السلبية وسنينها

أوعى لما حد يعملك حاجة تتكلمى ؟

خليكى فى حالك ومالكيش دعوة بحد

ما ترديش على أى حد يعاكسك أو يضايقك

وملايين من النصايح اللى بتتقال للبنت من ساعة من توعى على الدنيا وتبدأ تروح وتيجى واللى بتكون نابعة من السلبية الشديدة اللى ضيعت كل حاجة حلوة فى حياتنا

أنا مش هتكلم عن موضوع التحرشات من ناحية لبس البنت هو السبب ولا لا ولا ديانتها ولا حجابها ولا الكلام ده ولكنى هتكلم عن السلبية اللى وصلتنا لكل اللى بيحصل ده بغض النظر عن لبس البنت أو ديانتها أو كانت محجبة ولا لا أو ماشية لوحدها وفى حالها ولا لا

هو لية فى ناس كتيرة بتأكد على البنت ما تتكلمش لما حد يعمل لها حاجة حتى لو كانت الحاجة دى مجرد كلمات معاكسة عادية جدا ؟

لية البنت ما تردش وتاخد حقها وتوقف اللى كلمها كلام مش كويس عند حده ؟

وجايين دلوقتى نشتكى من كم المعاكسات والتحرشات اللى بيحصل

معلش مع أعتذارى للجميع أحنا اللى عملنا فى نفسنا كده أيوة السلبية بتاعتنا هيا اللى خلت الولاد والرجالة متأكدين مليون فى الميه أنهم مهما عملوا مفيش واحدة هتنطق ولو عدينا على أيدينا كام واحدة لما حد بيضايقها بترد عليه أو لما بيعمل فيها حاجة بتحاول تاخد حقها ساعتها هتعرفوا أن السلبية اللى عشنا فيها سنين وسنين هيا اللى وصلتنا لكده

لأن كل واحد متخيل ومتأكد مليون فى الميه أنه مهما عمل مفيش واحدة هتتكلم وهتسكت وخلاص زى ما الكل بيسكت لأنها لو أتكلمت هيتقال عليها كلام مش كويس وملايين الحاجات اللى موجودة فى دماغ كل البنات واللى زرعها فيها المجتمع من زمان

والمشكلة أنه ما بقاش فيه فرق بقى بين واحدة ماشية فى حالها ولبسها كويس ولا ماشية مع والدتها ولا والدها ولا ماشية لوحدها ولا لبسها مش كويس ولا مش ماشية محترمة كله مابقاش فارق لأنه خلاص بقى معروف أنه محدش هيتكلم لأن السلبية طبع أصيل فى الناس

يعنى إيه واحدة ترد على واحد وتهزأه لما يعاكسها لا لا الناس هتقول عليها بنت مش كويسة

بجد حرام عليكم التفكير ده وحرام تزرعوا فى بناتكم الخوف والسلبية علموهم يتكلموا ويقولوا كلمة الحق علموهم ما يسيبوش حقهم يمكن ساعتها نقدر نمشى فى شوارعنا بأمان

كفاية سلبية بقى لأنها السبب الرئيسى والأساسى فى أنتشار المعاكسات والتحرشات والمشكلة أن السلبية مش فى البنات وبس اللى بيخافوا يتكلموا لا دى كمان فى الولاد والرجالة اللى ممكن واحد منهم يشوف واحدة بتتعاكس أو حد بيضايقها ويقف يتفرج ويقول أنا مالى وأدخل نفسى فى مشاكل لية

ما أنت لما تشوف واحدة ما تعرفهاش النهاردة وتقول أنا مالى بكرة هايجى الدور على أختك أو مراتك أو بنتك وواحد تانى يشوفهم فى نفس الموقف ويقول أنا مالى

أرجوكم كفاية سلبية لأننا خلاص وصلنا لمرحلة ما بقاش ينفع معاها السكات

علموا بناتكم وولادكم أزاى ما يكونوش سلبيين

عرفى بنتك ولا أختك أنه مش عيب لو حد ضايقها أنها تحاول توقفه عند حده ممكن مرة والتانية والثالثة ما يهموش ويسوق فيها ولكن لو كل البنات عملت كده وكل الولاد شافوا البنات ما بتسكتش عن حقها أعتقد مرة مع التانية هيخافوا يعملوا حاجة

ولو شافوا ولد ولا راجل بيقف ليهم فى لحظة وهما بيعاكسوا أى بنت مرة مع التانية هيخافوا

بلاش ثقافة الخوف وأنا مالى وخلينى فى حالى

لأننا هندفع ثمنها غالى قوى

بقلم بسمه عبدالباسط