RSS
Wecome to my Blog, enjoy reading :)

Friday, December 18, 2009

مطلقات لكن شرفاء

طبعا كلنا عارفين أن كلمة مطلقة فى مجتمعنا أو فى أى مجتمع شرقى الناس بتبص لها أزاى وبيبقى محكوم عليها وعلى حياتها وآحلامها بالأعدام وأكيد مش كل الناس كده ولكن الأغلب بيتعاملوا معاها كأنها جرثومة أو فيروس أو تمثال مش بنى أدم من لحم ودم ومن حقه يعيش ويكمل حياته
وتعالوا كده نشوف بيحصل إيه
من بداية المشاكل اللى بتحصل بينها وبين جوزها والكل بيطلب منها حتى لو ماكانتش غلطانة ومفيش فيها أى عيب أو شىء يسبب المشاكل وأن المشاكل بسبب الزوج نلاقى الكل بيطلب منها بأنها تستحمل وتفضل متجوزة حتى لو هتعيش فى بؤس ومشاكل طول عمرها وكل ده علشان ما تبقاش مطلقة وأزاى تتطلق وأزاى ترجع بيت أهلها من تانى وأزاى هتعيش بعد كده ومليون حاجة بتتقال لها علشان تتراجع وتفضل عايشة فى ذل ومهانة لا حصر لها
وبعد ما خلاص بقت طالق تبدأ المشاكل تزيد من أول نظرة الناس وكلامهم واللى دايما بيطلعوا الست هيا اللى غلطانة وأنها السبب فى الطلاق وأنها لو كانت كويسة ما كانتش أتطلقت وفجأة تلاقى نفسها بقت محرومة من حاجات كتيرة وممكن جدا أهلها يكون ليهم دور كبير فى ده بأنهم بيمنعوها من الخروج والظهور قدام الناس كأنها عملت جريمة وتتقيد حريتها أكتر وأكتر ولو كان الأهل متفهمين لظروفها وبأنها أنسانة طبيعية زى أى حد مش هتترحم من كلام ونظرات الناس فى الشغل فى الشارع فى النادى فى أى مكان وكل مكان
وأكيد هيكون محكوم عليها تفضل كده من غير جواز باقى عمرها وده لية بقى لأن كل الناس شايفة أنه ما ينفعش واحد ما سبقش له الجواز يتجوز واحدة مطلقة حتى لو ماكانش عندها أطفال وده طبقا للتفكير الشرقى ولأن المجتمع عنده عقدة من الناحية دى فأزاى واحد ما سبقش له الجواز يتجوز واحدة مش بنت وحتى لو سبق له الجواز برضة كل الناس بتديله مليون حق يرتبط بواحدة ما سبقش ليها الجواز أصله راجل وبراحته عادى يتجوز مليون مرة ولازم اللى يتجوزها تكون بنت عذراء بمعنى أصح زى ما بيتقال
ودى طبعا عقدة كل الرجالة على أعتبار أن المطلقة واللى فقدت عذريتها وبطريقة شرعية بقت جرثومة ومالهاش حق فى أى حاجة
ولأن كل اللى بيتقال لأى واحد أنت لازم تتجوز واحدة محدش لمسها واحدة محدش جه ناحيتها غيرك
ومش قادرة أفهم لحد دلوقتى هيا المطلقة دى مش أنثى برضة واللى كان فى حياتها ده مش جوزها وكان اللى بينهم حلال وشرعى يبقى إيه المشكلة والعقدة عند الناس مش فاهمة
وياريت محدش يقولى أنتى جاية على المجتمع والرجالة وبتظلميهم لأنى فعلا ما بظلمش حد وعندى أمثلة كتيرة هعرضها ليكم من حياتنا الواقعية
هو أحنا بنرجع لورا ولا بنمشى لقدام مش عارفة لية كل مدى بحس أن تفكير الناس فى الحاجات دى بالذات بيرجع للعصر الحجرى ونفسى أعرف لية المطلقة مش من حقها تعيش حياه طبيعية بعيدة عن كلام الناس ونظراتهم
قصة حقيقة لصديقة ليا مطلقة واللى أعرفه أن المشاكل كانت من طليقها وبأنها أكتشفت أنه مش كويس بعد الجواز وحاجات تانية كتيرة مفيش داعى لذكرها وفى النهاية وصلت للطلاق
صديقتى دى مش قادرة تعيش حياتها طبيعية هيا أيوة بتشتغل وناجحة جدا فى عملها وبتشتغل فى مركز مرموق جدا ولكن حياتها الخاصة ضايعة جدا بسبب معاملة المجتمع وعدم فهمه بأن مطلقة دى مش عيب ولا حاجة غلط ومن ساعة طلاقها وأتعرضت لتجربتين جواز وفى المرتين كانت المشكلة أنها مطلقة وأن أسرة العريس وأسرتها مش قادرين يتفاهموا ولا يتفهموا الموقف وبالتالى ما تمتش ولا جوازة منهم فى حين أن طليقها أتجوز مرة تانية بنفس طريقة الخداع وطلق مراته التانية وفى طريقة للجواز من الثالثة وكلهم ماكانش سبق ليهم الجواز قبل كده
شفتوا مجتمعنا عامل أزاى يعنى الراجل يتجوز مليون مرة وعادى وبرافو عليه ومفيش مشكلة والست تفضل طول عمرها محرومة من الجواز وبأنها تعيش حياة طبيعية
قصة تانية لواحدة تربطنى بيها صلة قرابة بعيدة شوية ولكنى أعرفها والبنت دى أصغر منى بحوالى سنتين وأتجوزت وبعد الجواز نفس قصة المشاكل ووصلت للطلاق
قريبتى دى كانت مليانة نشاط وحيوية وعلى طول بتضحك وتهزر وأبتسامتها كانت على طول على وشها وعنيها كانت بتنطق من السعادة وحبها للناس والحياه شاء القدر أنها تتطلق وما شفتهاش الا بعد طلاقها بفترة طويلة جداااااااااااااااا ولكن حسيت أنى شفت واحدة تانية خالص واحدة مكسورة ومجروحة بشكل بشع واحدة صوتها ما بقاش بيطلع ما بقتش بتضحك من جواها مكسورة وموجوعة ومحدش حاسس بيها وكتير بتحاول ترسم بسمه على وشها ولكن الأسى والحزن واضحين قوى وعنيها دايما مليانة مليون دمعة ومليون سؤال للناس والمجتمع لية بتعاقبونا على حق ربنا أداه لينا حق شرعى لكل الناس ولكنكم بتحللوه للرجالة وتحرموه وتعتبروه جريمة على الستات
أنا مش عارفة أقول إيه تانى غير أننا فى مجتمع ظالم وقاسى بيحلل ويحرم بمزاجه
وهفضل أنادى بيها المطلقة أنسانة شريفة بلاش تعاملوها بأنها عكس كده علشان فيه واحد كان فى حياتها ولأنه كان جوزها مش واحد تعرفه من ورا الناس
المطلقة من حقها تعيش حياتها طبيعية وتخرج وتروح وتيجى وتشتغل وتتجوز من تانى بلاش تحرموا حاجات ربنا حللها لينا
وأرحموا المطلقات من نظرتكم دى وأعتقد لو كل واحد حط أخته ولا بنته فى الموقف ده لا يمكن هيقبل بكم المعاناه اللى بيشوفوه طول حياتهم
وعلشان كده أنا بضم صوتى لصوت ملايين المطلقات اللى المجتمع والناس بيعاقبوهم على جريمة مش هما السبب فيها

4 comments:

mhmdwahab said...

شوفى بقى يا استاذة انا شايف فى الموضوع دة ان كل واحد بينظر لة من زاويا واحدة او من جهتة هو يعنى انتى بتنظرى للبنت او الست المطلقة المغلوبة على امرها واحنا كمان بننظر الى الرجل المسكين اللى تعب وشقى علشان يفتح بيت وتكون النتيجة واحدة تخلية يلف حولين نفسة وينسى اسمة ويكلم روحة ونفسة وراح اعطى ليكى مثال فى العمارة اللى جنبنا عريس وعروسة اتجوزو وبعد 6 شهور كنت واقف اشرب نسكافية فى البلكونة رايت عفش و حاجات تدل على عزال ناس بتنقل يعنى قلت لنفسى اية دة دى العمارة دى ساكن فيها اثنين فقط و عرسان كمان لحقم يعزلو المهم نقلو العفش على مرتين فى امرة الاولى مرت بسلام وفى المرة الثانية وجدت العريس قد ظهر وبيبكى ومعاة ناس من قسم البوليس وواقف على جنب يرجع وحالتة هباب ظهر ان المدام هى اللى جاية تنقل العفش فى السر من وراء واية بقى الكلمات التى سمعناها والسباب والشاتئم ياعينى واتضضح انهم اولاد عم كمان يعنى قريب المهم بعد كدة دخلو فى المنزعات القضائية والمناوشات وفى احد الايام طرق الباب عندنا قامت امى بفتح الباب مين العروسة اياة جلست تتكلم مع امى شوية والذى منة عرفنة انها معندهاش مانع انها بعد ما تحصل على الطلاق انها تتجوزنى وتركت تليفون عائلتها طبعا كنت موجود فى غرفتى وسمعت كل حاجة قلت لنفى يا نهار اسود على البجاحة يعنى كمان عايزة تقهر ابن عمها بجواز الجار اخيرا ما اود قولة ان فى وفى من الرجال و فى و فى من النساء صوابعك غير بعضها

موناليزا said...

متفقة معاكِ جدا قلبا وقالبا

ana ga3an said...

عزيزتي
احب اكمل معاكي جزء من الصورة
ان اول من يظلم المرأة هي المرأة مثلها
فام الشاب لا تقبل ان يرتبط ابنها بمطلقة وهي امرأة
وام المطلقة دائما ما تحاول ان تداريها عن الاعين
وخالاتها وعماتها واقرانها من النساء هن اول من يسن لها السكاكين
قبل الرجال
ودة واقع
واكبر دليل اذا وضعتي مطلقة في عالم رجال صرف بلا امراة اخري
سوف يتزوجها بدون اي مشكلة اطلاقا
العيب في النساء قبل الرجال

أمل حمدي said...

كل سنة وانت طيبة يا بوس بوس

 
Copyright 2009 البنات عايزة إيه Powered by Blogger
Blogger Templates created by Deluxe Templates
Wordpress by Ezwpthemes