أمنحونى الثقة

bos bos

أتكلمنا قبل كده فى حاجات كتيرة أحنا عايزينها من كل الناس اللى حوالينا ولكن فيه حاجات مهمة قوى أحنا عايزينها مش عايزينها من الرجالة بس لا أحنا عايزينها كمان من الستات ومن كل الناس
الحاجة دى هيا الثقة أيوة الثقة لية دايما البنت بتكون محل شك من كل اللى حواليها سواء أم أو أب أو أخ أو زوج أو أبن أو أى حد موجود حوالين البنت أو الست
لية دايما كل أفعال وتصرفات البنت مراقبة ومحل شك من كل الناس كأنها كائن مخطىء دايما ومن السهل أنه يغلط وأنها ماعندهاش عقل تميز الصح من الغلط ولا تقدر تفرق بين الحلال والحرام
لية دايما الولد عنده كل الصلاحيات لكل حاجة ودايما الأهل وكل الناس بتثق فيه على عكس البنت اللى شوية وهيعلقوا لها رادار يراقب تصرفاتها
الولد أنسان والبنت أنسانة والأتنين من الممكن أنهم يغلطوا ويعملوا حاجات كتيرة غلط وحرام والأتنين عندهم نفس العقل وعندهم الحياه والآحلام والطموح
يبقى لية ندى لطرف كل حاجة وناخده من الطرف التانى
لية ندى للولد الثقة العمياء زى ما بيقولوا ونشك فى البنت دايما
عايزة أوصل لكم حاجة أن عدم الثقة سواء كان للبنت أو للولد ممكن يدفعهم لعمل حاجات كتيرة غلط وممكن يكونوا كويسين جدا ومش بيغلطوا وأخلاقهم عالية جدا ولكن لعدم الثقة فيهم وغضبهم من الموضوع ده فنلاقيهم بيعملوا حاجات غلط كنوع من أنواع أسترداد حقهم الضايع
يعنى أحنا بندفع البنت لفعل الخطأ بمزاجنا وبأرادتنا
ياريت تمنحوا البنات الثقة وصدقونى هتلاقوهم قدها وقدها قوى كمان

-----------------------------------

فى انتظار كل مشاكلكم وأفكاركم وأى حاجة عايزين نتكلم فيها

أبعتوا لينا على ميل المدونة

elbanatayzaea@gmail.com