أنا عايزة عريس من شباب الثورة
جملة ممكن تسمعها كتير الأيام دى ومن بعد ما الثورة قامت
ومع أن جيلنا والأجيال اللي بعدنا كانت كل معلوماتهم عن الثورات من كتب التاريخ والأفلام وماكانش يخطر ببال حد أبدا أننا هنعاصر ثورة ونبقى مشاركين فيها بأي طريقة من الطرق
ولكن بعد أيام قليلة من هدوء الأحوال ومن قيام الثورة وظهور سلوكيات جديدة كانت مختفية قبل كده ظهرت جملة أنا عايزة عريس من شباب الثورة
ومش بعيد حاليا لما يتقدم عريس لأى بنت يبقى السؤال الأول هو أنت من شباب الثورة ؟؟
وممكن نلاقى ورقة بالمواصفات المطلوبة في العريس الأيام اللي جاية زى
أنه يكون خرج على الأقل في 3 مظاهرات
أتضرب وأتعذب من الشرطة
وقف ما لايقل عن أسبوع في اللجنة الشعبية اللي تحت بيتهم
ما بيلبسش بلوفرات
عنده حساب على الفيس بوك وتويتر وعنده خمسين ستين صفحة مؤيدة للثورة والثوار ومعارضة للنظام القديم
يتأسف ويبدى الندم بخصوص صفحة الراجل اللي واقف ورا عمر سليمان وفى البداية يعرف هو مين ولو معرفش يبقى هو الجاني على نفسه
عنده ما لايقل عن خمس أجندات وشغل كشاكيل السلك لا يغنى عنهم
ما بياكلش كنتاكى ولا يعرف طعمه
يكون من المترددين على التحرير دايما ويعترف بقيمة هذا الميدان ولازم الزفة بتاعت الفرح تعدى على التحرير وتقف فيه شوية
يقول كل اللي يعرفه عن ( وائل غنيم ، أحمد شومان ، ماجد بولس ، موقعة الجمل )
وفى النهاية يكون أتقتل فيما لا يقل عن مرتين ثلاثة وحارب في الحلم
وأخيرا السؤال اللي بيطرح نفسه مش الشباب اللي كانوا في الثورة وشاركوا فيها بأي طريقة من الطرق هما نفس الشباب اللي كانوا موجودين قبل كده وكان فيه تار بينهم وبين البنات وكل طرف مش طايق التانى وبيطلع أي حاجة فيه عشان يرفضه وخلاص
أعتقد أننا كلنا بنات أو ولاد جوانا رواسب وموروثات محفورة جوانا ومازالت بتأثر على علاقاتنا ببعض وزى ما الثورة طلعت أحلى شباب وبنات وظهرت صفات وسلوكيات رائعة جداااااااااااا لازم نبدأ نمسح الرواسب والحاجات اللي بتضايق كل طرف من التانى ونبدأ صفحة جديدة من تانى زى ما بنبدأها في كل حاجة في حياتنا حاليا
بس ياترى هايجى فعلا اليوم وينتهي الصراع اللي خلقناه بأيدينا وعشنا فيه سنين وسنين
5 comments:
جااااااااااااااامده اخر حاجه بجد حلوةاوى واصلا انا كنت بدور على موضوع يربط الجواز عن الثورة اتمنى تتابعينى على مدونتى وعلى مجلتنا ع الفيس بوك اللى بتتكلم عن اختيار شريك الحياة
هي لسه في الوضع التجريبى ومعمولة في 3 ايام بس عايزة رايك بصراحة احنا كنا في معسكر يلااسرة يلااستقرار وده مشروع تخرجنا ويارب تعجبكم
:):)http://shahed25jan.blogspot.com/2011/03/blog-post_09.html#comments
http://www.facebook.com/pages/%D8%A7%D8%A8%D8%AF%D8%A3%D9%87%D8%A7-%D8%B5%D8%AD/183707841672047
عارفه دلوقتى بقى سؤال مهم واساسى فى اى مقابله تعارف بين العريس والعروسه هو سؤال موقفهم من الثوره ..وعملوا ايه ايام الثوره و نزلوا مظاهرات ولا لا انا قعدت يجى تلت ساعه عمال الاخ يحكيلى على زياراته لميدان التحرير ... وبنت عمى برده نفس الكلام :D:D
هههههههههههههههههههههههههههههههههه..
فكرتيني أول ما دخلت التحرير و لقيت راجل كبير في السن شوية رافع لافتة يطالب بيها بعدد من شباب 25 للزواج من بناته :P
تمام انا دخلت الصفحة بتاعتكم وعجبتنى جدااااااااا وحاليا بقرأ المجلة
ربنا يوفقكم إن شاء الله
--------------------
أسيره الاحزان
ههههههههههه
يعنى أنا ماجبتش حاجة من عندى
---------------------
غير معرف
هههههههههههههه
هههههههه
مقالة جميلة وبتتمتع بخفه الدم
اظن دلوقتي كل الشباب لازم ينزلو مظاهرات
علشان يكونو عرسان المستقبل النافعين
*****
فانتظار المزيد
وبتوفيق لكي دائما
سمر مصر
http://sawrafata.blogspot.com/
Post a Comment