RSS
Wecome to my Blog, enjoy reading :)

Thursday, July 17, 2008

لا لهذه الأفعال

أتكلمت قبل كده فى الحاجات اللى البنت عايزاها من خطيبها ووضحت فيها حاجات كتيرة قوى مطلوبة من الخطيب ولكن فيه أخطاء بيقع فيها الخطيب وبتكون كفيلة لهدم العلاقة بينه وبين خطيبته

أولا التغيير المفاجأ اللى بيحصل فى شخصية الخطيب وده بيكون لأسباب كتيرة ويمكن لأنهم بيكونوا لسة معرفوش بعض وفجأة بيكتشفوا حاجات كتيرة ولكن المطلوب أن التغيير دة يبقى تدريجى يعنى مش معقول تكون فى صورة ملاك وفجأة وبدون مقدمات تتغير للعكس تماما فى كل حاجة

ثانيا أهتمام الخطيب بشغل وطموح خطيبتة ساعات بنلاقى أهتمام كبير قوى فى بداية العلاقة بينهم بشغلها وبطموحها وبكل حاجة خاصة بأحلامها وفجأة نلاقى هدوء وجمود فى الأهتمام وكأنه كان واحد تانى وأتغير
ياريت التغيير ده برضة ما يجيش مرة واحدة ولو مش حابب شغل خطيبتك أو مش من أهتماماتك بلاش تحسسها فجأة بعدم أهتمامك بيه

ثالثا عدم أحساسك بيها وبمشاعرها وعدم تفهمك لطبيعتها الرقيقة واللى بتكون عايزة حد يحافظ عليها ويحافظ على المشاعر دى وكلامى معناه أنه ممكن البنت وأى بنت بتكون حساسة ورقيقة وعندها مشاعر حلوة وساعات كتيرة بتحب تظهر مشاعرها لخطيبها بطرق كتيرة منها مثلا رسالة موبايل أو رنة أو أى طريقة أيا كانت أيه بقى رد فعلك تجاه الحاجات دى تتجاهلها وكأن مفيش حاجة ولا حتى تحاول ترد عليها ولا بكلمه أستنى بقى شوية تجاهلك ده وعدم ردك وأهمالك لمشاعرها كفيل بأنه يجرحها قوى ويضيع شوية المشاعر اللى بدأت جواها ناحيتك وتدمر مشاعرها ونفسيتها جدا
يعنى حتى لو أنت لسة ما حستش بأى مشاعر ناحيتها رد عليها بأى رد حتى لو برنه تعرفها بأنك سعيد بكلامها ليك بلاش تتجاهل مشاعر خطيبتك بلاش

رابعا حاول على قد ما تقدر تحسسها بأنها مهمه عندك ووجودها مهم فى حياتك مش بس مجرد شكل أجتماعى هتكمله

خامسا بلاش تعاملها بطريقة وحشة أو تحاول تعلى صوتك عليها لأن ده بيعتبر أهانه لها ولما تعمل أى موقف يضايقها ياريت ما تتجاهلش اللى حصل ولكن حاول تصالحها وتصلح اللى عملته وبلاش تجرحها وتضايقها أكتر من كده

سادسا بلاش لغة التهديد تكون فى كلامك ليها كتير لأن الاسلوب ده مش هيجيب نتيجة بالعكس ده هيزعلها أكتر وهيحسسها بأنها هتعيش معاك غصب عنها ومهددة دايما بأنك تطردها من حياتك لو ما نفذتش كلامك وأنت طبعا هتنفذ تهديدك

سابعا زى ما هيا مهتمه بأهلك وبتعاملهم كويس جدا أنت كمان أهتم بأهلها حتى لو ماكانتش بتحبهم لكن معاملتك الكويسة ليهم هتقرب منك خطيبتك قوى وبلاش تحسسها بأن علاقتها بأهلها هتنتهى بعد جوازكم وبأن كل حياتها هتنحصر فى علاقتها بأهلك بس لأن أهلها هيفضلوا أهلها مهما حصل زى ما أهلك هيفضلوا أهلك مهما حصل

ثامنا حس بيها وأسمعها وأنت كمان أتكلم معاها وما تحاولش تهملها وتهمل وجودها وتتصرف تصرفات تضايقها وتفضل مصر على كل حاجة بتضايقها وأنت عارف بيها

13 comments:

Anonymous said...

مهندس اسكندراني

انا موافقكم جدا في الكلام ده

بس لازم بردوا البنات زي ما عايزين الرجالة تحافظ على شعوركم واحاسسكم

انتو كمان نفس الشيئ مطلوب منكم وتعرفوا كويس ان الرجل عليه ضغوطات كتيرة جدا في مجتمعنا ده

ومسئولياته بردوا كبيرة وكتيرة

مسئولية الزوجة بالكامل ومسئولية توفير المأكل والمشرب والملبس والسكن والرعاية الصحية

وكل حاجة على الزوج من مسئولية كبيرة ده غير ضغوطات المعشة نفسها والعمل .... الى اخره

متجيش الزوجة او الخطيبة تطلب كمان انه يحافظ على اهتمامه بشغلها واحاسسها ويرن لها لما ترنله او يبعت لها رسالة ..... الى اخر كل هذه الاشياء اللي في نظري الشخصي تفاهات من المرأة وده بسبب انها فاضية ومعندهاش اي مسئوليات

Empress appy said...

حلو الكلام
عارفه انا بقى لما حبيت اوجهه خطيبى احمر وبقى زى التور الهايج ومش عاوز يقتنع وشكرا لكم لان الرجاله بتكابر

في حب مصر said...

زي ما هو مطلوب من الخطيب الحاجات دي كلها.. مطلوب من الخطيبة نفس الحاجات
ساعات بتكون فيه بنات مخطوبة ولما تلاقي حد تاني مناسب اكتر ليها تلاقيها تبدأ تقلب تماما ةتغير شخصيتها.. ودي حاجات انا شوفتها بنفسي
العلاقة مشتركة.. والاهتمام لازم يكون مشترك

تحياتي

صاحب المضيفة said...

كل الأمور دي فعلا مهمة في العلاقة بين المخطوبين


ربنا يكرمك على المواضيع الحساسة دي ويعزكم يارب




تحياتي

بسمه عبدالباسط said...

مهندس اسكندرانى

اكيد طبعا مطلوب من المرأة أن تحافظ على شعور الرجل وأنها تستحمله
ولكن الحاجات اللى بنطلبها مش تفاهات خالص لية بتقول عليها كده دى حاجات بسيطة وبتعمل فرق كبير فى العلاقة بين الراجل والست

شكرا على الزيارة ونتمنى تتابعنا دايما ونعرف آرائك

تحياتى

بسمه عبدالباسط said...

appy

هو فعلا الرجالة بتكابر ودى المشكلة الكبيرة واللى مش عارفة نعمل فيها ايه

تحياتى

بسمه عبدالباسط said...

فى حب مصر

اكيد طبعا مطلوب من البنت الحاجات دى ولازم تعملها

لكن المثل اللى انت ذكرته مش موجود كتير قوى كده

وفعلا العلاقة مشتركة بين الاتنين ولازم الاتنين يراعوا شعور بعض ويفهموا بعض جدا

تحياتى

بسمه عبدالباسط said...

صاحب المضيفة

هيا فعلا مهمة بس مين يفهم ويقدر ويعمل بيها

شكرا على زيارتك وكلامك

تحياتى

heba zinel3abedin said...

طب لية التغير من البداية انا فى اعنقادى ان فترة الخطوبة دى اكتر فترة يقوم فيها الطرفين بخداع الاخر طب لية من البداية اخدعة واجبرة بالطبع انة بخدعنى لانة لو لاقى منى وضوح من البداية وعدام اكتراث منى لعيوب الموجودة فيا انها تظهر لية وتبان هو كمان من المؤكد انة هيكون صريح معايا

بسمه عبدالباسط said...

heba zinel3abedin

فعلا هو لازم من الصراحة
بس كتير بينخدعوا بمظاهر مش حقيقية
والحمد لله انه فيه فترة خطوبة يقدروا يكتشفوا فيها بعض من الاول

تحياتى

known said...

ده كلام والله مهم جدا وفعلا معظمه بيحصل مع الناس المخطوبين والحاجات اللي بيعملها الشخص ده مع خطيبته فعلا بتجرح مشاعرها جدا بالذات لما تكون رقيقه ومرهفه المشاعر والمفروض الواحد يراعي مشاعر الانسان اللي بيحبه وميكونش اناني وبيفكر في نفسه بس ويحط نفسه في دايره هوه بس يكون الوحيد المهم في الدايره دي ويتجاهل اللي حوليه من الناس اللي بيحبوه بالذات خطيبته اللي هتكون زوجته بعد كده ازاي هتحس معاه بالامان والراحه لو هوه محسسهاش بكده ممكن مشاعر الخوف تزيد عندها وممكن العلاقه تنتهي نهائيا عشان كده كلامك مهم لازم الواحد يهتم بالحاجات دي لانها ممكن تكون حاجات صغيره بس مهمه جدا وبتأثر.....معلش طولت ياريت تشرفيني بزيارتك لمدونتي البسيطه

بسمه عبدالباسط said...

butterfly

كلامك صح طبعا ولكن ياريت حد يعمله وده اللى بنتمناه


تحياتى

zainab said...

السلام عليكم

كلام جميل ماقدرش أقول حاجه بعده

ربنا يرزقنا كلنا الأزواج الصالحين

اللهم امين

 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes