أكسر للبنت ضلع مش هيطلع لها غيره

أكسر للبنت ضلع يطلع لها 24

مثل قديم كلنا عارفينه وسمعناه كتير وكتير أتربوا عليه وبيه وفيه ناس مازالت لحد دلوقتى مقتنعة بيه جدا وبتطبقة

ولكن إيه معنى المثل ده وإيه وجهه نظر الناس فيه بالظبط ؟

فيه فئة معينة بتطبق المثل ده حرفيا بمعنى أنهم فعلا بيكسروا للبنت مش ضلع واحد لا مليون أتنين مليون كده وبيبقى مبدأ الضرب هو الأساس فى تعاملهم كأنها مثلا كائن بلا عقل ولا شعور ومفيش وسيلة للتعامل معاها غير الضرب

فئة تانية ما بتضربش ولكن كلامها وطريقة تعاملها بيبقى أبشع من الضرب مليون مرة

وكتير قوى لما تتولد البنت وأول ما تبدأ تكبر شوية ويلاحظ الناس أن أهلها بيعاملوها حلو زى أى بنى آدم يكتر الكلام اللى من نوعية

أكسر للبنت ضلع يطلع لها 24

يا شيخ بلاش دلع هتبوظها كده

البنت ما ينفعش معاها غير الشدة

ما تطاوعهاش كده هتخلى عيارها يفلت

وملايين من الكلمات الغريبة واللى نفسى أعرف الناس جابتها منين وعلى أى أساس بيشوفوا أن البنت لازم تتعامل بالشدة والقسوة علشان تبقى كويسة

وبصراحة أحب أصدمكم جدا وأقول ليكم أن القسوة والشدة دى وما يصاحبها أحيانا من ضرب فى بعض الفئات بتخلق عقد وكلاكيع جوا البنت وده أول حاجة

تانى حاجة بتخليها ساعات وغصب عنها تعمل حاجات غلط من ورا أهلها

ثالث حاجة الجرح النفسى اللى بيبقى جواها من المعاملة دى بيفضل ملازمها سنين وسنين وممكن ما ينتهيش خالص مهما حصل وممكن يمتد بعد كده لولادها بمعنى العقد اللى جواها بتطلع عليهم يعنى للأسف المشكلة مش متوقفة عليها هيا وبس ولكن على أجيال هتيجى بعدها وهتتورث العقد دى

يعنى فى النهاية أكسر للبنت ضلع مش هيطلع لها غيره وهيموت كل حاجة حلوة جواها

وفعلا لو عايز تخسر أى واحدة عاملها بشدة وأكسر لها مليون ضلع وصدقنى أنت اللى هتجنى ثمار ده بإيديك سواء كانت الواحدة دى بنتك ولا أختك ولا خطيبتك ولا مراتك

بقلم بسمه عبدالباسط