اعتبار انهم الاقربون.

كثير من الرجال بيفتكر انه لما يقول كلمة شكر ده بيقلل من رجولته ويبقى كده بيتنازل كتير ، وان ده بيخلي الراجل الي جوه بيضعف ابدا انه من طبع الاصيل والكريم ان يعطي كل زي حق حقه ، واحنا برضه مش غايب عن ذهننا أن الرسول الكريم مكنش في فرصة بيسال فيها عن مين اقرب الناس اليه الا وكان بيذكر اسم زوجته السيدة عائشة .
عاوزين ننشر ثقافة تقديم الشكر لاهله فيما بنا ، عاوزين نعود السنتنا على كلمة شكرا ، سواء كنت زوج او اخ او اب خلي كلمة شكرا على طول ملازمة ليك ، متحسسش الي معاك ان الي بتقوم بيه فرض عين عليها ، وانه ان ال بتعمله ده واجب متستهلش عليه كلمة شكر ، لان ده بيبقي شعور صعب قوي لما يحس الانسان ان الي بيعمل فرض عليه وهو كده وخلاص ، جرب انت تعمل شغل ومحدش يقولك تسلم ايدك او متلاقيش تقدير ، جرب تعمل حاجة معاها في البيت ومتسمعش منها كلمة شكرا شوف هتحس بايه ، هخلي الشكر لاهله ولغير اهله دايما مبدئك في حياتك ومع اقرب الناس وهتلاقي نتيجة هتعود عليك بفايدة كبيرة جرب وقولي على راي وردة

----------------------

bos bos


عندك حق لازم ننشر ثقافة الشكر بينا وبين كل الناس
كلمة شكرا فعلا ليها مفعول السحر بس قبل ما نطلب من الراجل سواء كان أخ أو زوج أو ابن لازم نطلب من الستات نفسهم الحكاية دى لأنها هيا الأساس
يعنى معلش برضة أحنا كتير فى بيوتنا بنلاقى البنت بتساعد أمها فى حاجات كتير ولكن للأسف كتير قوى محدش بيقول لها أى كلمة كويسة بداية من الأم وأعتقد لو الأم عملت كده ولادها الشباب هيتربوا على كده ويتعودوا على الحكاية دى
لكن للأسف الموضوع بيبدأ من بيوتنا من الستات اللى بتربى الولاد على أنهم الآمر الناهى والمتحكم فى كل شىء
وإن البنت لازم تخدمه أيا كانت علاقة الولد ده بيها يعنى أخ او أزوج او أبن أو حتى زميل فى العمل
يعنى لو بدأنا من الأساس من الستات ولو هما عملوا كده مع بعض ومع بناتهم وعلموا ولادهم أنهم يشكروا أخواتهم البنات على أى حاجة أعتقد العادة دى هتكبر معاهم لحد ما يتجوزوا وهيعملوا كده مع زوجاتهم وبناتهم وهكذا
المشكلة مقسومة بين الطرفين الراجل والست ولازم فعلا نغير ثقافتنا دى

---------------------

Smasem

لا احد يستطيع أن ينكر فضل كلمه شكرا فهى رغم انها كلمه بسيطه فى حروفها خفيفه فى نطقها الا انها تحمل بين طيات حروفها معانى ساميه للغايه , فحينما تقولها لشخص فانك تحسسه بمدى الجهد الذى بذله لكى يفرحك

وهى كلمه يقولها الرجل للمرأه أو المرأه للرجل أو الرجل للرجل أو المرأه للمرأه , ولا تشترط أعمار أو جنسيات أو لون أو رتبه أو مركز أجتماعى
فهذه الكلمه البسيطه تحفز على العمل و تعمل على تقريب الطبقات من بعضها

ولا يجب لاحد أن يتصور أنها تقلل من قدره او انها تنزل منه
لا بالعكس فانها تزيد من قدره و تـُعلى من شأنه . و الشخص دائم الشكر لمن يقدم له خدمه عندما يطلب من شخص خدمات يكونوا ممتنين وراغبين لتقديمها له

وزى م قالت

Bos bos

ان لابد ان تهتم الام بتعليم أبناءها و بناتها بان دائما يقولوا كلمه شكرا لكن ننمى ثقافه الشكر بين الاجيال القادمه

و من هنا أقدم الشكر لكل شخص قدم لى خدمه
لكل شخص ساعدنى فى أى شئ
لكل شخص رسم ابتسامه على أى وجه
لكل شخص يستحق الشكر

-----------------------

سهر الليالى

" الكلمة الطيبة صدقه "
متهيألى أن دى الثقافه اللى احنا محتاجين نمشى عليها يعنى ميقتصرش الموضوع على الشكر بس لكن التعبير دايما عن اى حاجة جميلة بتوصلنا بكلمات جميلة
كلمات الامتنان الحب التقدير كلمات بسيطة مش هتحتاج لجهد بس صداها بيبقى كبير أوى فى نفوس الناس اللى بنقولهالهم سواء الأهل أو الأصدقاء أو الزوج الحبيب أو حتى الاولاد كلمات بتقرب كتير مسافات وبتزود الغلاوات وأحيانا بتأثر فى نفوسنا أحنا اللى بنقولها وبتهذب سلوكنا
كلمات مش مفروض نتكبر أننا نقولها حتى عشان منبقاش من اللى فى قلوبهم كبر - عافانا الله - يعنى لو حطينا النقطة دى فى دماغنا عمرنا ما هنخجل نقول الكلمات دى كتعبير عن اللى جوانا أو نحس أنها حتقلل مننا وزى ما قالت "قلوب حائرة" من لا يشكر الناس لا يشكر الله وفى الأخر ممكن أقول أننا حتى لو مقدرناش نقول الكلمات الطيبة دى فياريت على الأقل نستغنى عن كلمات التجريح ونعتبر أن دى الحاجة الطيبة اللى ممكن نعملها

-------------------------------

وفى النهاية بنشكر كل اللى وقفوا جمبنا وشجعونا ولسة لحد دلوقتى بيشجعونا

ومستنينكم بكل آرائكم ومشاركتكم وملاحظاتكم

انتي مطلقه!!!..اذن انتي لا تصلحين

بقلم همسات ساكنة

ونتابع سلسله الطلاق التي بدأناها الاسبوع الماضي
موضوعنا اليوم عن المطلقه
كما تحدثنا ان الطلاق أصبح يهدد الكثير ويدمر أسر كثيره جدا
وذكرنا أيضا انه ربما ان الخطا من المرآه وربما أيضا يكون من الرجل
فاذا كان الخطا ناتج عن احدهما ووقعت مشكله الطلاق فمعنى ذلك ان المطلقه اصبحت لا تصلح لتكوين اسره اخرى
فلنفرض ان المشكله ليست ناتجه عنها فما ذنبها
في مجتمعنا هذا الكثير يعتبرون المطلقه مجرد كائن يحيا بالمجتمع ليس من حقه ان يحيا حياه كريمه وان يتزوج مره أخرى
فلماذا كل ذلك .. ان المطلقه مثلها كمثل اي امراه اخرى فلمذا لا نعطيها حقوقها
الكثير من الرجال لا يفكرون في ان يتزوجوا امراه مطلقه وغالبا يلقون عليها سبب الطلاق وفي بعض الاحيان يعتبرونها مجرمه ويحق عليها العقاب
ربما اذا حدث العكس مع الرجل لا تفرق معه
بمعنى : اذا الرجل طلق زوجته فمن حقه ان يتزوج امرآه آخرى وعليه ان يختار من بين النساء او حتى البنات فلا تفرق معه
فيبقى السؤال لكل من يتابعونا
للبنات : اذا تقدم لكي رجل مطلق هل ستقبلين به عريسا؟؟
للرجال: هل تقبل ان تتزوج امراه مطلقه ؟؟
ملحوظه : نتحدث عن المطلقه وليست الارمله وياريت الاجابه تكون موضحه في حاله وجود الاطفال ستقبلون ام لا

وتبقى أجابتنا على السؤال :-0

-------------------------

همسات ساكنة

اذا تقدم لكى رجل مطلق هل ستقبلين به عريسا ؟؟

انا مقدرش اقول اه او لا

اولا لازم الشخص نفسه اعرف يمكن هو شخص كويس
بس في حاله وجود اطفال مش حقبل الا في حاله واحده ان مثلا اكون كبر سني
لكن غير كده اعتقد انه يمكن يفكر في زوجته الاولى عشان ولاده يبقى انا ايه موقفي دلوقتيلكن في حاله اذا كان مطلق من دون اطفال افكر في الامر الاول واشوف الشخص نفسه مناسب او لا

------------------------------

bos bos

كل كلامك صح يا همسات فعلا المطلقة الناس بتنظر ليها نظرة غريبة كأنها عملت ذنب وكمان على فكرة فيه رجال مطلقون الناس بتبص ليهم نفس النظرة

المشكلة أن دى ثقافة مجتمع بحاله بالنسبة للسؤال

اذا تقدم لكى رجل مطلق هل ستقبلين به عريسا ؟؟

وليه لا هو المطلق ده مش بنى آدم ولا أيه وبعدين لية أحكم عليه غلط لمجرد أنه مطلق لما أعرف ظروفه وأعرف كل حاجة ساعتها هقدر أحكم هو كويس ولا لا
ولكن ما ينفعش أحكم عليه بأنه مش كويس لمجرد أنه مطلق
وأعرف كمان فيه أولاد ولا لا لأنه ده ممكن يأثر على أختيارى
لانه لو فيه أولاد ممكن يكون فيه مشكلة بالنسبة ليا مش لأنى مش عايزة أربيهم أو أشيل المسئولية معاه لا طبعا
لكن وجود الأولاد ممكن يكون سبب فى رجوعة لزوجتة أم أولادة فليه أنا أقف فى طريقة وطريقها وليه أحط نفسى فى موقف أنه ممكن يرجع لها وأنا متجوزاه أعتقد الموقف هيكون صعب
وساعتها هو أكيد هيفضل يعيش مع أم أولاده سواء أنا فضلت معاه أو لا وطبعا أنا برفض أكون زوجه لزوج متزوج أتنين مرة واحدة لكن لو من غير أولاد أكيد الوضع هيختلف وهفكر طبعا وهعرف كل حاجة وساعتها هقرر

----------------------------------

Smasem

انا باحس دايما ان المجتمع بيبص للمرأه المطلقه و مش بيبص اوى للرجل المطلقو ان كان المجتمع بينظر للرجل المطلق ففى نظرى انها نظره اقل حده من نظره المجتمع للمرأه المطلقه

و بالنسبه للسؤال
اذا تقدم لكى رجل مطلق هل ستقبلين به عريسا ؟؟

اه اقبل و لكن بشروط
1 - انه يكون راجل كويس متدين يخاف الله
2- ان يكون علاقته بطليقته انتهت مادام لا يوجد ابناء
3- اذا كان الابناء يعيشون مع والدتهم فاكيد من حقه ان يراهم ولكن افضل فى عدم وجود الام
4- اذا كان الابناء يعيشون معاه فلايوجد ادنى مشكله ان يروا امهم و لكن ايضا فى عدم وجود الاب
( الرجل المطلق )

------------------------------------

محمد سعيد

هل تقبل ان تتزوج امراه مطلقه ؟؟

بصراحة انا عمري ما أفكر اني اتجوز واحدة مطلقة, لأني في سني الحالي و بادراكي الحالي مقدرش اتخيل فكرة ان انا اتجوز واحده مطلقه - اصل هو يعني مافيش غيرها ؟؟-
البنات حواليا كتير بيحبوا و منهم بحبهم يبقي ليه افكر في واحدة مطلقة
انا مش لاقي أي سبب لكده

--------------------------------------

قلوب حائرة

اذا تقدم لكى رجل مطلق هل ستقبلين به عريسا ؟؟

ايوة اقبل
اذا ماتوفرت فيه كل شروط الي بحلم بيه
ماهو مش معقول اعقبه بذنب مش ذنبه
لو كان عنده أطفال عادى برضة ممكن اقبل قوي وممكن اربيها كمان معايا

------------------------------------

عاشقة الوطن

اذا تقدم لكى رجل مطلق هل ستقبلين به عريسا ؟؟

لو اتقدم ليا راجل مطلق الاول اعرف ايه سبب الطلاق مش يمكن يكون هو انسان مش كويس وبتاع مشاكل مثلا وممكن يكون ظلم اللى كانت معاه يبقي فى الحالة ديه اكيد مش هأقبل بيه
لكن لو عرفت ان هو انسان كويس وانه متوفقش مع اللى كان متجوزها يبقي فى الحالة ديه ممكن اعيد النظر تانى لو أهلى وافقوا
لو كان عنده اولاد كمان.. معتقدتش ان اول جواز ليا اتجوز واحد عنده اولاد
لا مش هوافق لانى اكيد عاوزة اعيش مع واحد وابدأ حياتى معاه
والمسئوليه اللى هتكون عليا تبقي مش من اولها كده اولاد ومش ولادى كمان
وممكن فى الحالة ديه مدهمش حقهم والرعاية مش كامله لانى اكيد هاكون عاوزة اعيش حياتى
وبالشكل ده هأظلمهم وأظلم نفسي كمان
-----------------------------

لولا

اذا تقدم لكى رجل مطلق هل ستقبلين به عريسا ؟؟

بصي يا ستي هي مطلق مش حاجة تعيبه مدام انسان كويس ومحترم بس انا احب اني اكون الزوجه الأولى والاخيرةبس صدقيني الوضع ممكن يختلف لو انا اتحطيت في الموقف ده

-------------------------------------

وفى النهاية بنتمنى يكون موضوعنا عجبكم وعلى فكرة السؤال الموجود ده للرجال وللبنات أعتبروه تاج وياريت أى حد يدخل ياخد السؤال عنده فى المدونة ويجاوبه ويبعته لأى حد يعرفه

وأحنا كمان هنعمل كده وهناخد السؤال عندنا فى المدونة ونحط أجابتنا عليه

مستنين رأيكم ومشاركتكم وملاحظاتكم