RSS
Wecome to my Blog, enjoy reading :)

Thursday, May 1, 2008

أسباب ضياع الحب

زي ما كتبنا الحلقة الي فاتت في مدونة البنات عايزة ايه عن ماذا تريده البنات من خطيبها هناقش هنا نقطة مهمة وهي ايه اسباب ضياااااااااااااع الحب
في الغالب بتبدأ الخطوبة بمشاعر ملتهبة وكل واحد حاسس انه ماسك السما وان حبيبه ده مالك عليه الدنيا والي فيها شويا كده وتلاقي الدنيا هديت كده وزيها زي قلتها طيب ايه السبب ولا في ايه ولا هي على راي المثل " الغربال الجديد بيكون ليه شدة "
اسئلة بتدور في دماغ الكتير من الشباب والشابات طيب احنا هناقش هنا شوية نقط وانتوا ممكن يكون ليكم راي تاني
يعني في الأول كده بيكون كل واحد حريص ميقولش اي شي يزعل الطرف التاني وبيدق قوي على كل كلمة بتتقال وشويا شويا لما بياخدوا على بعض بتلاقي كلام بيتحدف متعرفش منين عادي بقى0
وبعدين في الاول تلاقي ايه الرنات شغالة على ودنه لما يصحوا يرنوا لبعض ولما ياكلوا يرنوا لبعض ورن على الفاضي والمليان وهب هب تلاقي ايه يدوب رنه في الصبح يرد عليها في العشا والسلام في الوقت ان الاستاذ او الاستاذة لو واحدة صحبتها رنت عليه بترد الرنة في السريع يعني دوام الحال من المحال.
في الاول كل واحد بيطمن على اهتمامات التاني بعد يومين وبتاع تلاقي كل واحد ازيك عامل ايه اخبارك سلام سلام ميعرفش ان ده جزء من شخصية الانسان الي بيحبه لا ازاي ايه الي يخليه يوجع دماغ والله كتر خيره انه بيسال في الاساس احنا هننهب ولا ايه وعجبي
كمان مافيش اي طرف بيهتم بيسال كل فترة الطرف التاني ايه الاشياء الي بتزعلك مني علشان يحاول يتجنبها بيبقى بس مهتم بنقض الطرف الاخر وبس من غير ما يعرف راي الطرف التاني فيه وايه الي بيزعله محتاجين نقف كل فترة ونعرف ايه الي بيزعل الطرف التاني مننا
ويرجعوا في الاخر كل واحد يحط ايه على خده ويقول اين ذهب الحب وكتير منهم شايفين ان الحب كدبة كبيرة " ماهو هو فعلا كده اصل مافيش حاجة اسمها حب وبس الحب حاجات كتيرة مش لمسة ايد وضمة صدر ونظرة عين الحب اكبر كتييرالحب مش انانية ومش امتلاك الحب اكتر من كده كتير بس مين يقدر ويفهم لو حد ليه اسباب تانية ياريت يبعت ويقولنا

22 comments:

شيماء الجيزى said...

بصيى يا بيبو
انا شايفة ان الحب ده عبارة عن بذرة
بذرة لوردة محتاجه تتسقى وتتعالج ويهتم بيها
الكلام اللى قولتيه ده للناس اللى بتتسلى
لان عمر محد هيحب مش هيهتم
اينعم بتيجى لحظات ملل
بس اللحظات دى محتاجه التجديد
لكن ضياع الحب لو بالشكل اللى بتقوليه ده يبقى مش حب ابدا

ارجو انك تكونى فهمتى وجهة نظرى
تحياتى يا جميلة

رئـــــيسـة حزب الأحلام said...

ليتنا نجد الحب

صاحب المضيفة said...

علشان كده الوسطية حلوة في كل حاجه


بتخلي العلاقة مظبوطة طول ما بيغلفها الشرع والادب والدين


وبتفضل محترومة ومثالية لابعد درجة بالشكل ده


تحياتي

واثقة بربها said...

الحب كلمة سهلة انها تتقال لكن الحب الفعلى و الحقيقى شئ نادر فالذى يحب تكون مشاعره و احساسه بالطرف الاخر عالى حتى مع مرور الوقت فهم احباب و يهتمون ببعض و يخشون على بعض
فالحب لا يعرف الانانية
الحب الصح و الحقيقى بين اى اتنين لازم
يكون الاول فى اطاره الصح
يعنى شرعى و حلال

Miss. Sosa said...

الجميل ان انتي عبرتي عن واقع بيحصل كتير حطيتي ايدك علي علة بيعاني منها كتير
تحياتي

مدحت محمد said...

رفقة عمر كانت كاتبة عن الموضوع ده بطريقة لذيذة اوى وعجبتنى للغاية
دايما الحب لما يكون
حب فى الله بيدوم
من الطرفين
لكن الحب التقليدى اللى هو رنات ونظرات
هو حب بس ممكن يحصل ملل
ده اكيد هيحصل ملل
لكن لما يكون على طاعة
وعلى احلام
الاتنين عايزين يحققوها مع بعض
هيدوم الحب

ولعلمك
فى وقت الخطوبة بيبقى فى اشتياق
لانهم بعيد عن بعض
بعد كدة مش هيحسو بيه
لانهم هيبقو فى بوز بعض
هههههههههه

فاعتقد انى بناء الاحلام
والطاعة
والحب فى الله
اركان اساسية فى بقاء الحب

الى جانب تجديده

احنا بنجدد ايمانا بايه
لا اله الا الله

وتجديد الحب برضه
بكلمة رومانسية
من آن لاخر

واى حاجة بتتبنى على طاعة الله
عمرها مابتقع ابدا

قلوب حائرة said...

شيماء الجيزى
************
ازيك ياقمرية عاملة ايه ياقلبي أنا معاكي أكيد في وجهة نظرك الي هي ان الحب ده عبارة عن بذرة بتحتاج تتسقي وتتعالج وهو ده الي بقول عليه الاهتمام عارفة يا شيماء في كتير قوي بيفتكروا ان الحب ده نهاية المنتهى وكفاية كده وانك المفروض تكوني حاسة بحبه وبس ومش واجب عليه اي اهتمام بيكي في كتير بيحبوا من غير اهتمام لانهم مش شايفين الحب صح شايفينه من وجهة نظرهم هما وبس يعني هما بيحبوكي علشان انتي بتقدمي ليهم حاجات بتسعدهم ومش بيفكروا ايه الي بيسعدك يارب اكون قدرت اوضح ليكي وجهة النظر وتسلمي ونورتيني ياقمرية يادرة عقد البنات عايزة ايه

قلوب حائرة said...

رئيسة حزب الأحلام
**************
منورانا بتواجدك دايما وياريت فعلا نحب صح ياريت محتاجين نحب صح مش نحب على مزاجنا

قلوب حائرة said...

صاحب المضيفة
***********
منورنا دايما وفعلا أنا معاك في أن الوسطية أحسن الأشياء وان الحب في الله من أقوى انواع الحب نسال الله ان يرزقنا هذا الحب

قلوب حائرة said...

واثقة بربها
************
منورانا في اول تشريف لينا وانا معاكي ان الحب لازم يكون في اطار شرعي وحلال دي نقطة مختلفناش عليها بس انا شايفة بعد ما الحب يجمعنا لازم ننميه جوانا ونحرص على انه يكون وليد بيكبر مش يكفي بس انه يكون جوانا وبس ده الرسول الكريم بيحثنا اذا احببنا احد أن نخبره سلامي وتحياتي ودايما منورانا

قلوب حائرة said...

ميس سوسو
************
واضح ان دمك خفيف جدا وبيسعدنا قوي تشريفك لينا هنا وفعلا ده بيحصل وياريت دايما مواضيعي تحظي على اعجابك

قلوب حائرة said...

مدحت محمد
*********
ياهلا بيك يامدحت بس يا استاذي العزيز اكيد الحب في الله ده اقوى انواع الحب بس ياجماعة حتى الحب في الله محتاجح اهتام اني اجي مثلا اسال الانسانة دي ايه الجديد في عبادتها واشجعها وايه الي حفظته واساعدها كل شي محتاج يااااااااااااااااااجماعة الاهتمام شي اساسي بنحتاج ليه ومش هنقدر نعيش من غيره انا بحب فلان لانه مهتم بشؤون حياتي وبيقدرني وبيحترمني وهكذا صدقوني محتاجين نفهم الحب صح علشان نكبره جوانا

KING TOOOT said...

المذاكرة و السلسلة
هما إللي .... آه لامؤاخذة أنا دخلت في الموضوع من غير مقدمات
نجيب التعليق من الأول
أنا رأي إن السبب في ضياع الحب حاجتين
اولهم إن الحبيب أو الحبيبة مش بيذاكروا كويس
يعني إيه ؟
يعني الحبيب و الحبيبة لازم يذاكروا بعض كويس و طول الوقت ، لازم يعرف إيه بيسعده و إيه بيدايقة و إيه بيحبه و إيه بيكرهه و إيه ممكن يطيره من الفرح و إيه ممكن يهده من الزعل ،، يعرف إيه إحتياجاته و أمنياته و أهتماماته ، و يحترمها و يحاول يساعده فيها أو يشاركه في بعضها المتناسب معاه ، و كمان يركز قوي في حدودة ، أيوة حدودة ، يعني يعرف لغاية فين ممكن يكون خط أحمر ، و يحترم ده ، و يعرف إن الثقة و الألفه و كسر الحدود بتكون مع الوقت ، و الوقت ده محتاج أيام و شهور و سنين ، علشان كده لازم يذاكر حبيبة كويس ، يذاكره بجد ، و يراجع طول الوقت علشان يعرف كان غلطان في إيه و يصححه ، و الطرف الثاني نفس الشيء ، لازم يذاكر بجد و جدية و إجتهاد كأنه داخل إمتحان الثانوية العامة أو أكثر
و تاني سبب هو السلسلة
يعني إن الحبيب أو الحبيبة بعد فترة بيشعر إن حب الطرف الثاني له مضمون ، و كأنه إمتلك مشاعرة كلها و للأبد ، و ده أكبر مقلب ممكن حد ياخده في نفسة ، و بالتالي يبقى حاسس أنه ربط التاني بسلسلة ، و هي دي السلسلة إللي بأقول عليها ، مافيش مانع إن الحبيب أو الحبيبة يكون متأكد من حب الطرف التاني له ، بل ده لازم يكون متأكد من مشاعر الطرف الآخر ، لكن التأكد حاجة و الضمان حاجة تانية ، ممكن أكون متأكد من حب إنسانة ليا ، مليون في المية ، بس لازم أعرف إني طول الوقت لازم أبزل مجهود علشان اضمن إستمرار الحب ده ، لكن بقى لو قعدت و بطّلت أبزل المجهود ده ، و بطّلت أهتم بيها أو بحياتها أو بمشاعرها فممكن قوي الحب ده يدوب و يدبل و يختفي
علشان كده عايز أقول لكل الحبيّبه
ذاكروا في الحب كويس
و مافيش في الحب سلاسل
تحياتي
KING TOOOT

Anonymous said...

الأخوات اصحاب المدونه المتميزه
تحيه طيبه
المدونه هى موضوع حلقة الخميس8-5 من اول برنامج اذاعى فى العالم العربى عن النت ويذاع يوميا عدا الجمعه التاسعه وعشر دقائق صباحا على اذاعة مصر الرئيسيه اى البرنامج العام على موجه اف ام 107 وسته من عشره
ولكل مدينه موجة اف ام خاصه وكذلك يذاع على موجه متوسطه
ايه ام عند رقم 80 على مينا الراديو لكل مصر
او يمكن الدخول الى موقع البرنامج والضغط على رابط تحت الساعه فى الجهه اليمين من الموقع وقت اذاعة البرنامج والنتظار قليلا لتستمعوا لنا وطبعا يجب ان نضغط على الرابط قبلها بعدة دقائق وانتظار موعد البرنامج
والموقع
http://dear.to/cairo
وننظر ملاحظاتكم وكذلك تعليقات زوار المدونه على مدونه انشات خصيصا لهذا الغرض
http://netonradio.blogspot.com
وبالتوفيق ان شاء الله
اسرة البرنامج

قلوب حائرة said...

كينج توت
********
الزيمل العزيز وليد انحني احتراما لكلامك الذي عبر بشكل اخر عن ما ننادي به وهو الاهتمام بالحبيب والمتمثل في كما ذكرت ان نذاطر الحبيب كويس وجميل قوي تشبيهك بالسلسة لان فعلا دي الكرثة الي بتطير الحب ان كل واحد فاكر انه خلاص واثق من حب حبيبه ودمتم فين الدور الي بيقوم بيه علشان يقوي الحب ده مش هتلاقي اي دور بيقوم به كما لو كان هدف ووصل اليه والسلام لاطبعا الاستمرارية في الحب الاساس اني احس اني كل يوم محبوبة وكل يوم احس اني لسة البنت الي لسة عارفها انبارح تحياتي ليك ولكلامك الي جه المرة دي في الجون قووووووي وسلامي لهوبة ولعمر

قلوب حائرة said...

الاستاذ صلاح حجازي
***************
بيسعدنا وبيشرفنا جدا استضافتكم لمدونتنا المتواضعة الي بنحاول من خلالها نوضح وجهة نظرنا في محاولة لايصال وجهة نظرنا لاخرين لان اي مشكلة بتنيع من عد فهم كل طرف للطرف الأخر ،نيابة عن كل المشتركين معي في المدونة بنسعد بثقتكم الدائمة فينا

Doba said...

اتى اكتر واحدة عارفة ان الحب عبارة عن طريق رايح جاى وعادة لما بيبدأ الحب بيكون له وهج من نوع خاص وبيظل يخفت ويخفت لغاية ميبتدى يمشى فى الطريق اللى قلتلك عليه

بس لازم الاهتمام من الحب ومن الطرفين ولو حد قصر التانى يشده وهكذا الدنيا تمشى

الحب حلو قوى ولازم نستمتع بيه ونراعيه مش نمسلكه الشوكة والسكينة

وحشتينى ومفتقدة مدونتك ورومانسيتها
هبة

كلام على بلاطة said...

البنات عايزة الستر وابن الحلال وفرصة كريمة للحياة ماذا تريد اكتر من كدة
ولكن ظروف الحياة القاسية بتخلى الولد والبنت مضغوطين ومش مستحملين حتى اقل القليل مما يعانوه فينفجروا فى بعض ويضيع الحب وتضيع سنوات العمر
ومنه لله اللى منه السبب

قلوب حائرة said...

دوبا
*******
ام يوسف عندنا يا مرحبا يامرحبا انتي لخصتي كلامك ياهوبة في نقطة انه محتاج اهتمام ولو الاهتمام ضاع يبقى ضاع الحب ولازم يكون الاهتمام من الطرفين مش من طرف واحد علشان يظل متوهج وفي قمة اشتعاله سلامي ليكي وليوسف ويحي

قلوب حائرة said...

كلام على بلاطة
**********
ايوة ليك حق يا سي الاستاذ البنات عاوزة الستر وبن حلال وحياة كريمة والحياة الكريمة عامل من عوملها الاهتمام والكلمة الطيبة ياعمنا يالا سلام ونورت وشرفت

دواير said...

بيتهيألي اني جيت متأخرة شوية....بس برضه هعلق....عشان أنا بمر بتجربة مماثلة..مش أنا بالضبط..لأ دي واحدة صاحبتي...بس بصراحة على عكس كل اللي اتقال هنا..بيتهيالي انها هي وخطيبها حبهم بيزيد كل يوم عن التاني...لدرجة اني ساعات بقولها أني بحس انهم اتنين بيحبوا بعض وبس مش خطوبة وجواز وكلام من ده...مع العلم ان أول مرة تشوفه فيها كان لما جه بيتهم وطلب ايدها.....يا ريت كل الناس يكونوا كده...

قلوب حائرة said...

دواير
********
لا متاخر ولا حاجة انتي منورانا خالص ويارب دايما موجودة وبسم الله ماشاء الله على صحبتك ويارب حبهم يزيد يوم بعد يوم بس اكيد الاتنين بيراعوا بعض في كل شي يعني كل طرق بيهتم بالطرف التاني وبيحترموا بعض وبيعملوا كل الاشياء الي احنا حذرنا منها تحياتي لكي ودايما منوراني

 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes